ಅಭಿಷೇಕ್ ಶರ್ಮಾ “L” ಸೆಲೆಬ್ರೇಷನ್ ಹಿಂದಿನ ಕಥೆ 

ಭಾರತ ತಂಡದ ಸ್ಫೋಟಕ ಓಪನರ್ ಅಭಿಷೇಕ್ ಶರ್ಮಾ ಪ್ರಸಕ್ತ ಏಷ್ಯಾಕಪ್ ಟಿ20 ಟೂರ್ನಿಯಲ್ಲಿ ಅಮೋಘ ಫಾರ್ಮ್‌ನಲ್ಲಿದ್ದಾರೆ. ಸೂಪರ್ 4 ಹಂತದ ಪಾಕಿಸ್ತಾನ ವಿರುದ್ಧದ ಮಹತ್ವದ ಪಂದ್ಯದಲ್ಲಿ ಅವರು ಮಿಂಚಿನ ಬ್ಯಾಟಿಂಗ್ ನಡೆಸಿ ಅಭಿಮಾನಿಗಳ ಮನಗೆದ್ದರು. 39 ಎಸೆತಗಳಲ್ಲಿ 6 ಬೌಂಡರಿ ಮತ್ತು 5 ಸಿಕ್ಸರ್‌ಗಳ ಸಹಾಯದಿಂದ 74 ರನ್ ಗಳಿಸಿದ ಅಭಿಷೇಕ್, ಅರ್ಧಶತಕ ಪೂರೈಸಿದ ಕ್ಷಣದಲ್ಲೇ ವಿಶೇಷ “L” ಟೈಪ್ ಸೆಲೆಬ್ರೇಷನ್‌ ಮಾಡಿ ಗಮನ ಸೆಳೆದರು.

ಪಂದ್ಯದ ನಂತರ ತಂಡದ ನಾಯಕ ಸೂರ್ಯಕುಮಾರ್ ಯಾದವ್ ಅವರೊಂದಿಗೆ ಮಾತನಾಡಿದ ಅಭಿಷೇಕ್, ಈ ಸೆಲೆಬ್ರೇಷನ್‌ ಹಿಂದಿನ ರಹಸ್ಯವನ್ನು ಬಹಿರಂಗಪಡಿಸಿದರು. “L ಎಂದರೆ ಲವ್ (ಪ್ರೀತಿ). ಈ ಆಚರಣೆ ಭಾರತೀಯ ಕ್ರಿಕೆಟ್ ತಂಡವನ್ನು ಪ್ರೀತಿಸುವ ಅಭಿಮಾನಿಗಳಿಗೆ ನನ್ನ ಗೌರವ,” ಎಂದು ಅಭಿಷೇಕ್ ಹೇಳಿದ್ದಾರೆ.

ಅಭಿಷೇಕ್ ಶರ್ಮಾ ಮತ್ತು ಶುಭಮನ್ ಗಿಲ್ ನೀಡಿದ ಸ್ಫೋಟಕ ಆರಂಭವು ಭಾರತಕ್ಕೆ ಸುಲಭ ಗೆಲುವಿನ ದಾರಿಯನ್ನು ಕಲ್ಪಿಸಿತು. ಅಭಿಷೇಕ್ ಅವರ ಈ ವಿಶಿಷ್ಟ ಆಚರಣೆ ಪ್ರೀತಿಗೆ ಸಲ್ಲಿಸಿದ ಗೌರವ!