ಮಾನವೀಯ ಮೌಲ್ಯಗಳಿಗೆ ಸಾಕ್ಷಿಯಾದ ಕುಂದಾಪುರ ಟ್ರೋಫಿ.
ಸ್ಪೋರ್ಟ್ಸ್ ಕನ್ನಡ ವರದಿ
ಕುಂದಾಪುರ-ಇಲ್ಲಿನ ಗಾಂಧಿ ಮೈದಾನದಲ್ಲಿ ಮೂರು ದಿನಗಳ ಕಾಲ ನಡೆದ ಟೆನಿಸ್ಬಾಲ್ ಕ್ರಿಕೆಟ್ ಪಂದ್ಯಾವಳಿ ಕುಂದಾಪುರ ಟ್ರೋಫಿ ಜಾತಿ ಧರ್ಮ ಭೇದವಿಲ್ಲದೇ,ರಾಜಕೀಯದ ನೆರಳಿಲ್ಲದೆ,ಮಾನವೀಯ ಮೌಲ್ಯಗಳಿಗೆ ಸಾಕ್ಷಿಯಾಗಿ ಸಮಸ್ತ ಕ್ರೀಡಾಪ್ರೇಮಿಗಳ ಹೃದಯ ಗೆದ್ದು ಸುದ್ದಿಯಾಗಿದೆ.
ಕುಂದಾಪುರದ ಉತ್ಸಾಹಿ ಯುವಕರಾದ ನ್ಯೂ ಸೆಲ್ ಡಾಟ್ ಕಾಮ್ ನ ಅಲ್ತಾಫ್ ಕೋಡಿ,ಯುವ ವೀಕ್ಷಕ ವಿವರಣೆಗಾರ ಶರತ್ ಕುಂಭಾಶಿ ಮತ್ತು ಅಂಪಾಯರ್ ಪ್ರಶಾಂತ್ ಪ್ರಭು ಮತ್ತು ಸ್ನೇಹಿತರ ಒಗ್ಗೂಡುವಿಕೆಯಲ್ಲಿ ನಡೆದ ಕುಂದಾಪುರ ಟ್ರೋಫಿಯ ಸಮಾರೋಪ ಸಮಾರಂಭದಲ್ಲಿ ವಿಶೇಷ ಚೇತನರಿಗಾಗಿ 5 ವ್ಹೀಲ್ ಚೇರ್,25 ಕುಟುಂಬಗಳಿಗೆ ರೇಷನ್ ಕಿಟ್ ವಿತರಣೆ,ಪ್ರತಿಭಾನ್ವಿತ ವಿದ್ಯಾರ್ಥಿಗಳಿಗೆ ವಿದ್ಯಾರ್ಥಿ ವೇತನ ಮತ್ತು ಇತ್ತೀಚೆಗಷ್ಟೇ ಕೋಟೇಶ್ವರದಲ್ಲಿ ನಡೆದ ಅಪಘಾತದಲ್ಲಿ ದುರ್ಮರಣಕ್ಕೀಡಾದ ಧನುಷ್ ಕಿರಿಮಂಜೇಶ್ವರ ಇವರ ಕುಟುಂಬಕ್ಕೆ ಆರ್ಥಿಕ ಸಹಾಯ ನೀಡಲಾಯಿತು.
ಒಟ್ಟು 16 ಫ್ರಾಂಚೈಸಿಗಳು ಐಪಿಎಲ್ ಮಾದರಿಯಲ್ಲಿ ಸೆಣಸಾಟ ನಡೆಸಿದ ಈ ಪಂದ್ಯಾಟದಲ್ಲಿ ಪ್ರತಿಯೊಂದು ತಂಡದಲ್ಲಿ ರಾಜ್ಯಮಟ್ಟದ 2 ಆಟಗಾರರಿಗೆ ಮಾತ್ರ ಅವಕಾಶ ಕಲ್ಪಿಸಿದ್ದರಿಂದ ಕರಾವಳಿ ಪರಿಸರದ ಸುಮಾರು 180 ಯುವ ಆಟಗಾರರಿಗೆ ತಮ್ಮ ಪ್ರತಿಭಾ ಪ್ರದರ್ಶನಕ್ಕೆ ಅವಕಾಶ ಸಿಕ್ಕಿತ್ತು.
ಸಚಿನ್ ಇಲೆವೆನ್ ಪ್ರಥಮ
ಲೀಗ್ ಹಂತದ ರೋಚಕ ಸೆಣಸಾಟದ ಬಳಿಕ ಅಂತಿಮವಾಗಿ ಸಚಿನ್ ಇಲೆವೆನ್ ತಂಡದ ಸಾಗರ್ ಭಂಡಾರಿ ಮತ್ತು ಶಶಾಂಕ್ ಅತ್ಯಮೋಘ ಆಟದ ಫಲವಾಗಿ ಸಂಗಮ್ ತೆಂಕನಿಡಿಯೂರು ತಂಡವನ್ನು ಮಣಿಸಿ ಪ್ರಥಮ ಬಹುಮಾನದ ಸಹಿತ ಒಂದು ಲಕ್ಷ ನಗದು ಬಹುಮಾನ ಹಾಗೂ ದ್ವಿತೀಯ ಸ್ಥಾನಿ ಸಂಗಮ್ ತೆಂಕನಿಡಿಯೂರು 50000 ನಗದು ಸಹಿತ ಆಕರ್ಷಕ ಟ್ರೋಫಿಗಳನ್ನು ಪಡೆದರು.
ಫೈನಲ್ ಪಂದ್ಯಶ್ರೇಷ್ಟ ಮತ್ತು ಬೆಸ್ಟ್ ಬ್ಯಾಟರ್ ಶಶಾಂಕ್ ಶೆಟ್ಟಿ, ಬೆಸ್ಟ್ ಬೌಲರ್ ರೀತು ಮೈಸೂರು,ಬೆಸ್ಟ್ ಕೀಪರ್ ಪ್ರಶಸ್ತಿ ಹರಿ ಬೆಂಗಳೂರು ಪಡೆದರೆ ಸರಣಿಯುದ್ದಕ್ಕೂ ಶ್ರೇಷ್ಠ ಆಲ್ರೌಂಡರ್ ಪ್ರದರ್ಶನ ನೀಡಿದ ಸಾಗರ್ ಭಂಡಾರಿ ಸರಣಿಶ್ರೇಷ್ಟ ಪ್ರಶಸ್ತಿ ರೂಪದಲ್ಲಿ ಚಿನ್ನದ ಉಂಗುರ ತನ್ನದಾಗಿಸಿಕೊಂಡರು.
