ಬರಿಮಾರು ಮಹಾಮಾಯ ದೇವಸ್ಥಾನ ಮೈದಾನದಲ್ಲಿ ವೈದಿಕ ಕ್ರೀಡೋತ್ಸವದ ಸಂಭ್ರಮ
ಬರಿಮಾರು ಮಹಾಮಾಯ ದೇವಸ್ಥಾನ ಮೈದಾನದಲ್ಲಿ ವೈದಿಕ ಕ್ರೀಡೋತ್ಸವ 2026 ಕ್ರಿಕೆಟ್ ಟೂರ್ನಿಯ 7ನೇ ಆವೃತ್ತಿ ಮಾರ್ಚ್ 15ರಂದು ಏಕಾದಶಿ ದಿನ ಭವ್ಯವಾಗಿ ನಡೆಯಿತು. ವೈದಿಕ ಕ್ರೀಡೋತ್ಸವ ಸಮಿತಿ ವತಿಯಿಂದ ಆಯೋಜಿಸಲಾದ ಈ ಕ್ರೀಡೋತ್ಸವವು ಯಶಸ್ವಿಯಾಗಿ ಸಮಾಪ್ತಿಗೊಂಡಿದ್ದು, ಭಾಗವಹಿಸಿದ ಎಲ್ಲಾ ವೈದಿಕರು ಹಾಗೂ ಕ್ರೀಡಾಭಿಮಾನಿಗಳಿಂದ ಪ್ರಶಂಸೆಗೆ ಪಾತ್ರವಾಯಿತು.
ಈ ಟೂರ್ನಿಯಲ್ಲಿ ವಿವಿಧ ಪ್ರದೇಶಗಳಿಂದ ಆಗಮಿಸಿದ ಜಿಎಸ್ಬಿ ವೈದಿಕರು ಬ್ಯಾಟ್ ಮತ್ತು ಬಾಲ್ ಹಿಡಿದು ಮೈದಾನಕ್ಕಿಳಿದು ಅಪಾರ ಉತ್ಸಾಹದೊಂದಿಗೆ ಆಟವಾಡಿದರು. ಪಂದ್ಯಗಳು ರೋಚಕ ತಿರುವುಗಳನ್ನು ಪಡೆದುಕೊಂಡು ಕ್ರೀಡಾಸ್ಫೂರ್ತಿ ಮತ್ತು ಸ್ನೇಹಭಾವವನ್ನು ಮತ್ತಷ್ಟು ಗಟ್ಟಿಗೊಳಿಸಿತು. ಮೈದಾನದಲ್ಲಿ ಆಟಗಾರರು ತೋರಿದ ಸ್ಪರ್ಧಾತ್ಮಕ ಮನೋಭಾವ ಮತ್ತು ಪರಸ್ಪರ ಗೌರವ ಎಲ್ಲರ ಮೆಚ್ಚುಗೆಗೆ ಪಾತ್ರವಾಯಿತು.
ಟೂರ್ನಿಯ ಯಶಸ್ವಿ ಆಯೋಜನೆಗೆ ಪಂಡಿತ್ ಎಂ ಕಾಶಿನಾಥ್ ಆಚಾರ್ಯ ಅವರ ನೇತೃತ್ವ ಹಾಗೂ ಸಮಿತಿಯ ಕಾರ್ಯಕಾರಿ ಸದಸ್ಯರ ಸಂಪೂರ್ಣ ಸಹಕಾರ ಪ್ರಮುಖ ಪಾತ್ರವಹಿಸಿತು. ಜೊತೆಗೆ ಬರಿಮಾರು ರಾಕೇಶ್ ಪ್ರಭು, ಅವರ ಕುಟುಂಬದವರು ಮತ್ತು ಸ್ನೇಹಿತರು ನೀಡಿದ ಸಹಕಾರದಿಂದ ಕಾರ್ಯಕ್ರಮವನ್ನು ಭವ್ಯವಾಗಿ ನಡೆಸಲು ಸಾಧ್ಯವಾಯಿತು ಎಂದು ಸಂಘಟಕರು ತಿಳಿಸಿದರು.
ಒಟ್ಟು ಎಂಟು ತಂಡಗಳು ಭಾಗವಹಿಸಿದ್ದ ಈ ಟೂರ್ನಿಯಲ್ಲಿ ರೋಚಕ ಪಂದ್ಯಗಳ ಬಳಿಕ ನಡೆದ ಭವ್ಯ ಅಂತಿಮ ಪಂದ್ಯದಲ್ಲಿ ಭಟ್ಜಿಸ್ ಸೂಪರ್ ಕಿಂಗ್ಸ್ ತಂಡವು ಚಾಂಪಿಯನ್ ಪಟ್ಟವನ್ನು ತನ್ನದಾಗಿಸಿಕೊಂಡಿತು. ಸುಧೇಶ್ ಭಟ್ ಅವರ ಸಮರ್ಥ ನಾಯಕತ್ವದಲ್ಲಿ ಆಡಿದ ಭಟ್ಜಿಸ್ ಸೂಪರ್ ಕಿಂಗ್ಸ್ ತಂಡವು ಅಂತಿಮ ಪಂದ್ಯದಲ್ಲಿ ಸಾರಸ್ವತ್ ವೈದಿಕ್ಸ್ ತಂಡವನ್ನು ಸೋಲಿಸಿ ಈ ವರ್ಷದ ಕಿರೀಟವನ್ನು ಗೆದ್ದಿತು. ಸಾರಸ್ವತ್ ವೈದಿಕ್ಸ್ ತಂಡವು ರನ್ನರ್-ಅಪ್ ಪಟ್ಟಕ್ಕೆ ತೃಪ್ತಿಪಟ್ಟಿತು.
ಟೂರ್ನಿಯಲ್ಲಿ ಸಾರಸ್ವತ್ ವೈದಿಕ್ಸ್ ತಂಡದ ಜಿ ಕೆ ಭಟ್ ಅವರು ಅದ್ಭುತ ಆಲ್ರೌಂಡ್ ಪ್ರದರ್ಶನ ನೀಡಿದ ಕಾರಣ ಮ್ಯಾನ್ ಆಫ್ ದಿ ಸೀರಿಸ್ ಪ್ರಶಸ್ತಿಗೆ ಭಾಜನರಾದರು. ಭಟ್ಜಿಸ್ ಸೂಪರ್ ಕಿಂಗ್ಸ್ ತಂಡದ ನಾಯಕ ಸುಧೇಶ್ ಭಟ್ ಅವರಿಗೆ ಬೆಸ್ಟ್ ಬ್ಯಾಟ್ಸ್ಮನ್ ಪ್ರಶಸ್ತಿ ಲಭಿಸಿತು. ಅದೇ ತಂಡದ ವೇದಾಂತ್ ಭಟ್ ಅವರು ಟೂರ್ನಿಯ ಬೆಸ್ಟ್ ಬೌಲರ್ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.
ಟೂರ್ನಿಯಲ್ಲಿ ಮಹಾಮಾಯ ಬರಿಮಾರು ತಂಡ ಮೂರನೇ ಸ್ಥಾನ ಪಡೆದರೆ, ರಾಯಲ್ ಚಾಲೆಂಜರ್ಸ್ ಭಟ್ಜಿಸ್ ತಂಡ ನಾಲ್ಕನೇ ಸ್ಥಾನವನ್ನು ಪಡೆದುಕೊಂಡಿತು. ಇದೇ ಸಂದರ್ಭದಲ್ಲಿ SVT ವಾಲಂಟಿಯರ್ಸ್ ಕ್ರಿಕೆಟ್ ಟೀಮ್ ಮತ್ತು ಮಹಮ್ಮಾಯ ಬರಿಮಾರು (ವೈದಿಕ್ಸ್ ಟೀಮ್) ತಂಡಗಳ ನಡುವೆ ಪ್ರದರ್ಶನ ಪಂದ್ಯವೂ ನಡೆಯಿತು.
ಕಾರ್ಯಕ್ರಮದ ವೇಳೆ ಭಾಗವಹಿಸಿದ ಎಲ್ಲ ಆಟಗಾರರು ಹಾಗೂ ಪ್ರೇಕ್ಷಕರಿಗಾಗಿ ರುಚಿಕರವಾದ ಆಹಾರ ಮತ್ತು ಪಾನೀಯಗಳನ್ನು ವ್ಯವಸ್ಥೆ ಮಾಡಲಾಗಿತ್ತು. ಈ ವ್ಯವಸ್ಥೆಯನ್ನು ಎಲ್ಲರೂ ಮೆಚ್ಚಿಕೊಂಡರು. ಕ್ರೀಡೆ ಮೂಲಕ ಒಗ್ಗಟ್ಟು, ಸ್ನೇಹಭಾವ ಮತ್ತು ಸಮುದಾಯದ ಬಂಧವನ್ನು ಮತ್ತಷ್ಟು ಬಲಪಡಿಸುವಲ್ಲಿ ಈ ಕ್ರೀಡೋತ್ಸವ ಪ್ರಮುಖ ಪಾತ್ರವಹಿಸಿದೆ ಎಂದು ಉಪಸ್ಥಿತರು ಅಭಿಪ್ರಾಯಪಟ್ಟರು.
ಚೆಂಪಿ ಶ್ರೀ ರಾಮಚಂದ್ರ ಭಟ್, ದೇವಣ್ಣ ಭಟ್, ಗೋಪಿ ಭಟ್, ಎಂ ಕಿರಣ್ ಪೈ ಸೇರಿದಂತೆ ಅನೇಕ ಗಣ್ಯರು ಉಪಸ್ಥಿತರಿದ್ದು ಆಟಗಾರರನ್ನು ಪ್ರೋತ್ಸಾಹಿಸಿದರು. ಟೂರ್ನಿಯ ಯಶಸ್ಸು ಮುಂದಿನ ವರ್ಷವೂ ಇನ್ನಷ್ಟು ಭವ್ಯವಾಗಿ ಈ ಕ್ರೀಡೋತ್ಸವವನ್ನು ನಡೆಸುವ ಆತ್ಮವಿಶ್ವಾಸವನ್ನು ಸಂಘಟಕರಲ್ಲಿ ಮೂಡಿಸಿದೆ.
