ಭಾರತ – ಆಸ್ಟ್ರೇಲಿಯಾ ಟಿ20ಐ ಸರಣಿಗೆ ಕೌಂಟ್ಡೌನ್ ಆರಂಭ
ಕ್ಯಾನ್ಬೆರಾದಲ್ಲಿ ಬುಧವಾರ ಮೊದಲ ಪಂದ್ಯ; ಟೀಮ್ ಇಂಡಿಯಾ ಸೇಡು ತೀರಿಸಿಕೊಳ್ಳಲು ಸಜ್ಜು
ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ರೋಚಕ ಏಕದಿನ ಸರಣಿ ಅಂತ್ಯಗೊಂಡಿದ್ದು, ಇದೀಗ ಅಭಿಮಾನಿಗಳ ಕಣ್ಣುಗಳು ಟಿ20 ಸರಣಿಯತ್ತ ನೆಟ್ಟಿವೆ. ಐದು ಪಂದ್ಯಗಳ ಟಿ20 ಅಂತರರಾಷ್ಟ್ರೀಯ ಸರಣಿ ಬುಧವಾರ ಕ್ಯಾನ್ಬೆರಾದಲ್ಲಿ ಆರಂಭವಾಗಲಿದ್ದು, ಉಳಿದ ಪಂದ್ಯಗಳು ಅಕ್ಟೋಬರ್ 31 ಹಾಗೂ ನವೆಂಬರ್ 2, 6 ಮತ್ತು 8 ರಂದು ನಡೆಯಲಿವೆ.
ಆಸ್ಟ್ರೇಲಿಯಾ ವಿರುದ್ಧ ಏಕದಿನ ಸರಣಿಯಲ್ಲಿ 1-2 ಸೋಲಿನ ನಂತರ, ಸೂರ್ಯಕುಮಾರ್ ಯಾದವ್ ನೇತೃತ್ವದ ಭಾರತ ತಂಡವು ಟಿ20 ಸರಣಿಯಲ್ಲಿ ಸೇಡು ತೀರಿಸಿಕೊಳ್ಳುವ ಸಂಕಲ್ಪದೊಂದಿಗೆ ಮೈದಾನಕ್ಕಿಳಿಯಲಿದೆ. ಮೊದಲ ಪಂದ್ಯ ಮಧ್ಯಾಹ್ನ 1.45ಕ್ಕೆ ಆರಂಭವಾಗಲಿದೆ. ಸೂರ್ಯಕುಮಾರ್ ಯಾದವ್ ನೇತೃತ್ವದ ಯುವ ಹಾಗೂ ಚುರುಕಿನ ತಂಡವು ಜಯದೊಂದಿಗೆ ಸರಣಿಯನ್ನು ಆರಂಭಿಸುವ ಗುರಿಯನ್ನು ಹೊಂದಿದೆ.
ಏಷ್ಯಾ ಕಪ್ ಅನ್ನು ಅಜೇಯವಾಗಿ ಗೆದ್ದ ಬಳಿಕ ಭಾರತ ‘ಕಾಂಗರೂ ಹಂಟ್’ಗೆ ಹೊರಟಿದೆ. ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಭಾರತವು ತನ್ನ ಶ್ರೇಷ್ಠ ಆಟ ಪ್ರದರ್ಶಿಸಬೇಕಿದೆ. ಈ ಸರಣಿ ಮುಂದಿನ ವರ್ಷ ನಡೆಯಲಿರುವ ಐಸಿಸಿ ಟಿ20 ವಿಶ್ವಕಪ್ಗೆ ಭಾರತಕ್ಕೆ ಅತ್ಯುತ್ತಮ ಸಿದ್ಧತಾ ಅವಕಾಶವಾಗಿದೆ.
ಮಿಚೆಲ್ ಮಾರ್ಷ್ ನೇತೃತ್ವದ ಆಸ್ಟ್ರೇಲಿಯಾ ತಂಡವು ಏಕದಿನ ಸರಣಿಯ ಗೆಲುವಿನ ಮೆಚ್ಚುಗೆಯಲ್ಲಿಯೇ ಟಿ20 ಸರಣಿಯಲ್ಲಿಯೂ ಪ್ರಾಬಲ್ಯ ಸಾಧಿಸುವ ದೃಷ್ಟಿಯಲ್ಲಿದೆ. ಇತ್ತ ಸೂರ್ಯಕುಮಾರ್ ಯಾದವ್ ಖಾಯಂ ನಾಯಕರಾದ ಬಳಿಕ ಟೀಮ್ ಇಂಡಿಯಾ ಟಿ20ಐಗಳಲ್ಲಿ ನಿರಂತರ ಯಶಸ್ಸು ಕಾಣುತ್ತಿದೆ. ಕಳೆದ ಏಷ್ಯಾ ಕಪ್ನಲ್ಲಿ ಭಾರತ ಒಂದು ಪಂದ್ಯವನ್ನೂ ಸೋಲದೆ ಪ್ರಶಸ್ತಿ ಮುಡಿಗೇರಿಸಿಕೊಂಡಿತ್ತು.
ಭಾರತದ ಬ್ಯಾಟಿಂಗ್ ಸಾಲು ಅಭಿಷೇಕ್ ಶರ್ಮಾ, ಸಂಜು ಸ್ಯಾಮ್ಸನ್ ಹಾಗೂ ತಿಲಕ್ ವರ್ಮಾ ಅವರಂತಹ ಆಕ್ರಮಣಕಾರಿ ಬ್ಯಾಟ್ಸ್ಮನ್ಗಳಿಂದ ಬಲಿಷ್ಠವಾಗಿದೆ. ಬೌಲಿಂಗ್ ವಿಭಾಗದಲ್ಲಿ ಜಸ್ಪ್ರೀತ್ ಬುಮ್ರಾ, ಕುಲದೀಪ್ ಯಾದವ್ ಹಾಗೂ ವರುಣ್ ಚಕ್ರವರ್ತಿ ಅವರ ಉಪಸ್ಥಿತಿಯು ಭಾರತವನ್ನು ಸಮತೋಲಿತ ಹಾಗೂ ಅಪಾಯಕಾರಿಯಾದ ತಂಡವನ್ನಾಗಿಸಿದೆ.
ಬಲಿಷ್ಠ ಬ್ಯಾಟಿಂಗ್ ಮತ್ತು ಶಿಸ್ತುಬದ್ಧ ಬೌಲಿಂಗ್ನ ಸಂಯೋಜನೆಯಿಂದ ಭಾರತವು ಈ ಟಿ20 ಸರಣಿಯಲ್ಲಿ ಸ್ವಲ್ಪ ಮೇಲುಗೈ ಹೊಂದಿದೆ ಎನ್ನಬಹುದು. ಅಭಿಮಾನಿಗಳು ಈಗ ಕ್ಯಾನ್ಬೆರಾದಲ್ಲಿ ಆರಂಭಗೊಳ್ಳಲಿರುವ ಈ ರೋಚಕ ಸರಣಿಯ ಮೊದಲ ಘರ್ಷಣೆಯ ನಿರೀಕ್ಷೆಯಲ್ಲಿ ಕಾದು ಕುಳಿತಿದ್ದಾರೆ.
