ಫೈನಲ್ಗೆ ಇಂಡಿಯಾ ಎಂಟ್ರಿ – ಫೈನಲ್ ಗೇಟ್ ಓಪನ್!
ಏಷ್ಯಾಕಪ್ 2025ರಲ್ಲಿ ಟೀಮ್ ಇಂಡಿಯಾ ಫೈನಲ್ ತಲುಪಿದ ಮೊದಲ ತಂಡ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಸೂರ್ಯಕುಮಾರ್ ಯಾದವ್ ನೇತೃತ್ವದ ಭಾರತ ತಂಡವು ಸೂಪರ್ ಫೋರ್ನ ಎರಡನೇ ಪಂದ್ಯದಲ್ಲಿ ಬಾಂಗ್ಲಾದೇಶವನ್ನು 41 ರನ್ಗಳಿಂದ ಮಣಿಸಿ ಫೈನಲ್ಗೆ ಪ್ರವೇಶಿಸಿತು.
169 ರನ್ಗಳ ಗುರಿಯನ್ನು ಬೆನ್ನಟ್ಟಿದ ಬಾಂಗ್ಲಾದೇಶ, ಜಸ್ಪ್ರೀತ್ ಬುಮ್ರಾ ಮತ್ತು ಕುಲದೀಪ್ ಯಾದವ್ ಅವರ ಶ್ರೇಷ್ಠ ಬೌಲಿಂಗ್ ಎದುರಿಸಲು ವಿಫಲವಾಯಿತು. ಬುಮ್ರಾ ತಮ್ಮ ಬಿಗುವಿನ ಬೌಲಿಂಗ್ ಮೂಲಕ ಆರಂಭದಲ್ಲೇ ಬಾಂಗ್ಲಾ ಬ್ಯಾಟಿಂಗ್ ಸಾಲಿಗೆ ಒತ್ತಡ ತಂದರು, ನಂತರ ಕುಲದೀಪ್ ಮಧ್ಯ ಓವರ್ಗಳಲ್ಲಿ ಕೀ ವಿಕೆಟ್ಗಳನ್ನು ಕಿತ್ತರು. ಇವರ ಜೋಡಿ ಪ್ರದರ್ಶನದಿಂದ ಭಾರತ ಭರ್ಜರಿ ಗೆಲುವು ದಾಖಲಿಸಿತು.
ಆದರೆ, ಈ ಗೆಲುವು ಸಂಪೂರ್ಣ ತಂಡದ ಪ್ರದರ್ಶನವಾಗಿರಲಿಲ್ಲ ಎಂಬುದು ಸ್ಪಷ್ಟ. ಆರಂಭಿಕರಾದ ಅಭಿಷೇಕ್ ಶರ್ಮಾ ಹೊರತುಪಡಿಸಿ, ಉಳಿದ ಬ್ಯಾಟ್ಸ್ಮನ್ಗಳು ನಿರೀಕ್ಷಿತ ಮಟ್ಟದಲ್ಲಿ ರನ್ಗಳನ್ನು ಕಲೆಹಾಕಲಿಲ್ಲ. ಜೊತೆಗೆ, ಭಾರತ ಮೈದಾನದಲ್ಲಿ ಐದು ಕ್ಯಾಚ್ಗಳನ್ನು ಕೈಚೆಲ್ಲಿದ ತಪ್ಪು ಮಾಡಿತು. ಫೈನಲ್ನಲ್ಲಿ ಇಂತಹ ದೋಷಗಳನ್ನು ತಪ್ಪಿಸುವುದು ಭಾರತಕ್ಕೆ ಅತ್ಯಗತ್ಯ.
ಸೂಪರ್ ಫೋರ್ನಲ್ಲಿ ಭಾರತದ ಕೊನೆಯ ಪಂದ್ಯ ನಾಳೆ (ಶುಕ್ರವಾರ) ಶ್ರೀಲಂಕಾ ವಿರುದ್ಧ ನಡೆಯಲಿದೆ. ಶ್ರೀಲಂಕಾ ಈಗಾಗಲೇ ಟೂರ್ನಿಯಿಂದ ಹೊರಗುಳಿದಿರುವುದರಿಂದ ಈ ಪಂದ್ಯದ ಫಲಿತಾಂಶ ಭಾರತಕ್ಕೆ ಅಪ್ರಸ್ತುತ. ಹೀಗಾಗಿ ಟೀಮ್ ಇಂಡಿಯಾ ಈ ಪಂದ್ಯದಲ್ಲಿ ಪ್ಲೇಯಿಂಗ್ ಇಲೆವೆನ್ ನಲ್ಲಿ ಕೆಲ ಬದಲಾವಣೆಗಳನ್ನು ಮಾಡುವ ಸಾಧ್ಯತೆಯಿದೆ, ಇದರಿಂದ ಬೆಂಚ್ ನಲ್ಲಿರುವ ಆಟಗಾರರಿಗೆ ಅವಕಾಶ ಸಿಗಬಹುದು.
ಫೈನಲ್ನಲ್ಲಿ ಭಾರತದ ಎದುರಾಳಿಗಳು ಪಾಕಿಸ್ತಾನ ಅಥವಾ ಬಾಂಗ್ಲಾದೇಶ ಆಗಿರಲಿದ್ದಾರೆ. ಈ ಇಬ್ಬರ ನಡುವಿನ ಮುಂಬರುವ ಸೂಪರ್ ಫೋರ್ ಪಂದ್ಯ ನಿರ್ಣಾಯಕವಾಗಿದ್ದು, ಗೆದ್ದ ತಂಡ ಭಾರತವನ್ನು ಫೈನಲ್ನಲ್ಲಿ ಎದುರಿಸಲಿದೆ. ಪಾಕಿಸ್ತಾನ ಹಾಗೂ ಬಾಂಗ್ಲಾದೇಶ ತಲಾ ಎರಡು ಅಂಕಗಳನ್ನು ಹೊಂದಿದ್ದು, ಆ ಪಂದ್ಯದಲ್ಲಿ ಗೆದ್ದ ತಂಡ ನಾಲ್ಕು ಅಂಕಗಳೊಂದಿಗೆ ಫೈನಲ್ಗೆ ಮುನ್ನಡೆಯಲಿದೆ.
ಭಾರತ, ಭಾನುವಾರದ ಫೈನಲ್ಗಾಗಿ ತೀವ್ರ ತಯಾರಿ ನಡೆಸುತ್ತಿದ್ದು, ಜಯದೊಂದಿಗೆ ಅದ್ಭುತ ಪ್ರದರ್ಶನ ನೀಡಲು ಎದುರು ನೋಡುತ್ತಿದೆ.
