ಬೆಂಗಳೂರು ಜಿಎಸ್ಬಿ ಕ್ರಿಕೆಟ್ ಲೋಕಕ್ಕೆ ಹೊಸ ಅಧ್ಯಾಯ — “BPPL” ಸೀಸನ್ 2 ಮಹತ್ತರ ನಿರೀಕ್ಷೆಯ ನಡುವೆ ಆರಂಭಕ್ಕೆ ಸಜ್ಜು
ಬೆಂಗಳೂರು : ಜಿಎಸ್ಬಿ ಕ್ರಿಕೆಟ್ ವಲಯದಲ್ಲಿ ಮಹತ್ವದ ಹೊಸ ಪ್ರಯತ್ನವಾಗಿ ಗುರುತಿಸಿಕೊಂಡಿರುವ “BPPL – ಬೆಂಗಳೂರು ಪಾರ್ಥಸಾರಥಿ ಪ್ರೀಮಿಯರ್ ಲೀಗ್” ತನ್ನ ಸೀಸನ್ 2 ಮೂಲಕ ಮತ್ತೊಂದು ಭರವಸೆಯ ಅಧ್ಯಾಯದತ್ತ ಪಾದಾರ್ಪಣೆ ಮಾಡುತ್ತಿದೆ. ಪ್ರತಿಭಾವಂತ ಜಿಎಸ್ಬಿ ಯುವ ಆಟಗಾರರ ಕ್ರಿಕೆಟ್ ಕನಸುಗಳಿಗೆ ವಾಸ್ತವ ರೂಪ ನೀಡಲು “BPPL” ಅತ್ಯುತ್ತಮ ವೇದಿಕೆ ಆಗಿ ಹೊರಹೊಮ್ಮಿದೆಯೆಂಬುದು ಕ್ರೀಡಾಸಕ್ತರ ಏಕಮತದ ಅಭಿಪ್ರಾಯ.
ಯಶಸ್ವಿಯಾಗಿ ನೆರವೇರಿದ್ದ BPPL ಸೀಸನ್ 1 ಜಿಎಸ್ಬಿ ಕ್ರಿಕೆಟ್ ಅಭಿಮಾನಿಗಳ ಹೃದಯ ಗೆದ್ದಿದ್ದು, ಇದೀಗ ಸೀಸನ್ 2 ಗೆ ಎಲ್ಲಾ ವಲಯಗಳಿಂದ ಭಾರೀ ಪ್ರತಿಕ್ರಿಯೆ ದೊರೆಯುತ್ತಿದೆ. ಜಿಎಸ್ಬಿಯ ಭವಿಷ್ಯದ ಕ್ರಿಕೆಟ್ ಅಭಿವೃದ್ಧಿಗೆ ಹೊಸ ದಾರಿ ತೋರಿಸುವ ಪ್ರಮುಖ ಹೆಜ್ಜೆಯಾಗಿ ಈ ಲೀಗ್ನ್ನು ಕ್ರೀಡಾ ವಲಯವು ಕಣ್ಣಾರೆ ನೋಡುತ್ತಿದೆ.
ಬೆಂಗಳೂರಿನಲ್ಲಿ ಅದ್ದೂರಿಯಾಗಿ ನಡೆದ BPPL ಆಟಗಾರರ ಆಯ್ಕೆ ಹರಾಜು ಮತ್ತು ಜೆರ್ಸಿ ಬಿಡುಗಡೆ ಕಾರ್ಯಕ್ರಮ ಈ ವರ್ಷದ ಸೀಸನ್ಗೆ ಮತ್ತಷ್ಟು ಮೆರಗು ನೀಡಿತು. ತಂಡದ ಮಾಲೀಕರು, ಆಟಗಾರರು ಮತ್ತು ಅಭಿಮಾನಿಗಳು ಭಾರಿ ಸಂಖ್ಯೆಯಲ್ಲಿ ಭಾಗವಹಿಸಿದ ಈ ಕಾರ್ಯಕ್ರಮದಲ್ಲಿ ಜಿಎಸ್ಬಿ ಕ್ರಿಕೆಟ್ ಸಾಮರ್ಥ್ಯದ ವೈಭವ ನಿಜಕ್ಕೂ ಕಂಗೊಳಿಸಿತು.
BPPL ಸೀಸನ್ – 2 ಡಿಸೆಂಬರ್ 6 ರಿಂದ ಡಿಸೆಂಬರ್ 7 ರವರೆಗೆ ಜಿಎಸ್ಬಿ ಕ್ರಿಕೆಟ್ ಪ್ರೇಮಿಗಳಿಗೆ ಅದ್ಭುತ ರಸದೌತಣವನ್ನು ಉಣಬಡಿಸಲಿದೆ. ಸ್ಫರ್ಧಾತ್ಮಕ ಪಂದ್ಯಗಳು, ಹೊಸ ಪ್ರತಿಭೆಗಳ ಅಬ್ಬರ ಮತ್ತು ಉತ್ಸಾಹಭರಿತ ವಾತಾವರಣದಿಂದ ಈ ಕ್ರೀಡಾ ಕೂಟ ಜಿಎಸ್ಬಿ ಕ್ರಿಕೆಟ್ ಇತಿಹಾಸದಲ್ಲಿ ಮತ್ತೊಂದು ಸುವರ್ಣ ಅಧ್ಯಾಯವನ್ನು ಬರೆಯಲಿರುವುದು ನಿಶ್ಚಿತ.
BPPL ಸೀಸನ್ 2 — ಇದು ಜಿಎಸ್ಬಿಯ ಕ್ರಿಕೆಟ್ ಸಮರ.
