ಕುಂದಾಪುರದಿಂದ ಅಹಮದಾಬಾದ್ ಗೆ: ವಿಜಯ್ ಹಜಾರೆ ಟ್ರೋಫಿಯಲ್ಲಿ ಕರ್ನಾಟಕ ಪರ ಶ್ರೀಶ ಎಸ್.ಆಚಾರ್ ಪಾದಾರ್ಪಣೆ!

ಉಡುಪಿ ಜಿಲ್ಲೆಯ ಕುಂದಾಪುರ ತಾಲ್ಲೂಕಿನ ತೆಕ್ಕಟ್ಟೆಯ ಯುವ ಪ್ರತಿಭೆ ಶ್ರೀಶಾ ಎಸ್. ಆಚಾರ್ (Shreesha S. Achar) ಅವರು ಬಿಸಿಸಿಐ ಆಯೋಜನೆಯ 2025-26ನೇ ಸಾಲಿನ ವಿಜಯ್ ಹಜಾರೆ ಟ್ರೋಫಿ ಎಲೈಟ್ ಪಂದ್ಯಾವಳಿಯಲ್ಲಿ ಕರ್ನಾಟಕ ಹಿರಿಯರ ತಂಡಕ್ಕೆ ಅಧಿಕೃತವಾಗಿ ಪಾದಾರ್ಪಣೆ ಮಾಡುವ ಮೂಲಕ ಕರಾವಳಿಯ ಕೀರ್ತಿ ಪತಾಕೆಯನ್ನು ಹಾರಿಸಿದ್ದಾರೆ.

ಅಹ್ಮದಾಬಾದ್‌ನಲ್ಲಿ ನಡೆದ ಪಂದ್ಯದ ಆರಂಭಕ್ಕೂ ಮುನ್ನ ನಡೆದ ಸರಳ ಸಮಾರಂಭದಲ್ಲಿ, ಕರ್ನಾಟಕ ತಂಡದ ಉಪನಾಯಕ ಹಾಗೂ ಅನುಭವಿ ಆಟಗಾರ ಕರುಣ್ ನಾಯರ್ ಅವರು ಶ್ರೀಶಾ ಎಸ್. ಆಚಾರ್ ಅವರಿಗೆ ಕರ್ನಾಟಕ ತಂಡದ ‘ಡೆಬ್ಯೂ ಕ್ಯಾಪ್’ ನೀಡುವ ಮೂಲಕ ಗೌರವಿಸಿದರು. ಈ ಸಂದರ್ಭದಲ್ಲಿ ಕರ್ನಾಟಕ ತಂಡದ ನಾಯಕ ಮಯಾಂಕ್ ಅಗರ್ವಾಲ್ ಉಪಸ್ಥಿತರಿದ್ದು, ಉದಯೋನ್ಮುಖ ಸ್ಪಿನ್ನರ್ ಅನ್ನು ತಂಡಕ್ಕೆ ಆತ್ಮೀಯವಾಗಿ ಸ್ವಾಗತಿಸಿ ಶುಭ ಹಾರೈಸಿದರು.

ಚೊಚ್ಚಲ ಆಟಗಾರನಿಗೆ “ಕನಸು ನನಸಾದ” ಕ್ಷಣ; ಕೆ.ಎಲ್. ರಾಹುಲ್ ಕೈಯಿಂದ ‘ಬೆಸ್ಟ್ ಫೀಲ್ಡರ್’ ಪ್ರಶಸ್ತಿ!

ಶ್ರೀಶ ಅವರ ಚೊಚ್ಚಲ ಪಂದ್ಯವು ಮೈದಾನದಲ್ಲಿನ ಅವರ ಕ್ಲಿನಿಕಲ್ ಪ್ರದರ್ಶನದಿಂದ ಮತ್ತಷ್ಟು ಗಮನ ಸೆಳೆಯಿತು. ತಮ್ಮ ಮೊದಲ ಪಂದ್ಯದಲ್ಲೇ ಶ್ರೀಶಾ ಅವರು ಚುರುಕಿನ ಫೀಲ್ಡಿಂಗ್ ಮೂಲಕ ಎಲ್ಲರ ಗಮನ ಸೆಳೆದರು. ಪಂದ್ಯದ ನಂತರ ಡ್ರೆಸ್ಸಿಂಗ್ ರೂಂನಲ್ಲಿ ನಡೆದ ವಿಶೇಷ ಸಂಪ್ರದಾಯದಂತೆ, ಟೀಮ್ ಇಂಡಿಯಾದ ಸ್ಟಾರ್ ಆಟಗಾರ ಕೆ.ಎಲ್. ರಾಹುಲ್ ಅವರು ಶ್ರೀಶಾ ಎಸ್. ಆಚಾರ್ ಅವರಿಗೆ ‘ಬೆಸ್ಟ್ ಫೀಲ್ಡರ್’ (Best Fielder) ಪದಕವನ್ನು ತೊಡಿಸಿ ಅಭಿನಂದಿಸಿದರು. ಅಂತಾರಾಷ್ಟ್ರೀಯ ಮಟ್ಟದ ಆಟಗಾರನಿಂದ ಈ ಗೌರವ ಪಡೆದದ್ದು ಶ್ರೀಶಾ ಅವರ ಕ್ರೀಡಾ ಜೀವನದ ಅತ್ಯಂತ ಸ್ಮರಣೀಯ ಕ್ಷಣವಾಯಿತು.

ತೆಕ್ಕಟ್ಟೆಯಿಂದ ಅಹ್ಮದಾಬಾದ್‌ವರೆಗೆ…
ಶ್ರೀಶಾ ಎಸ್. ಆಚಾರ್ ಮೂಲತಃ ಉಡುಪಿ ಜಿಲ್ಲೆಯ ತೆಕ್ಕಟ್ಟೆಯವರು. ಸ್ಥಳೀಯ ಕ್ರಿಕೆಟ್‌ನಿಂದ ಆರಂಭಿಸಿ, ಮಹಾರಾಜ ಟಿ20 ಟ್ರೋಫಿಯಲ್ಲಿ ತೋರಿದ ಅಮೋಘ ಪ್ರದರ್ಶನ ಇವರನ್ನು ಕರ್ನಾಟಕ ರಾಜ್ಯ ತಂಡದ ಬಾಗಿಲು ತಟ್ಟುವಂತೆ ಮಾಡಿತ್ತು. ಇದೀಗ ಬಿಸಿಸಿಐನ ಪ್ರತಿಷ್ಠಿತ ಏಕದಿನ ಟೂರ್ನಿಯಲ್ಲಿ ರಾಜ್ಯವನ್ನು ಪ್ರತಿನಿಧಿಸುತ್ತಿರುವುದು ಜಿಲ್ಲೆಯ ಕ್ರಿಕೆಟ್ ಅಭಿಮಾನಿಗಳಲ್ಲಿ ಹರ್ಷ ತಂದಿದೆ.

ಶ್ರೀಶ ಎಸ್. ಆಚಾರ್ ರಾಜ್ಯ ತಂಡಕ್ಕೆ ಏರಿರುವುದು ದೇಶೀಯ ಕ್ರಿಕೆಟ್‌ನಲ್ಲಿ ಅವರ ಸ್ಥಿರತೆಗೆ ಸಾಕ್ಷಿಯಾಗಿದೆ. ಮಹಾರಾಜ ಟಿ20 ಟ್ರೋಫಿಯಲ್ಲಿ ಹುಬ್ಬಳ್ಳಿ ಟೈಗರ್ಸ್ ಮತ್ತು ಮೈಸೂರು ವಾರಿಯರ್ಸ್ ಪರ ಅತ್ಯುತ್ತಮ ಪ್ರದರ್ಶನ ನೀಡಿದ ಶ್ರೀಶ, ಬೆಂಗಳೂರು ಲೀಗ್ ಸರ್ಕ್ಯೂಟ್‌ಗಳಲ್ಲಿ ಅತಿ ಹೆಚ್ಚು ವಿಕೆಟ್ ಪಡೆದವರಲ್ಲಿ ಒಬ್ಬರಾಗಿದ್ದಾರೆ. ಉಡುಪಿಯ ತೆಕ್ಕಟ್ಟೆ ಎಂಬ ಸಣ್ಣ ಪಟ್ಟಣದಿಂದ ಬಂದ ಅವರ ಗ್ರಾಮೀಣ ಪ್ರದೇಶದಿಂದ ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣ ಸಂಕೀರ್ಣದವರೆಗಿನ ಪ್ರಯಾಣವು ಕರಾವಳಿ ಪ್ರದೇಶದಾದ್ಯಂತದ ಮಹತ್ವಾಕಾಂಕ್ಷಿ ಕ್ರಿಕೆಟಿಗರಿಗೆ ಸ್ಫೂರ್ತಿಯಾಗಿದೆ .

“ಗ್ರಾಮೀಣ ಮಟ್ಟದ ಪ್ರತಿಭೆಗಳು ಕಠಿಣ ಪರಿಶ್ರಮಪಟ್ಟರೆ ದೊಡ್ಡ ಮಟ್ಟಕ್ಕೆ ಬೆಳೆಯಬಹುದು ಎಂಬುದಕ್ಕೆ ಶ್ರೀಶಾ ಆಚಾರ್ ಅವರ ಈ ಪಾದಾರ್ಪಣೆ ಸಾಕ್ಷಿ.”

ಈ ಅದ್ಭುತ ಸಾಧನೆಗಾಗಿ ಶ್ರೀಶಾ ಎಸ್.ಆಚಾರ್ ಅವರಿಗೆ ಅವರ ಊರಾದ ತೆಕ್ಕಟ್ಟೆ ಹಾಗೂ ಇಡೀ ಉಡುಪಿ ಜಿಲ್ಲೆಯ ಪರವಾಗಿ ಅಭಿನಂದನೆಗಳ ಮಹಾಪೂರವೇ ಹರಿದು ಬರುತ್ತಿದೆ.

The post ಕುಂದಾಪುರದಿಂದಅಹಮದಾಬಾದ್ ಗೆ: ವಿಜಯ್ ಹಜಾರೆ ಟ್ರೋಫಿಯಲ್ಲಿ ಕರ್ನಾಟಕ ಪರ ಶ್ರೀಶ ಎಸ್.ಆಚಾರ್ ಪಾದಾರ್ಪಣೆ! appeared first on SportsKannada ಸ್ಪೋರ್ಟ್ಸ್ ಕನ್ನಡ.

ವಿಜಯ ಹಜಾರೆ ಟ್ರೋಫಿ 2025–26: ಕರ್ನಾಟಕ ತಂಡಕ್ಕೆ ಶ್ರೀಶ ಆಚಾರ್ – ಕರಾವಳಿ ಕ್ರಿಕೆಟ್‌ಗೆ ಹೆಮ್ಮೆ

ಬೆಂಗಳೂರು: ದೇಶದ ಪ್ರಮುಖ ಏಕದಿನ ಕ್ರಿಕೆಟ್ ಟೂರ್ನಿಯಾಗಿರುವ ಬಿಸಿಸಿಐ ವಿಜಯ ಹಜಾರೆ ಟ್ರೋಫಿ 2025–26 ಗೆ ಕರ್ನಾಟಕ ರಾಜ್ಯ ತಂಡವನ್ನು ಪ್ರಕಟಿಸಲಾಗಿದ್ದು, ಪ್ರತಿಭಾವಂತ ಸ್ಪಿನ್ ಬೌಲರ್ ಶ್ರೀಶ ಆಚಾರ್ ಅವರು ಆಯ್ಕೆಯಾಗಿರುವುದು ಕರಾವಳಿ ಹಾಗೂ ರಾಜ್ಯದ ಕ್ರಿಕೆಟ್ ವಲಯದಲ್ಲಿ ಸಂತಸ ಮೂಡಿಸಿದೆ.

ಕಠಿಣ ಪರಿಶ್ರಮ, ಶಿಸ್ತುಬದ್ಧ ಅಭ್ಯಾಸ ಹಾಗೂ ನಿರಂತರ ಉತ್ತಮ ಪ್ರದರ್ಶನದ ಫಲವಾಗಿ ಶ್ರೀಶ ಆಚಾರ್ ಗೆ ಈ ಮಹತ್ವದ ಅವಕಾಶ ಲಭಿಸಿದೆ. ರಾಜ್ಯ ಮಟ್ಟದ ಹಾಗೂ ವಿವಿಧ ಟೂರ್ನಿಗಳಲ್ಲಿ ತೋರಿದ ಗಮನಾರ್ಹ ಪ್ರದರ್ಶನವು ಆಯ್ಕೆ ಸಮಿತಿಯ ಗಮನ ಸೆಳೆದಿದ್ದು, ಇದೀಗ ಕರ್ನಾಟಕ ತಂಡದ ಜೆರ್ಸಿ ಧರಿಸಿ ರಾಷ್ಟ್ರೀಯ ಮಟ್ಟದ ವೇದಿಕೆಯಲ್ಲಿ ತಮ್ಮ ಪ್ರತಿಭೆ ಪ್ರದರ್ಶಿಸಲು ಸಿದ್ಧರಾಗಿದ್ದಾರೆ.

ಕರ್ನಾಟಕ ತಂಡಕ್ಕೆ ಮಯಂಕ್ ಅಗರವಾಲ್ ನಾಯಕತ್ವ ವಹಿಸಿಕೊಂಡಿದ್ದು, ದೇವದತ್ತ ಪಡಿಕಲ್, ಕರೂಣ್ ನಾಯರ್, ಕೆ.ಎಲ್. ರಾಹುಲ್, ಪ್ರಸಿದ್ಧ ಕೃಷ್ಣ ಸೇರಿದಂತೆ ಅನುಭವಿ ಹಾಗೂ ಯುವ ಆಟಗಾರರ ಸಮತೋಲನದ ತಂಡ ರೂಪುಗೊಂಡಿದೆ. ಇಂತಹ ಬಲಿಷ್ಠ ತಂಡದಲ್ಲಿ ಶ್ರೀಶ ಆಚಾರ್ ರ ಸೇರ್ಪಡೆ ಬೌಲಿಂಗ್ ವಿಭಾಗಕ್ಕೆ ಇನ್ನಷ್ಟು ಬಲ ತುಂಬಲಿದೆ.

ಶ್ರೀಶ ಆಚಾರ್ ರ ಆಯ್ಕೆಗೆ ಅವರ ಕುಟುಂಬಸ್ಥರು, ಕೋಚ್‌ಗಳು, ಸ್ನೇಹಿತರು ಹಾಗೂ ಕ್ರಿಕೆಟ್ ಅಭಿಮಾನಿಗಳು ಹರ್ಷ ವ್ಯಕ್ತಪಡಿಸಿದ್ದು, ಮುಂದಿನ ಪಂದ್ಯಗಳಲ್ಲಿ ಅವರು ಕರ್ನಾಟಕ ತಂಡಕ್ಕೆ ಮಹತ್ವದ ಕೊಡುಗೆ ನೀಡುವ ವಿಶ್ವಾಸವಿದೆ.

ರಾಜ್ಯದ ಕ್ರಿಕೆಟ್ ಕ್ಷೇತ್ರಕ್ಕೆ ಇದು ಹೆಮ್ಮೆಯ ಕ್ಷಣವಾಗಿದ್ದು, ಶ್ರೀಶ ಆಚಾರ್  ಅವರ ಅವರ ಮುಂದಿನ ಪಯಣಕ್ಕೆ ಎಲ್ಲೆಡೆಯಿಂದ ಶುಭಾಶಯಗಳ ಮಹಾಪೂರ ಹರಿದು ಬರುತ್ತಿದೆ.

The post ವಿಜಯ ಹಜಾರೆ ಟ್ರೋಫಿ 2025–26: ಕರ್ನಾಟಕ ತಂಡಕ್ಕೆ ಶ್ರೀಶ ಆಚಾರ್ ಆಯ್ಕೆ – ಕರಾವಳಿ ಕ್ರಿಕೆಟ್‌ಗೆ ಹೆಮ್ಮೆ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ರಣಜಿ ಟ್ರೋಫಿ 2025–26: ಕರೂಣ್ ನಾಯರ್ ಡಬಲ್ ಸೆಂಚುರಿಯಿಂದ ಕೇರಳ ವಿರುದ್ಧ ಕಣ್ಮನ ಸೆಳೆದ ಪ್ರದರ್ಶನ

ಕರ್ನಾಟಕದ ಪ್ರತಿಭಾವಂತ ಬ್ಯಾಟರ್ ಕರೂಣ್ ನಾಯರ್ ತಮ್ಮ ಅದ್ಭುತ ಫಾರ್ಮ್ ಮುಂದುವರಿಸುತ್ತಾ 2025–26 ರಣಜಿ ಟ್ರೋಫಿಯಲ್ಲಿ ಮತ್ತೊಮ್ಮೆ ರನ್‌ಗಳ ಮಳೆ ಸುರಿಸಿದ್ದಾರೆ. ಕೇರಳ ವಿರುದ್ಧ ನಡೆದ ಪಂದ್ಯದಲ್ಲಿ ಅವರು 233 ರನ್‌ಗಳ ಭರ್ಜರಿ ಡಬಲ್ ಸೆಂಚುರಿ ಬಾರಿಸಿ, ಹಿಂದಿನ ಸುತ್ತಿನಲ್ಲಿ ಗೋವಾದ ವಿರುದ್ಧ ಸಿಡಿಸಿದ ಅಜೇಯ 174 ರನ್‌ಗಳ ಶತಕದ ನಂತರ ತಮ್ಮ ಎರಡನೇ ನಿರಂತರ ಶತಕ ದಾಖಲಿಸಿದ್ದಾರೆ.

ಕೇರಳ ವಿರುದ್ಧದ ಪಂದ್ಯ (ನವೆಂಬರ್ 2, 2025)

ಕರ್ನಾಟಕವು ಕೇವಲ 13ಕ್ಕೆ 2 ವಿಕೆಟ್‌ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ ಕರೂಣ್ ನಾಯರ್ ಕ್ರೀಸ್‌ಗೆ ಬಂದರು. ಅವರು ಮೊದಲಿಗೆ ಕೆ.ಎಲ್. ಶ್ರಿಜಿತ್ (65) ಜೊತೆಗೂಡಿ 123 ರನ್‌ಗಳ ಪಾಲುದಾರಿಕೆ ನಿರ್ಮಿಸಿ ತಂಡವನ್ನು ಸ್ಥಿರಗೊಳಿಸಿದರು. ನಂತರ ರವಿಚಂದ್ರನ್ ಸ್ಮರಣ್ ಜೊತೆ ಸೇರಿ ನಾಲ್ಕನೇ ವಿಕೆಟ್‌ಗೆ 343 ರನ್‌ಗಳ ಭಾರೀ ಜೊತೆಯಾಟ ನಡೆಸಿ ಕರ್ನಾಟಕವನ್ನು 500 ರನ್‌ಗಳ ಪಾರಮ್ಯ ದಾಟಿಸಿದರು.

ನಾಯರ್ ಮೊದಲ ದಿನವೇ ಶತಕ ತಲುಪಿ, ಎರಡನೇ ದಿನ ಅದನ್ನು ಡಬಲ್ ಸೆಂಚುರಿಯಾಗಿ ಪರಿವರ್ತಿಸಿದರು. ಅವರು 389 ಎಸೆತಗಳಲ್ಲಿ 233 ರನ್‌ಗಳನ್ನು ಬಾರಿಸಿದರು.

ಈ ಇನಿಂಗ್ಸ್‌ನಲ್ಲಿ ಕರೂಣ್ ನಾಯರ್ ಫಸ್ಟ್ ಕ್ಲಾಸ್ ಕ್ರಿಕೆಟ್‌ನಲ್ಲಿ 9,000 ರನ್‌ಗಳ ಮೈಲಿಗಲ್ಲು ದಾಟಿ, ಈ ಸಾಧನೆ ಮಾಡಿದ ಆರನೇ ಕರ್ನಾಟಕ ಬ್ಯಾಟರ್‌ ಆಗಿ ಗುರುತಿಸಿಕೊಂಡರು.

ಗೋವಾ ವಿರುದ್ಧದ ಶತಕ (ಅಕ್ಟೋಬರ್ 26, 2025)

ಸೀಸನ್‌ನ ಮೊದಲ ಶತಕವನ್ನು ನಾಯರ್ ಗೋವಾ ವಿರುದ್ಧ ದಾಖಲಿಸಿದ್ದರು. ಅಂದಿನ ಪಂದ್ಯದಲ್ಲಿ ಕರ್ನಾಟಕವು 65ಕ್ಕೆ 4 ವಿಕೆಟ್‌ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ ನಾಯರ್ ಅಜೇಯ 174 ರನ್‌ ಬಾರಿಸಿ ತಂಡವನ್ನು 371 ರನ್‌ಗಳ ಒಟ್ಟಾರೆ ಮೊತ್ತದವರೆಗೆ ಕೊಂಡೊಯ್ದಿದ್ದರು.

ಸೀಸನ್‌ನ ಫಾರ್ಮ್

ಈ ಸೀಸನ್ ಆರಂಭದಲ್ಲೇ ನಾಯರ್ ಸೌರಾಷ್ಟ್ರ ವಿರುದ್ಧ 73 ರನ್‌ ಬಾರಿಸಿ ತಮ್ಮ ಲಯ ಪ್ರದರ್ಶಿಸಿದ್ದರು. ಇಂಗ್ಲೆಂಡ್‌ ಪ್ರವಾಸದಲ್ಲಿ ನಿರೀಕ್ಷಿತ ಪ್ರದರ್ಶನ ನೀಡದ ಹಿನ್ನೆಲೆಯಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್‌ ಸರಣಿಗೆ ಆಯ್ಕೆಯಾಗದಿದ್ದ ಅವರು, ಇದೀಗ ದೇಶೀಯ ಕ್ರಿಕೆಟ್‌ನಲ್ಲಿ ಅದ್ಭುತ ಪ್ರದರ್ಶನದ ಮೂಲಕ ಟೀಮ್ ಇಂಡಿಯಾ ಟೆಸ್ಟ್‌ ತಂಡಕ್ಕೆ ಮರುಆಹ್ವಾನಕ್ಕೆ ತಕ್ಕ ರೀತಿ ಬಲವಾದ ದಾವೆ ಮಂಡಿಸಿದ್ದಾರೆ.

ಬ್ಯಾಟ್‌ನಿಂದ ಮೌನವಾಗಿ ಮಾತನಾಡುವ ಕರೂಣ್ ನಾಯರ್, ಮತ್ತೆ “ಟೆಸ್ಟ್ ಕ್ರಿಕೆಟ್‌ಗೆ ತಕ್ಕ ತಾಕತ್ತು ನನಗಿದೆ” ಎಂದು ಸಾಬೀತುಪಡಿಸಿದ್ದಾರೆ.

The post ರಣಜಿ ಟ್ರೋಫಿ 2025–26: ಕರೂಣ್ ನಾಯರ್ ಡಬಲ್ ಸೆಂಚುರಿಯಿಂದ ಕೇರಳ ವಿರುದ್ಧ ಕಣ್ಮನ ಸೆಳೆದ ಪ್ರದರ್ಶನ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ರಣಜಿ ಟ್ರೋಫಿ ಕ್ರಿಕೆಟ್ ಪಂದ್ಯ : ಕರ್ನಾಟಕ vs ಗೋವಾ

ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆಯ ಆಶ್ರಯದಲ್ಲಿ ನಡೆಯಲಿರುವ ರಣಜಿ ಟ್ರೋಫಿ ಕ್ರಿಕೆಟ್ ಪಂದ್ಯದಲ್ಲಿ, ಬಲಿಷ್ಠ ಕರ್ನಾಟಕ ತಂಡವು ಗೋವಾ ವಿರುದ್ಧ ಪೈಪೋಟಿಗೆ ಸಜ್ಜಾಗಿದೆ. ಪಂದ್ಯವು ಅಕ್ಟೋಬರ್ 25ರಿಂದ 28ರವರೆಗೆ ನಡೆಯಲಿದ್ದು, ಬೆಳಗ್ಗೆ 9.30ರಿಂದ ಸಂಜೆ 4.30ರವರೆಗೆ ಕದನ ಸಾಗಲಿದೆ.

ಈ ಪಂದ್ಯವನ್ನು ಶಿವಮೊಗ್ಗದ ಕೆ.ಎಸ್.ಸಿ.ಎ. ನವಲೆ ಕ್ರೀಡಾಂಗಣದಲ್ಲಿ ಆಯೋಜಿಸಲಾಗಿದೆ. ಕರ್ನಾಟಕ ತಂಡವು ಅನುಭವಿಗಳಾದ ಮತ್ತು ಯುವ ಪ್ರತಿಭೆಗಳ ಸಮನ್ವಯದ ಬಲಿಷ್ಠ ಘಟಕವಾಗಿದ್ದು, ಈ ಬಾರಿ ಜಯದ ಹಂಬಲದಲ್ಲಿದೆ. ಗೋವಾ ತಂಡವು ಕೂಡ ತನ್ನ ಶ್ರೇಷ್ಠ ಪ್ರದರ್ಶನದ ಮೂಲಕ ತೀವ್ರ ಸ್ಪರ್ಧೆ ನೀಡಲಿದೆ ಎಂಬ ನಿರೀಕ್ಷೆ ಇದೆ.

(ಗೋವಾ ರಣಜಿ ತಂಡ ಶಿವಮೊಗ್ಗಕ್ಕೆ)

ಶಿವಮೊಗ್ಗ ಜಿಲ್ಲಾ ಕ್ರಿಕೆಟ್ ಸಂಸ್ಥೆಯ ಆತಿಥ್ಯದಲ್ಲಿ ನಡೆಯುವ ಈ ಪೈಪೋಟಿಯನ್ನು ಕ್ರಿಕೆಟ್ ಅಭಿಮಾನಿಗಳು ವೀಕ್ಷಿಸಲು ಆಹ್ವಾನಿತರಾಗಿದ್ದಾರೆ. ಪ್ರವೇಶ ಉಚಿತವಾಗಿದ್ದು, ರಾಜ್ಯದ ಕ್ರೀಡಾ ಪ್ರೇಮಿಗಳಿಗೆ ಸ್ಥಳೀಯ ತಾರೆಗಳ ಪ್ರದರ್ಶನವನ್ನು ನೇರವಾಗಿ ವೀಕ್ಷಿಸುವ ಅಪರೂಪದ ಅವಕಾಶ ಒದಗಿದೆ.

(KSCA ಶಿವಮೊಗ್ಗ ವಲಯದಿಂದ ಹರ್ಷಚಿತ್ತದಿಂದ ಸ್ವಾಗತ)

ರಾಜ್ಯದ ಪ್ರಮುಖ ಆಟಗಾರರು ಈ ಪಂದ್ಯದಲ್ಲಿ ಭಾಗವಹಿಸಲಿದ್ದು, ಕ್ರೀಡಾ ಅಭಿಮಾನಿಗಳಿಗೆ ರಣಜಿ ಟ್ರೋಫಿ ಸ್ಪರ್ಧೆಯ ಉತ್ಸಾಹಭರಿತ ವಾತಾವರಣವನ್ನು ಅನುಭವಿಸಲು ಇದು ಉತ್ತಮ ಅವಕಾಶವಾಗಿದೆ.

ರಣಜಿ ಟ್ರೋಫಿ ಸೀಸನ್‌ನ ಈ ಪ್ರಮುಖ ಪಂದ್ಯವು ಎರಡೂ ತಂಡಗಳಿಗೂ ಕೀರ್ತಿಯನ್ನು ತರುವಂತಹ ವೇದಿಕೆ ಆಗಲಿದೆ.

The post ರಣಜಿ ಟ್ರೋಫಿ ಕ್ರಿಕೆಟ್ ಪಂದ್ಯ : ಕರ್ನಾಟಕ vs ಗೋವಾ appeared first on SportsKannada ಸ್ಪೋರ್ಟ್ಸ್ ಕನ್ನಡ.

 ಶಿವಮೊಗ್ಗದಲ್ಲಿ ರಣಜಿ ಟ್ರೋಫಿ ಕಾದಾಟ: ಕರ್ನಾಟಕ ವಿರುದ್ಧ ಗೋವಾ

By: Suresh Bhat | ಮುಲ್ಕಿ

ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಘ (KSCA) ಶಿವಮೊಗ್ಗ ವಲಯದ ಆಶ್ರಯದಲ್ಲಿ ಬಿಸಿಸಿಐ ಎಲೈಟ್ ‘ಬಿ’ ಗ್ರೂಪ್ ರಣಜಿ ಟ್ರೋಫಿ 2025–26 ಕ್ರಿಕೆಟ್ ಪಂದ್ಯಾವಳಿ ಅಕ್ಟೋಬರ್ 25ರಿಂದ 28ರವರೆಗೆ ಶಿವಮೊಗ್ಗದ ಕೆಎಸ್‌ಸಿಎ ನಾವುಲೆ ಸ್ಟೇಡಿಯಂನಲ್ಲಿ ನಡೆಯಲಿದೆ.

ಈ ನಾಲ್ಕು ದಿನಗಳ ಪಂದ್ಯದಲ್ಲಿ ಕರ್ನಾಟಕ ಮತ್ತು ಗೋವಾ ತಂಡಗಳು ಕಾದಾಡಲಿದ್ದು, ಪ್ರತಿದಿನ ಬೆಳಿಗ್ಗೆ 9.30ರಿಂದ ಸಂಜೆ 4.30ರವರೆಗೆ ಪಂದ್ಯಾವಳಿ ನಡೆಯಲಿದೆ. ರಾಜ್ಯದ ಕ್ರಿಕೆಟ್ ಅಭಿಮಾನಿಗಳಿಗೆ ತಮ್ಮ ನೆಚ್ಚಿನ ಆಟಗಾರರನ್ನು ನೇರವಾಗಿ ಮೈದಾನದಲ್ಲಿ ನೋಡುವ ಅದ್ಭುತ ಅವಕಾಶ ಇದು.

ಈ ಕ್ರೀಡಾ ಕಾರ್ಯಕ್ರಮಕ್ಕೆ ಪ್ರಮುಖ ಅತಿಥಿಗಳಾಗಿ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಹಾಗೂ ಸಕಾಲ ಯೋಜನೆಯ ಸಚಿವರು ಮತ್ತು ಶಿವಮೊಗ್ಗ ಜಿಲ್ಲಾ ಉಸ್ತುವಾರಿ ಸಚಿವರಾದ ಶ್ರೀ ಮಧು ಬಂಗಾರಪ್ಪ, ಶಿವಮೊಗ್ಗ ಲೋಕಸಭಾ ಸದಸ್ಯ ಶ್ರೀ ಬಿ. ವೈ. ರಾಘವೇಂದ್ರ, ಶಿವಮೊಗ್ಗ ವಿಧಾನಸಭಾ ಸದಸ್ಯ ಶ್ರೀ ಎಸ್. ಎನ್. ಚನ್ನಬಸಪ್ಪ, ವಿಧಾನ ಪರಿಷತ್ ಸದಸ್ಯ ಶ್ರೀ ಡಿ. ಎಸ್. ಅರುಣ, ದಕ್ಷಿಣ ಪಶ್ಚಿಮ ಪದವೀಧರ ಕ್ಷೇತ್ರದ ವಿಧಾನ ಪರಿಷತ್ ಸದಸ್ಯ ಡಾ. ಧನಂಜಯ ಸರ್ಜೀ, ಬಿಸಿಸಿಐ ಖಜಾಂಚಿ ಹಾಗೂ ಮಾಜಿ ಕೆಎಸ್‌ಸಿಎ ಅಧ್ಯಕ್ಷ ಶ್ರೀ ಎ. ರಘುರಾಮ ಭಟ್, ಮತ್ತು ಕೆಎಸ್‌ಸಿಎ ಬೆಂಗಳೂರು ವಲಯ ಸಂಯೋಜಕ ಹಾಗೂ ಎಂ.ಸಿ. ಸದಸ್ಯ ಶ್ರೀ ಕೆ. ವಿ. ಮಂಜುನಾಥ್ ರಾಜು ಉಪಸ್ಥಿತರಿರಲಿದ್ದಾರೆ.

ಈ ಪಂದ್ಯಾವಳಿಯನ್ನು ಶ್ರೀ ಎನ್. ರಾಜೇಂದ್ರ ಕಾಮತ್ (ವಲಯ ಅಧ್ಯಕ್ಷ, ಕೆಎಸ್‌ಸಿಎ ಶಿವಮೊಗ್ಗ) ಹಾಗೂ ಶ್ರೀ ಎಚ್. ಎಸ್. ಸದಾನಂದ (ವಲಯ ಸಂಯೋಜಕ, ಕೆಎಸ್‌ಸಿಎ ಶಿವಮೊಗ್ಗ) ಅವರ ಮಾರ್ಗದರ್ಶನದಲ್ಲಿ ಆಯೋಜಿಸಲಾಗಿದೆ.

ಕ್ರಿಕೆಟ್ ಪ್ರೇಮಿಗಳು ಹಾಗೂ ಸಾರ್ವಜನಿಕರನ್ನು ಈ ಕ್ರೀಡಾ ಉತ್ಸವಕ್ಕೆ ಆತ್ಮೀಯವಾಗಿ ಆಹ್ವಾನಿಸಲಾಗಿದೆ.

—

The post ಶಿವಮೊಗ್ಗದಲ್ಲಿ ರಣಜಿ ಟ್ರೋಫಿ ಕಾದಾಟ: ಕರ್ನಾಟಕ ವಿರುದ್ಧ ಗೋವಾ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ರಣಜಿ ಟ್ರೋಫಿ: ಶ್ರೇಯಸ್ ಗೋಪಾಲ್‌ಗೆ 8 ವಿಕೆಟ್.. ಶಿಖರ್ ಶೆಟ್ಟಿಗೆ ಚೊಚ್ಚಲ ರಣಜಿ ವಿಕೆಟ್ ಸಂಭ್ರಮ

ಕುಂದಾಪುರದ ಹುಡುಗ ಶಿಖರ್ ಶೆಟ್ಟಿ ರಣಜಿ ವೃತ್ತಿಜೀವನದಲ್ಲಿ ಚೊಚ್ಚಲ ವಿಕೆಟ್ ಬೇಟೆಯಾಡಿದ್ದಾರೆ. ರಾಜ್’ಕೋಟ್’ನಲ್ಲಿ ನಡೆಯುತ್ತಿರುವ ಸೌರಾಷ್ಟ್ರ ವಿರುದ್ಧದ ರಣಜಿ ಪಂದ್ಯದ ಮೂರನೇ ದಿನ ಸೌರಾಷ್ಟ್ರ ತಂಡದ ನಾಯಕ ಜೈದೇವ್ ಉನಾದ್ಕಟ್ ಅವರನ್ನು ಕ್ಲೀನ್ ಬೌಲ್ಡ್ ಮಾಡಿದ ಶಿಖರ್ ಶೆಟ್ಟಿ ಪ್ರಥಮದರ್ಜೆ ಕ್ರಿಕೆಟ್’ನಲ್ಲಿ ಮೊದಲ ವಿಕೆಟ್ ತಮ್ಮದಾಗಿಸಿಕೊಂಡರು.

ಪಂದ್ಯದ 2ನೇ ದಿನ ಬ್ಯಾಟಿಂಗ್’ನಲ್ಲಿ ಮಿಂಚಿದ್ದ ಶಿಖರ್ ಶೆಟ್ಟಿ 9ನೇ ಕ್ರಮಾಂಕದಲ್ಲಿ ಕ್ರೀಸ್’ಗಿಳಿದು 57 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 3 ಸಿಕ್ಸರ್’ಗಳ ನೆರವಿನಿಂದ 41 ರನ್ ಗಳಿಸಿ ಚೊಚ್ಚಲ ರಣಜಿ ಪಂದ್ಯವನ್ನೇ ಸ್ಮರಣೀಯವಾಗಿಸಿಕೊಂಡಿದ್ದಾರೆ. ಕರ್ನಾಟಕ ಪರ ಅನುಭವಿ ಲೆಗ್ ಸ್ಪಿನ್ ಆಲ್ರೌಂಡರ್ ಶ್ರೇಯಸ್ ಗೋಪಾಲ್ 110 ರನ್ನಿಗೆ 8 ವಿಕೆಟ್ ಪಡೆದು ಮಿಂಚಿದರು.

ಕರ್ನಾಟಕದ 373 ರನ್’ಗಳಿಗೆ ಪ್ರತಿಯಾಗಿ 4 ವಿಕೆಟ್ ನಷ್ಟಕ್ಕೆ 200 ರನ್ ಗಳಿಂದ 3ನೇ ದಿನದಾಟ ಮುಂದುವರಿಸಿದ ಸೌರಾಷ್ಟ್ರ ಶ್ರೇಯಸ್ ಗೋಪಾಲ್ ದಾಳಿಗೆ ತತ್ತರಿಸಿ 376 ರನ್’ಗಳಿಗೆ ಆಲೌಟಾಗಿ ಕೇವಲ 4 ರನ್’ಗಳ ಇನ್ನಿಂಗ್ಸ್ ಮುನ್ನಡೆ ಸಂಪಾದಿಸಿತು. 342 ರನ್ನಿಗೆ 9 ವಿಕೆಟ್ ಕಳೆದುಕೊಂಡಿದ್ದ ಸೌರಾಷ್ಟ್ರಕ್ಕೆ ಚೇತನ್ ಸಕಾರಿಯಾ ಮತ್ತು ಯುವಾರಾಜ್ ಸಿನ್ಹ್ ದೋಡಿಯಾ 10ನೇ ವಿಕೆಟ್’ಗೆ 34 ರನ್ ಸೇರಿಸಿ ಇನ್ನಿಂಗ್ಸ್ ಮುನ್ನಡೆ ತಂದುಕೊಟ್ಟರು.

4 ರನ್’ಗಳ ಇನ್ನಿಂಗ್ಸ್ ಹಿನ್ನಡೆಯೊಂದಿಗೆ ದ್ವಿತೀಯ ಸರದಿ ಆರಂಭಿಸಿರುವ ಕರ್ನಾಟಕ ತಂಡ 3ನೇ ದಿನದಾಟದ ಅಂತ್ಯಕ್ಕೆ 1 ವಿಕೆಟ್ ಕಳೆದುಕೊಂಡು 89 ರನ್ ಗಳಿಸಿದೆ. ಕರ್ನಾಟಕದ ದ್ವಿತೀಯ ಇನ್ನಿಂಗ್ಸ್’ನಲ್ಲಿ ನಿಕಿನ್ ಜೋಸ್ 34 ರನ್ ಗಳಿಸಿ ಔಟಾದರೆ ನಾಯಕ ಮಯಾಂಕ್ ಅಗರ್ವಾಲ್ ಅಜೇಯ 31 ರನ್ ಮತ್ತು ದೇವದತ್ ಪಡಿಕ್ಕಲ್ ಅಜೇಯ 18 ರನ್’ಗಳೊಂದಿಗೆ ಅಂತಿಮ ದಿನಕ್ಕೆ ಕ್ರೀಸ್ ಕಾಯ್ದುಕೊಂಡಿದ್ದಾರೆ.

ಪಂದ್ಯ ಡ್ರಾಗೊಳ್ಳುವ ಸಾಧ್ಯತೆಗಳೇ ಹೆಚ್ಚಿದ್ದು, ಇನ್ನಿಂಗ್ಸ್ ಹಿನ್ನಡೆಯ ಆಧಾರದಲ್ಲಿ ಕರ್ನಾಟಕ ಕೇವಲ 1 ಅಂಕಕ್ಕಷ್ಟೇ ತೃಪ್ತಿ ಪಟ್ಟುಕೊಳ್ಳಬೇಕಿದೆ.

The post ರಣಜಿ ಟ್ರೋಫಿ: ಶ್ರೇಯಸ್ ಗೋಪಾಲ್‌ಗೆ 8 ವಿಕೆಟ್.. ಶಿಖರ್ ಶೆಟ್ಟಿಗೆ ಚೊಚ್ಚಲ ರಣಜಿ ವಿಕೆಟ್ ಸಂಭ್ರಮ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ರಣಜಿ ಪಾದಾರ್ಪಣೆ ಪಂದ್ಯದಲ್ಲೇ ಮಿಂಚಿದ ಕುಂದಾಪುರದ ಶಿಖರ್ ಶೆಟ್ಟಿ

ರಣಜಿ ಟ್ರೋಫಿಗೆ ಪಾದಾರ್ಪಣೆ ಮಾಡಿರುವ ಕುಂದಾಪುರದ ಯುವ ಎಡಗೈ ಸ್ಪಿನ್ನರ್ ಶಿಖರ್ ಶೆಟ್ಟಿ ಆಡಿದ ಚೊಚ್ಚಲ ಪಂದ್ಯದಲ್ಲೇ ಬ್ಯಾಟಿಂಗ್’ನಲ್ಲಿ ಮಿಂಚಿದ್ದಾರೆ.

ಸೌರಾಷ್ಟ್ರ ವಿರುದ್ಧ ರಾಜ್’ಕೋಟ್’ನಲ್ಲಿ ನಡೆಯುತ್ತಿರುವ ಪಂದ್ಯದ 2ನೇ ದಿನ 9ನೇ ಕ್ರಮಾಂಕದಲ್ಲಿ ಕ್ರೀಸ್’ಗಿಳಿದ ಶಿಖರ್ ಶೆಟ್ಟಿ 57 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 3 ಸಿಕ್ಸರ್’ಗಳ ನೆರವಿನಿಂದ 41 ರನ್ ಗಳಿಸಿದರು. 10ನೇ ವಿಕೆಟ್’ಗೆ ಕುಂದಾಪುರದ ಮತ್ತೊಬ್ಬ ಹುಡುಗ ಅಭಿಲಾಷ್ ಶೆಟ್ಟಿ ಜೊತೆ 47 ರನ್’ಗಳ ಜೊತೆಯಾಟವಾಡಿದ ಶಿಖರ್ ಶೆಟ್ಟಿ ಕರ್ನಾಟಕದ ಮೊತ್ತ 370ರ ಗಡಿ ದಾಟಲು ಕಾರಣರಾದರು. ದೇವದತ್ ಪಡಿಕಲ್ 96 ರನ್, ಕರುಣ್ ನಾಯರ್ 73 ರನ್, ಸ್ಮರಣ್ ರವಿಚಂದ್ರನ್ 77 ರನ್, ಶ್ರೇಯಸ್ ಗೋಪಾಲ್ 56 ರನ್ ಮತ್ತು ಶಿಖರ್ ಶೆಟ್ಟಿ ಗಳಿಸಿದ 41 ರನ್’ಗಳ ನೆರವಿನಿಂದ ಕರ್ನಾಟಕ ತಂಡ ತನ್ನ ಪ್ರಥಮ ಇನ್ನಿಂಗ್ಸ್’ನಲ್ಲಿ 373 ರನ್’ಗಳಿಗೆ ಆಲೌಟಾಯಿತು. 

ಇದಕ್ಕೆ ಪ್ರತಿಯಾಗಿ ಆತಿಥೇಯ ಸೌರಾಷ್ಟ್ರ ತಂಡ 2ನೇ ದಿನದಂತ್ಯಕ್ಕೆ ತನ್ನ ಪ್ರಥಮ ಇನ್ನಿಂಗ್ಸ್’ನಲ್ಲಿ 4 ವಿಕೆಟ್ ನಷ್ಟಕ್ಕೆ 200 ರನ್ ಗಳಿಸಿದೆ. 

ಸೌರಾಷ್ಟ್ರ ವಿರುದ್ಧದ ರಣಜಿ ಟ್ರೋಫಿ ಪಂದ್ಯದ ಮೂಲಕ ಪ್ರಥಮದರ್ಜೆ ಕ್ರಿಕೆಟ್’ಗೆ ಪಾದಾರ್ಪಣೆ ಮಾಡಿದ 20 ವರ್ಷದ ಶಿಖರ್ ಶೆಟ್ಟಿ ಎಡಗೈ ಸ್ಪಿನ್ನರ್ ಹಾಗೂ ಬಲಗೈ ಬ್ಯಾಟರ್. ಅಂಡರ್-19 ಟೂರ್ನಿಗಳಲ್ಲಿ ಉತ್ತಮ ಪ್ರದರ್ಶನ ತೋರಿ ಇದೀಗ ಕರ್ನಾಟಕ ಸೀನಿಯರ್ ತಂಡಕ್ಕೆ ಆಯ್ಕೆಯಾಗಿದ್ದಾರೆ. ಆ ಬಾರಿಯ ಮಹಾರಾಜ ಟ್ರೋಫಿ ಟಿ20 ಟೂರ್ನಿಯಲ್ಲಿ ಶಿಖರ್ ಶೆಟ್ಟಿ ಮೈಸೂರು ವಾರಿಯರ್ಸ್ ತಂಡದ ಪರ ಆಡಿದ್ದರು. ಅದಕ್ಕೂ ಮುನ್ನ ಬೆಂಗಳೂರು ಬ್ಲಾಸ್ಟರ್ಸ್ ಮತ್ತು ಹುಬ್ಬಳ್ಳಿ ಟೈಗರ್ಸ್ ತಂಡದಲ್ಲಿದ್ದರು.

ಶಿಖರ್ ಶೆಟ್ಟಿ ಕುಂದಾಪುರದ ಸೌಡ ಗ್ರಾಮದ ರಾಜೇಶ್ ಶೆಟ್ಟಿ ಹಾಗೂ ಮಂಗಳೂರು ಮೂಲದ ವಚನಾ ದಂಪತಿಯ ಪುತ್ರ. ರಾಜೇಶ್ ಶೆಟ್ಟಿ ಬೆಂಗಳೂರಿನಲ್ಲಿ ಕ್ರೀಡಾ ಸಲಕರಣೆಗಳ ಉದ್ಯಮ ನಡೆಸುತ್ತಿದ್ದಾರೆ.

The post ರಣಜಿ ಪಾದಾರ್ಪಣೆ ಪಂದ್ಯದಲ್ಲೇ ಮಿಂಚಿದ ಕುಂದಾಪುರದ ಶಿಖರ್ ಶೆಟ್ಟಿ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ರಣಜಿ ಟ್ರೋಫಿಗೆ ಕುಂದಾಪುರ ಹುಡುಗನ ಪಾದಾರ್ಪಣೆ.. ಕರಾವಳಿ ಮುಕುಟಕ್ಕೆ ಮತ್ತೊಂದು ಗರಿ

ಕರ್ನಾಟಕ ತಂಡದ ಪ್ರಸಕ್ತ ಸಾಲಿನ ರಣಜಿ ಟ್ರೋಫಿ ಅಭಿಯಾನ ಆರಂಭವಾಗಿದ್ದು, ರಾಜ್’ಕೋಟ್’ನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಸೌರಾಷ್ಟ್ರ ವಿರುದ್ಧ ಸೆಣಸುತ್ತಿದೆ. ಟಾಸ್ ಗೆದ್ದಿರುವ ಮಯಾಂಕ್ ಅಗರ್ವಾಲ್ ನಾಯಕತ್ವದ ಕರ್ನಾಟಕ ತಂಡ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದೆ.

ಈ ಪಂದ್ಯದ ಮೂಲಕ ಕುಂದಾಪುರದ ಪ್ರತಿಭಾವಂತ ಎಡಗೈ ಸ್ಪಿನ್ನರ್ ಶಿಖರ್ ಶೆಟ್ಟಿ ರಣಜಿ ಕ್ರಿಕೆಟ್’ಗೆ ಪಾದಾರ್ಪಣೆ ಮಾಡಿದ್ದಾರೆ. 20 ವರ್ಷದ ಶಿಖರ್ ಶೆಟ್ಟಿ ಕರ್ನಾಟಕ ರಾಜ್ಯ ಕ್ರಿಕೆಟ್ ಸಂಸ್ಥೆಯ ಲೀಗ್ ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ತೋರಿದ್ದು, ಈ ದೇಶೀಯ ಕ್ರಿಕೆಟ್ ಟೂರ್ನಿಗೆ ರಾಜ್ಯ ತಂಡಕ್ಕೆ ಆಯ್ಕೆಯಾಗಿದ್ದಾರೆ.

ಸೌರಾಷ್ಟ್ರ ವಿರುದ್ಧದ ಪಂದ್ಯದ ಮೂಲಕ ಪ್ರತಿಷ್ಠಿತ ರಣಜಿ ಟ್ರೋಫಿಗೆ ಪಾದಾರ್ಪಣೆ ಮಾಡುವ ಅವಕಾಶ ಸಿಕ್ಕಿದೆ. ಕಳೆದ ವರ್ಷ ಉಡುಪಿ ಜಿಲ್ಲೆಯ ಕೋಟಾದ ಮೂಡು ಗಿಳಿಯಾರಿನ ಎಡಗೈ ಮಧ್ಯಮ ವೇಗಿ ಅಭಿಲಾಷ್ ಶೆಟ್ಟಿ ರಣಜಿ ಟ್ರೋಫಿಗೆ ಪದಾರ್ಪಣೆ ಮಾಡಿದ್ದರು. ಸೌರಾಷ್ಟ್ರ ವಿರುದ್ಧದ ಪಂದ್ಯದಲ್ಲಿ ಕುಂದಾಪುರದ ಹುಡುಗರಾದ ಅಭಿಲಾಷ್ ಶೆಟ್ಟಿ ಮತ್ತು ಶಿಖರ್ ಶೆಟ್ಟಿ ಕರ್ನಾಟಕದ ಆಡುವ ಬಳಗದಲ್ಲಿ ಸ್ಥಾನ ಪಡೆದಿದ್ದಾರೆ.

20 ವರ್ಷದ ಶಿಖರ್ ಶೆಟ್ಟಿ ಎಡಗೈ ಸ್ಪಿನ್ನರ್ ಹಾಗೂ ಬಲಗೈ ಬ್ಯಾಟರ್. ಅಂಡರ್-19 ಟೂರ್ನಿಗಳಲ್ಲಿ ಉತ್ತಮ ಪ್ರದರ್ಶನ ತೋರಿ ಇದೀಗ ಕರ್ನಾಟಕ ಸೀನಿಯರ್ ತಂಡಕ್ಕೆ ಆಯ್ಕೆಯಾಗಿದ್ದಾರೆ. ಆ ಬಾರಿಯ ಮಹಾರಾಜ ಟ್ರೋಫಿ ಟಿ20 ಟೂರ್ನಿಯಲ್ಲಿ ಶಿಖರ್ ಶೆಟ್ಟಿ ಮೈಸೂರು ವಾರಿಯರ್ಸ್ ತಂಡದ ಪರ ಆಡಿದ್ದರು. ಅದಕ್ಕೂ ಮುನ್ನ ಬೆಂಗಳೂರು ಬ್ಲಾಸ್ಟರ್ಸ್ ಮತ್ತು ಹುಬ್ಬಳ್ಳಿ ಟೈಗರ್ಸ್ ತಂಡದಲ್ಲಿದ್ದರು.

27 ವರ್ಷದ ಪ್ರತಿಭಾವಂತ ಎಡಗೈ ವೇಗದ ಬೌಲರ್ ಅಭಿಲಾಷ್ ಶೆಟ್ಟಿ 2024ರ ನವೆಂಬರ್ 6ರಂದು ಬೆಂಗಳೂರಿನಲ್ಲಿ ನಡೆದ ಬಂಗಾಳ ವಿರುದ್ಧದ ಪಂದ್ಯದ ಮೂಲಕ ರಣಜಿ ಟ್ರೋಫಿಗೆ ಪಾದಾರ್ಪಣೆ ಮಾಡಿದ್ದರು. ಒಟ್ಟು 2 ರಣಜಿ ಪಂದ್ಯಗಳನ್ನಾಡಿರುವ ಅಭಿಲಾಷ್ ಶೆಟ್ಟಿ 7 ವಿಕೆಟ್ ಪಡೆದಿದ್ದಾರೆ. ಕರ್ನಾಟಕ ಪರ 7 ಲಿಸ್ಟ್ ಎ ಪಂದ್ಯಗಳನ್ನು ಆಡಿರುವ ಅಭಿಲಾಷ್ ಶೆಟ್ಟಿ 17 ವಿಕೆಟ್’ಗಳನ್ನು ಪಡೆದಿದ್ದಾರೆ.

The post ರಣಜಿ ಟ್ರೋಫಿಗೆ ಕುಂದಾಪುರ ಹುಡುಗನ ಪಾದಾರ್ಪಣೆ.. ಕರಾವಳಿ ಮುಕುಟಕ್ಕೆ ಮತ್ತೊಂದು ಗರಿ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಕರ್ನಾಟಕ ರಣಜಿ ತಂಡದಲ್ಲಿ ಕುಂದಾಪುರದ ಕುವರ ಶಿಖರ್ ಶೆಟ್ಟಿ

ಅಭಿಲಾಶ್ ಶೆಟ್ಟಿಯವರ ಜೊತೆಗೆ ಆಯ್ಕೆಯಾದ ಕುಂದಾಪುರದ ಮತ್ತೊಂದು ಪ್ರತಿಭೆ

ಕುಂದಾಪುರ, ಅ. 6: ಕರ್ನಾಟಕ ರಣಜಿ ತಂಡದ ಘೋಷಣೆಯೊಂದಿಗೆ ಕುಂದಾಪುರ ಹೊಸ ಇತಿಹಾಸ ಬರೆದಿದೆ. ಅಭಿಲಾಶ್ ಶೆಟ್ಟಿಯವರ ಜೊತೆಗೆ ಕುಂದಾಪುರದ ಪ್ರತಿಭಾವಂತ ಕ್ರಿಕೆಟಿಗ ಶಿಖರ್ ಶೆಟ್ಟಿ ಈ ಬಾರಿಯ ರಣಜಿ ತಂಡಕ್ಕೆ ಆಯ್ಕೆಯಾಗಿದ್ದಾರೆ.

ಕುಂದಾಪುರದಿಂದ ಮೊದಲ ಬಾರಿಗೆ ರಣಜಿ ತಂಡಕ್ಕೆ ಆಯ್ಕೆಯಾಗಿರುವ ಶಿಖರ್ ಶೆಟ್ಟಿ, ರಾಜ್ಯ ಕ್ರಿಕೆಟ್ ವಲಯದಲ್ಲಿ ತನ್ನ ನಿರಂತರ ಸಾಧನೆಯಿಂದಲೇ ಆಯ್ಕೆದಾರರ ಗಮನ ಸೆಳೆದಿದ್ದಾರೆ. ಕಳೆದ ಕೆಲವು ಸೀಸನ್‌ಗಳಲ್ಲಿ ಅವರ ಪ್ರದರ್ಶನ ವಿಶಿಷ್ಟವಾಗಿತ್ತು.

ಕ್ರಿಕೆಟ್ ಕುಟುಂಬದಿಂದ ಬಂದ ಪ್ರತಿಭೆ

ಶಿಖರ್ ಶೆಟ್ಟಿ ಅವರು ಕುಂದಾಪುರದ ರಾಜೇಶ್ ಶೆಟ್ಟಿ ಹಾಗೂ ವಚನಾ ಶೆಟ್ಟಿ ಅವರ ಪುತ್ರರು. ಅವರ ತಂದೆ ರಾಜೇಶ್ ಶೆಟ್ಟಿ ಜನ್ನಾಡಿ ಕರಾವಳಿ ಕುಂದಾಪುರ ತಂಡದ ಪರವಾಗಿ ಅತ್ಯುತ್ತಮ ಬ್ಯಾಟರ್ ಆಗಿ ಗುರುತಿಸಿಕೊಂಡಿದ್ದರು. ಬೆಂಗಳೂರಿನಲ್ಲಿ “HOY ಕ್ರಿಕೆಟರ್ಸ್” ತಂಡವನ್ನು ಸ್ಥಾಪಿಸಿ ಅನೇಕ ಯುವ ಪ್ರತಿಭೆಗಳಿಗೆ ವೇದಿಕೆ ಒದಗಿಸಿದ್ದರು.

ಶಿಖರ್ ಶೆಟ್ಟಿ ಪ್ರಸ್ತುತ ಬೆಂಗಳೂರು ಆಧಾರಿತ ಕ್ರಿಕೆಟ್ ಅಕಾಡೆಮಿಯಲ್ಲಿ ತರಬೇತಿ ಪಡೆಯುತ್ತಿದ್ದು, ರಾಜ್ಯದ ವಿವಿಧ ವಯೋಮಾನದ ಪಂದ್ಯಗಳಲ್ಲಿ ತಮ್ಮ ಎಡಗೈ ಸ್ಪಿನ್ ಬೌಲಿಂಗ್ ಕೌಶಲ್ಯದಿಂದ ಹೆಸರು ಮಾಡುತ್ತಿದ್ದಾರೆ.

ಉತ್ತಮ ಎಡಗೈ ಸ್ಪಿನ್ನರ್ – ನಿಖರ ಲೈನ್ ಮತ್ತು ವೈವಿಧ್ಯಮಯ ಶೈಲಿ

20 ವರ್ಷದ ಶಿಖರ್ ಶೆಟ್ಟಿ ಅಂಡರ್–19, ಅಂಡರ್–21 ಹಾಗೂ ಅಂಡರ್–23 ವಿಭಾಗಗಳಲ್ಲಿ ಕರ್ನಾಟಕವನ್ನು ಪ್ರತಿನಿಧಿಸಿದ್ದಾರೆ. ಅವರ ನಿಖರ ಲೈನ್ ಮತ್ತು ಲೆಂಗ್ತ್ ಹಾಗೂ ವಿಭಿನ್ನ ಬೌಲಿಂಗ್ ಶೈಲಿ ಅವರಿಗೆ ವಿಶೇಷತೆ ನೀಡಿದೆ.

ರಾಜ್ಯ ಮಟ್ಟದ ಸಾಧನೆಗಳು

ಶಿಖರ್ ಶೆಟ್ಟಿ ಅವರು **ಅಂಡರ್–16 ವಿಜಯ್ ಮರ್ಚೆಂಟ್ ಟ್ರೋಫಿ (2019–2020)**ಯಲ್ಲಿ ಕರ್ನಾಟಕವನ್ನು ಪ್ರತಿನಿಧಿಸಿದ್ದು, ಬಳಿಕ ಅಂಡರ್–19 ಕೂಚ್ ಬಹಾರ್ ಟ್ರೋಫಿ (2021–22, 2023–24) ಮತ್ತು **ವಿನೂ ಮಾಂಕಡ್ ಟ್ರೋಫಿ (2023–24)**ಗಳಲ್ಲಿ ರಾಜ್ಯದ ಪರವಾಗಿ ಆಡಿದ್ದಾರೆ. ಪ್ರಸ್ತುತ ಅವರು **ಅಂಡರ್–23 ಕರ್ನಾಟಕ ತಂಡ (2024–2025)**ಕ್ಕೂ ಆಯ್ಕೆಯಾಗಿದ್ದಾರೆ.

ಅವರ ಪ್ರದರ್ಶನ ಕೇವಲ ಆಯ್ಕೆ ಮಟ್ಟದಲ್ಲಿ ಸೀಮಿತವಾಗದೆ, ಹಲವು ಪ್ರಮುಖ ಟೂರ್ನಮೆಂಟ್‌ಗಳಲ್ಲಿ ಅಗ್ರ ಬೌಲರ್ ಆಗಿ ಹೊರಹೊಮ್ಮಿದ್ದಾರೆ. **ಅಂಡರ್–19 ಇಂಟರ್ ಝೋನಲ್ ಟೂರ್ನಮೆಂಟ್ (2023–24)**ನಲ್ಲಿ ಅವರು ಬೆಂಗಳೂರು ಸಿಟಿ 11 ಪರವಾಗಿ ಅತ್ಯಧಿಕ ವಿಕೆಟ್ ಪಡೆದ ಬೌಲರ್, ಹಾಗೂ ತಿಮ್ಮಪ್ಪಯ್ಯ ಸ್ಮಾರಕ ಟೂರ್ನಮೆಂಟ್ನಲ್ಲಿ KSCA ಸೇಕ್ರೆಟರಿ 11 ಪರವಾಗಿ ಕೇವಲ ನಾಲ್ಕು ಪಂದ್ಯಗಳಲ್ಲಿ 24 ವಿಕೆಟ್ ಕಬಳಿಸಿ ಎಲ್ಲರ ಮೆಚ್ಚುಗೆ ಪಡೆದಿದ್ದಾರೆ.

ಅದೇ ರೀತಿ, ವಲ್ಚರ್ಸ್ ಕ್ರಿಕೆಟ್ ಕ್ಲಬ್ ಪರವಾಗಿ ಆಡಿದ ಅಂಡರ್–19 ಇಂಟರ್ ಕ್ಲಬ್ ಟೂರ್ನಮೆಂಟ್‌ನಲ್ಲಿ ಅವರು ತಂಡವನ್ನು ವಿಜೇತರನ್ನಾಗಿ ಮುನ್ನಡೆಸಿ, ತಾವೇ ಅತ್ಯಧಿಕ ವಿಕೆಟ್ ಟೇಕರ್ ಆಗಿ ಗೌರವ ಪಡೆದರು.

ಅವರ ಪ್ರಮುಖ ಸಾಧನೆಗಳಲ್ಲಿ ಒಂದಾದ **BCCI ಆಯೋಜಿಸಿದ್ದ ಅಂಡರ್–19 ಕೂಚ್ ಬಹಾರ್ ಆಲ್ ಇಂಡಿಯಾ ಟ್ರೋಫಿ (2023–24)**ನಲ್ಲಿ ಕರ್ನಾಟಕವನ್ನು ವಿಜಯಶಾಲಿಯಾಗಿ ಮುನ್ನಡೆಸಿದ್ದಾರೆ.

ಹೊಸ ಸೀಸನ್‌ನ (2025–26) ಅದ್ಭುತ ಪ್ರದರ್ಶನ

**ಡಾ. ತಿಮ್ಮಪ್ಪಯ್ಯ ಸ್ಮಾರಕ ಕ್ರಿಕೆಟ್ ಟೂರ್ನಮೆಂಟ್ (2025–26)**ನಲ್ಲಿ ಶಿಖರ್ ಶೆಟ್ಟಿ ಕೇವಲ 3 ಪಂದ್ಯಗಳಲ್ಲಿ 20 ವಿಕೆಟ್ ಕಬಳಿಸುವ ಮೂಲಕ ನಾಲ್ಕನೇ ಅಗ್ರ ವಿಕೆಟ್ ಟೇಕರ್ ಆಗಿ ಹೊರಹೊಮ್ಮಿದರು. ವಿಶೇಷವಾಗಿ ಬರೋಡಾ ವಿರುದ್ಧದ ಪಂದ್ಯದಲ್ಲಿ ಒಂದೇ ಪಂದ್ಯದಲ್ಲಿ 11 ವಿಕೆಟ್ ಕಬಳಿಸಿದ ಅಪರೂಪದ ಸಾಧನೆ ಅವರದ್ದು.

ಇದೇ ವೇಳೆ, **ಅಂಡರ್–23 ಇಂಟರ್ ಝೋನಲ್ ಕ್ರಿಕೆಟ್ ಟೂರ್ನಮೆಂಟ್ (2025–26)**ನಲ್ಲಿ ಅವರು ಎರಡನೇ ಅಗ್ರ ವಿಕೆಟ್ ಟೇಕರ್ ಆಗಿ ಮೆರೆದಿದ್ದಾರೆ.

ಮೈಸೂರು ವಾರಿಯರ್ಸ್ ಪರವಾಗಿ T20 ಲೀಗ್‌ನಲ್ಲಿ ಮೆರೆದ ಪ್ರತಿಭೆ

ಶಿಖರ್ ಶೆಟ್ಟಿ ಈ ವರ್ಷ ಮೈಸೂರು ವಾರಿಯರ್ಸ್ ಪರವಾಗಿ **ಮಹಾರಾಜಾ T20 ಕಪ್ (2025–26)**ನಲ್ಲಿ ತಮ್ಮ ಪ್ರತಿನಿಧಿಯನ್ನು ನೀಡಿದ್ದಾರೆ. ಅವರ ಬೌಲಿಂಗ್ ಪ್ರದರ್ಶನದಿಂದ ಮೈಸೂರು ವಾರಿಯರ್ಸ್ ತಂಡಕ್ಕೆ ಪ್ರಮುಖ ಶಕ್ತಿ ದೊರಕಿತು.

ಭವಿಷ್ಯದ ಸ್ಟಾರ್

ತನ್ನ ಶ್ರಮ, ನಿಷ್ಠೆ ಮತ್ತು ನಿರಂತರ ಸಾಧನೆಯಿಂದ ರಾಜ್ಯದ ವಿವಿಧ ಮಟ್ಟದ ಕ್ರಿಕೆಟ್‌ನಲ್ಲಿ ಶಾಶ್ವತ ಸ್ಥಾನ ನಿರ್ಮಿಸಿಕೊಂಡಿರುವ ಶಿಖರ್ ಶೆಟ್ಟಿ, ಭವಿಷ್ಯದಲ್ಲಿ ಕರ್ನಾಟಕದ ಹಿರಿಯ ತಂಡದ ಪ್ರಮುಖ ಸ್ಪಿನ್ನರ್ ಆಗಿ ರಾಷ್ಟ್ರ ಮಟ್ಟದಲ್ಲಿ ಸ್ಟಾರ್ ಆಗಿ ಮೆರೆಯುವ ಸಾಧ್ಯತೆ ಇದೆ.

ಈ ಸಾಧನೆಗೆ “ಸ್ಪೋರ್ಟ್ಸ್ ಕನ್ನಡ” ಕುಟುಂಬದಿಂದ ಹೃತ್ಪೂರ್ವಕ ಅಭಿನಂದನೆಗಳು ಹಾಗೂ ಮುಂದಿನ ಕ್ರಿಕೆಟ್ ಹಾದಿಗೆ ಹಾರ್ದಿಕ ಶುಭಾಶಯಗಳು. ಕುಂದಾಪುರದಿಂದ ಆರಂಭವಾದ ಶಿಖರ್ ಶೆಟ್ಟಿಯ ಈ ಕ್ರಿಕೆಟ್ ಪಯಣ, ಕರ್ನಾಟಕದ ಜಯಗಾಥೆಯ ಹೊಸ ಅಧ್ಯಾಯ ಬರೆಯಲಿ; ರಾಷ್ಟ್ರ ಮಟ್ಟದ ಕ್ರೀಡಾಂಗಣವರೆಗೆ ಬೆಳಗಲಿ.

The post ಕರ್ನಾಟಕ ರಣಜಿ ತಂಡದಲ್ಲಿ ಕುಂದಾಪುರದ ಕುವರ ಶಿಖರ್ ಶೆಟ್ಟಿ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಕರ್ನಾಟಕ ರಣಜಿ ತಂಡದಲ್ಲಿ ಉಡುಪಿ ಹುಡುಗ ಅಭಿಲಾಷ್ ಶೆಟ್ಟಿಗೆ ಸ್ಥಾನ

ಉಡುಪಿ ಜಿಲ್ಲೆಯ ಕೋಟ ಮೂಡು ಗಿಳಿಯಾರಿನ ಎಡಗೈ ವೇಗದ ಬೌಲರ್ ಅಭಿಲಾಷ್ ಶೆಟ್ಟಿ 2025-26ನೇ ಸಾಲಿನ ರಣಜಿ ಟ್ರೋಫಿ ಟೂರ್ನಿಗೆ ಕರ್ನಾಟಕ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.

ಕರ್ನಾಟಕ ತಂಡದ ರಣಜಿ ಅಭಿಯಾನ ಅಕ್ಟೋಬರ್ 15ರಿಂದ ರಾಜ್’ಕೋಟ್’ನಲ್ಲಿ ಆರಂಭವಾಗಿರುವ ಸೌರಾಷ್ಟ್ರ ವಿರುದ್ಧದ ಪಂದ್ಯದ ಮೂಲಕ ಆರಂಭವಾಗಲಿದೆ. ಸೌರಾಷ್ಟ್ರ ವಿರುದ್ಧದ ಪಂದ್ಯಕ್ಕೆ ಮಯಾಂಕ್ ಅಗರ್ವಾಲ್ ನೇತೃತ್ವದಲ್ಲಿ 15 ಮಂದಿ ಸದಸ್ಯರ ಕರ್ನಾಟಕ ತಂಡವನ್ನು ಪ್ರಕಟಿಸಲಾಗಿದ್ದು, ಕಳೆದೆರಡು ವರ್ಷ ವಿದರ್ಭ ಪರ ಆಡಿದ್ದ ಅನುಭವಿ ಆಟಗಾರ ಕರುಣ್ ನಾಯರ್ ಮತ್ತೆ ರಾಜ್ಯ ತಂಡಕ್ಕೆ ಮರಳಿದ್ದಾರೆ.

27 ವರ್ಷದ ಪ್ರತಿಭಾವಂತ ಎಡಗೈ ವೇಗದ ಬೌಲರ್ ಅಭಿಲಾಷ್ ಶೆಟ್ಟಿ 2024ರ ನವೆಂಬರ್ 6ರಂದು ಬೆಂಗಳೂರಿನಲ್ಲಿ ನಡೆದ ಬಂಗಾಳ ವಿರುದ್ಧದ ಪಂದ್ಯದ ಮೂಲಕ ರಣಜಿ ಟ್ರೋಫಿಗೆ ಪದಾರ್ಪಣೆ ಮಾಡಿದ್ದರು. ಒಟ್ಟು 2 ರಣಜಿ ಪಂದ್ಯಗಳನ್ನಾಡಿರುವ ಅಭಿಲಾಷ್ ಶೆಟ್ಟಿ 7 ವಿಕೆಟ್ ಪಡೆದಿದ್ದಾರೆ. ಕರ್ನಾಟಕ ಪರ 7 ಲಿಸ್ಟ್ ಎ ಪಂದ್ಯಗಳನ್ನು ಆಡಿರುವ ಅಭಿಲಾಷ್ ಶೆಟ್ಟಿ 17 ವಿಕೆಟ್’ಗಳನ್ನು ಪಡೆದಿದ್ದಾರೆ. 

ರಣಜಿ ಟ್ರೋಫಿ- 2025-26: ಸೌರಾಷ್ಟ್ರ ವಿರುದ್ಧದ ಪಂದ್ಯಕ್ಕೆ ಕರ್ನಾಟಕ ತಂಡ

ಮಯಾಂಕ್ ಅಗರ್ವಾಲ್ (ನಾಯಕ), ಕರುಣ್ ನಾಯರ್, ಸ್ಮರಣ್ ರವಿಚಂದ್ರನ್, ಕೆ.ಎಲ್ ಶ್ರೀಜಿತ್ (ವಿಕೆಟ್ ಕೀಪರ್), ಶ್ರೇಯಸ್ ಗೋಪಾಲ್, ವೈಶಾಖ್ ವಿಜಯ್ ಕುಮಾರ್, ವಿದ್ವತ್ ಕಾವೇರಪ್ಪ, ಅಭಿಲಾಷ್ ಶೆಟ್ಟಿ, ವೆಂಕಟೇಶ್ ಎಂ., ನಿಕಿನ್ ಜೋಸ್, ಅಭಿನವ್ ಮನೋಹರ್, ಕೃತಿಕ್ ಕೃಷ್ಣ (ವಿಕೆಟ್ ಕೀಪರ್), ಅನೀಶ್ ಕೆ.ವಿ., ಮೊಹ್ಸಿನ್ ಖಾನ್, ಶಿಖರ್ ಶೆಟ್ಟಿ.

ಕೋಚ್: ಯರೇಗೌಡ

ಬೌಲಿಂಗ್ ಕೋಚ್: ಮನ್ಸೂರ್ ಅಲಿ ಖಾನ್

ಫೀಲ್ಡಿಂಗ್ ಕೋಚ್: ಶಬರೀಷ್ ಪಿ. ಮೋಹನ್

ಮ್ಯಾನೇಜರ್: ಎ.ರಮೇಶ್ ರಾವ್

ಸ್ಟ್ರೆಂತ್ & ಕಂಡಿಷನಿಂಗ್ ಕೋಚ್: ಇರ್ಫಾನುಲ್ಲಾ ಖಾನ್

ಫಿಸಿಯೋ: ಅಭಿಷೇಕ್ ಕುಲಕರ್ಣಿ

ಪರ್ಫಾಮೆನ್ಸ್ ಅನಾಲಿಸ್ಟ್: ಗಿರಿ ಪ್ರಸಾದ್

ರಣಜಿ ಟ್ರೋಫಿ- 2025-26: ಕರ್ನಾಟಕ ತಂಡದ ವೇಳಾಪಟ್ಟಿ 

ಕರ್ನಾಟಕ Vs ಸೌರಾಷ್ಟ್ರ

ಸ್ಥಳ: ರಾಜ್ ಕೋಟ್

ಅಕ್ಟೋಬರ್ 15-18

ಕರ್ನಾಟಕ Vs ಗೋವಾ

ಸ್ಥಳ: ಶಿವಮೊಗ್ಗ

ಅಕ್ಟೋಬರ್ 25-28

ಕರ್ನಾಟಕ Vs ಕೇರಳ

ಸ್ಥಳ: ಮಂಗಳಪುರಂ

ನವೆಂಬರ್ 01-04

ಕರ್ನಾಟಕ Vs ಮಹಾರಾಷ್ಟ್ರ

ಸ್ಥಳ: ನಾಸಿಕ್

ನವೆಂಬರ್ 08-11

ಕರ್ನಾಟಕ Vs ಚಂಡೀಗಢ

ಸ್ಥಳ: ಹುಬ್ಬಳ್ಳಿ

ನವೆಂಬರ್ 16-19

ಕರ್ನಾಟಕ Vs ಮಧ್ಯಪ್ರದೇಶ

ಸ್ಥಳ: ಬೆಂಗಳೂರು

ಜನವರಿ 22-25

ಕರ್ನಾಟಕ Vs ಚಂಡೀಗಢ

ಸ್ಥಳ: ಪಂಜಾಬ್ 

ಜನವರಿ 29-ಫೆಬ್ರವರಿ 01

The post ಕರ್ನಾಟಕ ರಣಜಿ ತಂಡದಲ್ಲಿ ಉಡುಪಿ ಹುಡುಗ ಅಭಿಲಾಷ್ ಶೆಟ್ಟಿಗೆ ಸ್ಥಾನ appeared first on SportsKannada ಸ್ಪೋರ್ಟ್ಸ್ ಕನ್ನಡ.