ಶಿವಮೊಗ್ಗದಲ್ಲಿ ರಣಜಿ ಕ್ರಿಕೆಟ್ — ಗೋವಾ ತಂಡದ ಬೌಲಿಂಗ್ ಕೋಚ್ ದೊಡ್ಡ ಗಣೇಶ್ ರವರಿಗೆ ಆತ್ಮೀಯ ಸ್ವಾಗತ

ಶಿವಮೊಗ್ಗ: ಕರ್ನಾಟಕ ಮತ್ತು ಗೋವಾ ತಂಡಗಳ ನಡುವೆ ನಡೆಯಲಿರುವ ರಣಜಿ ಟ್ರೋಫಿ ಪಂದ್ಯದ ಹಿನ್ನೆಲೆಯಲ್ಲಿ, ಗೋವಾ ತಂಡದ ಬೌಲಿಂಗ್ ಕೋಚ್ ಹಾಗೂ ಭಾರತದ ಮಾಜಿ ವೇಗದ ಬೌಲರ್ ದೊಡ್ಡ ಗಣೇಶ್ ರವರು ಶಿವಮೊಗ್ಗ ನಗರಕ್ಕೆ ಆಗಮಿಸಿದರು.

ಅವರು ಆಗಮಿಸಿದ ಸಂದರ್ಭದಲ್ಲಿ, ಸ್ಥಳೀಯ ಕ್ರಿಕೆಟ್ ಪ್ರೇಮಿಗಳು ಮತ್ತು ಅಧಿಕಾರಿಗಳು ಅವರಿಗೆ ಆತ್ಮೀಯ ಸ್ವಾಗತ ನೀಡಿದರು. ಈ ಸಂದರ್ಭ ಕ್ರಿಕೆಟ್ ಪ್ರೇಮಿಗಳು ಅವರೊಂದಿಗೆ ಮಾತುಕತೆ ನಡೆಸಿ, ಮುಂದಿನ ಪೀಳಿಗೆಯ ಕ್ರಿಕೆಟ್ ಅಭಿವೃದ್ಧಿ ಕುರಿತು ಅಭಿಪ್ರಾಯ ವಿನಿಮಯ ಮಾಡಿಕೊಂಡರು.

ದೊಡ್ಡ ಗಣೇಶ್ ರವರ ಮಾರ್ಗದರ್ಶನದಲ್ಲಿ ಗೋವಾ ತಂಡ ಕಳೆದ ಕೆಲವು ಸೀಸನ್‌ಗಳಲ್ಲಿ ಬೌಲಿಂಗ್ ವಿಭಾಗದಲ್ಲಿ ಉತ್ತಮ ಪ್ರಗತಿಯನ್ನು ಸಾಧಿಸಿರುವುದು ಕ್ರಿಕೆಟ್ ವಲಯದಲ್ಲಿ ಪ್ರಶಂಸೆಗೆ ಪಾತ್ರವಾಗಿದೆ. ದೊಡ್ಡ ಗಣೇಶ್ ರವರ ತರಬೇತಿ ಮತ್ತು ಮಾರ್ಗದರ್ಶನದಿಂದ ಗೋವಾ ತಂಡವು ಈ ಬಾರಿ ಬಲಿಷ್ಠ ಪ್ರದರ್ಶನ ನೀಡಲಿದೆ ಎಂಬ ನಿರೀಕ್ಷೆ ವ್ಯಕ್ತವಾಗಿದೆ.

ಕರ್ನಾಟಕ ತಂಡವೂ ತಮ್ಮ ಹೋಮ್ ಮೈದಾನದಲ್ಲಿ ಗೆಲುವಿನ ಧ್ವಜ ಹಾರಿಸಲು ಸಜ್ಜಾಗಿದ್ದು, ಉತ್ಸಾಹಭರಿತ ವಾತಾವರಣದಲ್ಲೇ ಪಂದ್ಯಕ್ಕೆ ಸನ್ನದ್ಧತೆ ಮುಂದುವರಿದಿದೆ. ಶಿವಮೊಗ್ಗ ಕ್ರಿಕೆಟ್ ಮೈದಾನದಲ್ಲಿ ನಡೆಯಲಿರುವ ಈ ರಣಜಿ ಪಂದ್ಯ ರಾಜ್ಯದ ಕ್ರಿಕೆಟ್ ಅಭಿಮಾನಿಗಳಿಗೆ ವಿಶೇಷ ಆಕರ್ಷಣೆಯಾಗಿದೆ.

ಶಿವಮೊಗ್ಗ ಕ್ರಿಕೆಟ್ ಮೈದಾನದಲ್ಲಿ ನಡೆಯಲಿರುವ ರಣಜಿ ಪಂದ್ಯದಲ್ಲಿ ಗೋವಾ ಹಾಗೂ ಕರ್ನಾಟಕ ತಂಡಗಳು ಸಮಬಲದ ಕಣದಲ್ಲಿವೆ. ಸ್ಥಳೀಯ ಅಭಿಮಾನಿಗಳು ತಮ್ಮ ನೆಚ್ಚಿನ ಕರ್ನಾಟಕ ತಂಡದ ಗೆಲುವಿನ ನಿರೀಕ್ಷೆಯಲ್ಲಿ ಉತ್ಸಾಹದಿಂದ ಕಾಯುತ್ತಿದ್ದಾರೆ.

The post ಶಿವಮೊಗ್ಗದಲ್ಲಿ ರಣಜಿ ಕ್ರಿಕೆಟ್ — ಗೋವಾ ತಂಡದ ಬೌಲಿಂಗ್ ಕೋಚ್ ದೊಡ್ಡ ಗಣೇಶ್ ರವರಿಗೆ ಆತ್ಮೀಯ ಸ್ವಾಗತ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಕರ್ನಾಟಕದ ಅಪ್ರತಿಮ ರಣಜಿ ಹೀರೋ, ರಾಜ್ಯದ ಕ್ರಿಕೆಟ್ ದಿಗ್ಗಜ, ಭಾರತ ಪರ ಐದು ಅಂತರಾಷ್ಟ್ರೀಯ ಪಂದ್ಯಗಳನ್ನಾಡಿರುವ ಕನ್ನಡಿಗ ದೊಡ್ಡ ನರಸಯ್ಯ ಗಣೇಶ್, ಕೀನ್ಯಾ ರಾಷ್ಟ್ರೀಯ ಕ್ರಿಕೆಟ್ ತಂಡದ ಪ್ರಧಾನ ಕೋಚ್ ಆಗಿ ನೇಮಕಗೊಂಡಿದ್ದಾರೆ.

ಕೀನ್ಯಾ ತಂಡವನ್ನು ಏಕದಿನ ವಿಶ್ವಕಪ್ ಟೂರ್ನಿಗೆ ಅರ್ಹತೆ ಪಡೆಯುವಂತೆ ಮಾಡುವುದು ತಮ್ಮ ಮೊದಲ ಗುರಿ ಎಂದು ದೊಡ್ಡ ಗಣೇಶ್ ಹೇಳಿದ್ದಾರೆ.

ಕೀನ್ಯಾ ತಂಡ ಇದುವರೆಗೆ ಒಟ್ಟು 4 ಏಕದಿನ ವಿಶ್ವಕಪ್ ಹಾಗೂ ಒಂದು ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಆಡಿದೆ. 1996, 1999, 2003 ಮತ್ತು 2011ರ ಏಕದಿನ ವಿಶ್ವಕಪ್ ಟೂರ್ನಿಗಳಲ್ಲಿ ಆಡಿದ್ದ ಕೀನ್ಯಾ, 2007ರ ಚೊಚ್ಚಲ ಟಿ20 ವಿಶ್ವಕಪ್ ಟೂರ್ನಿಯಲ್ಲೂ ಭಾಗವಹಿಸಿತ್ತು. ಆದರೆ ಕಳೆದ 13 ವರ್ಷಗಳಿಂದ ಐಸಿಸಿ ವಿಶ್ವಕಪ್ ಟೂರ್ನಿಗಳಿಗೆ ಅರ್ಹತೆ ಪಡೆಯುವಲ್ಲಿ ವಿಫಲವಾಗುತ್ತಾ ಬಂದಿದೆ. ಇದೀಗ ಕೀನ್ಯಾ ತಂಡದ ಕೋಚ್ ಆಗಿ ನೇಮಕಗೊಂಡಿರುವ ಕನ್ನಡಿಗ ದೊಡ್ಡ ಗಣೇಶ್, ಕೀನ್ಯಾ ತಂಡವನ್ನು ವಿಶ್ವಕಪ್ ಟೂರ್ನಿಗೆ ಮುನ್ನಡೆಸುವ ಗುರಿ ಹೊಂದಿದ್ದಾರೆ.

“1996, 1999, 2003, 2007 ಹಾಗೂ 2011ರ ವಿಶ್ವಕಪ್ ಟೂರ್ನಿಗಳಲ್ಲಿ ಕೀನ್ಯಾ ಆಡಿದ್ದನ್ನು ನಾನು ನೋಡಿದ್ದೇನೆ. ಆ ತಂಡದ ಆಟಗಾರರ ಬದ್ಧತೆ ಮತ್ತು ಪರಿಶ್ರಮವನ್ನೂ ನೋಡಿರುವೆ. ಕಳೆದ 10 ವರ್ಷಗಳಲ್ಲಿ ಏನಾಯಿತೋ ನನಗೆ ತಿಳಿಯದು. ಆದರೆ ಇತಿಹಾಸದ ಬಗ್ಗೆ ಮಾತನಾಡಲು ನನಗೆ ಇಷ್ಟವಿಲ್ಲ. ಕೀನ್ಯಾದವರು ಯಾವಾಗಲೂ ಚಾಂಪಿಯನ್’ಗಳು” ಎಂದು 51 ವರ್ಷದ ದೊಡ್ಡ ಗಣೇಶ್ ಹೇಳಿದ್ದಾರೆ.

ಕರ್ನಾಟಕದ ರಣಜಿ ಹೀರೋಗಳಲ್ಲಿ ಒಬ್ಬರಾಗಿರುವ ದೊಡ್ಡ ಗಣೇಶ್, ಕರ್ನಾಟಕ ತಂಡ 1996, 1998 ಹಾಗೂ 1999ರಲ್ಲಿ ಸತತ ಎರಡು ಬಾರಿ ರಣಜಿ ಟ್ರೋಫಿ ಗೆಲ್ಲುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು. ವೃತ್ತಿಜೀವನದಲ್ಲಿ ಒಟ್ಟು 104 ಪ್ರಥಮದರ್ಜೆ ಪಂದ್ಯಗಳನ್ನಾಡಿರುವ ಬಲಗೈ ವೇಗಿ ದೊಡ್ಡ ಗಣೇಶ್ 365 ವಿಕೆಟ್’ಗಳನ್ನು ಪಡೆದಿದ್ದಾರೆ. ಲಿಸ್ಟ್ ಎ ಕ್ರಿಕೆಟ್’ನಲ್ಲಿ 89 ಪಂದ್ಯಗಳಿಂದ 128 ವಿಕೆಟ್ ಕಬಳಿಸಿದ ಸಾಧನೆ ಮಾಡಿದ್ದಾರೆ.

1997ರಲ್ಲಿ ಭಾರತ ಟೆಸ್ಟ್ ತಂಡಕ್ಕೆ ಆಯ್ಕೆಯಾಗಿದ್ದ ದೊಡ್ಡ ಗಣೇಶ್ 4 ಟೆಸ್ಟ್ ಪಂದ್ಯಗಳನ್ನಾಡಿದ್ದು 5 ವಿಕೆಟ್ ಪಡೆದಿದ್ದಾರೆ. ಅಲ್ಲದೆ, ಒಂದು ಏಕದಿನ ಪಂದ್ಯವಾಡಿ ಒಂದು ವಿಕೆಟ್ ಕೂಡ ಪಡೆದಿದ್ದಾರೆ.

ದೊಡ್ಡ ಗಣೇಶ್ ಅಂತರಾಷ್ಟ್ರೀಯ ಕ್ರಿಕೆಟ್ ತಂಡವೊಂದರ ಪ್ರಧಾನ ಕೋಚ್ ಆಗಿ ನೇಮಕಗೊಳ್ಳುತ್ತಿರುವುದು ಇದೇ ಮೊದಲು. ಈ ಹಿಂದೆ ಗಣೇಶ್ ಗೋವಾ ಕ್ರಿಕೆಟ್ ತಂಡದ ಕೋಚ್ ಆಗಿ ಕಾರ್ಯ ನಿರ್ವಹಿಸಿದ್ದರು.

ಕೀನ್ಯಾದ ನೈರೋಬಿಯಲ್ಲಿ ಸೆಪ್ಟೆಂಬರ್ 10ರಿಂ 23ರವರೆಗೆ ಐಸಿಸಿ ವಿಶ್ವಕಪ್ ಚಾಲೆಂಜ್ ಲೀಗ್ ನಡೆಯಲಿದ್ದು, ಕೀನ್ಯಾ ಕೋಚ್ ಆಗಿ ದೊಡ್ಡ ಗಣೇಶ್ ಅವರ ಅಭಿಯಾನ ಈ ಟೂರ್ನಿಯಿಂದ ಆರಂಭವಾಗಲಿದೆ. ಈ ಟೂರ್ನಿಯಲ್ಲಿ ಕೀನ್ಯಾ ತಂಡದ ಜೊತೆ ಪಪುವಾ ನ್ಯೂಗಿನಿ, ಡೆನ್ಮಾರ್ಕ್, ಕುವೈಟ್, ಜೆರ್ಸಿ ಮತ್ತು ಕತಾರ್ ತಂಡಗಳು ಆಡಲಿದ್ದು, ಇದು 2027ರ ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಗೆ ಅರ್ಹತೆ ಪಡೆಯುವ ನಿಟ್ಟಿನಲ್ಲಿ ಮೊದಲ ಹೆಜ್ಜೆಯಾಗಿದೆ.

The post ಕೀನ್ಯಾ ಕ್ರಿಕೆಟ್ ತಂಡಕ್ಕೆ ಕನ್ನಡಿಗ ದೊಡ್ಡ ಗಣೇಶ್ ಹೆಡ್ ಕೋಚ್ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಕಳೆದ ತಿಂಗಳು..
ಜೂನ್ 30ರಂದು ಕರ್ನಾಟಕದ The most celebrated cricketer, ರಾಜ್ಯ ಕ್ರಿಕೆಟ್’ನ ಸಾರ್ವಕಾಲಿಕ ಶ್ರೇಷ್ಠ ಮ್ಯಾಚ್ ವಿನ್ನರ್’ಗಳಲ್ಲಿ ಒಬ್ಬರಾಗಿರುವ ದೊಡ್ಡ ಗಣೇಶ್ ಅವರ ಹುಟ್ಟುಹಬ್ಬ.

ಇದು ದೊಡ್ಡ ಗಣೇಶ್ ಅವರ ಬಗ್ಗೆ ಅವತ್ತೇ ಬರೆದಿದ್ದ ಬರಹ.. ಆದರೆ ಭಾರತ ಟಿ20 ವಿಶ್ವಕಪ್ ಗೆದ್ದ ಸಂಭ್ರಮದಲ್ಲಿ ಇದು ಮರೆಯಾಗಿತ್ತು. ಇವತ್ತು ನೆನಪಾಯಿತು, ಹಾಗೇ ಪ್ರಕಟಿಸಿದ್ದೇನೆ.

ಕರ್ನಾಟಕ ತಂಡದ 10 ವರ್ಷಗಳ ಹಿಂದಿನ ರಣಜಿ ಗತವೈಭವಕ್ಕೆ ಸಾಕ್ಷಿಯಾಗಿದ್ದು ನನ್ನ ಜೀವನದ ಅತ್ಯಂತ ಸ್ಮರಣೀಯ ಕ್ಷಣಗಳಲ್ಲಿ ಒಂದು. ವೃತ್ತಿ ಸಂಬಂಧ ಕಾರಣಗಳಿಗೆ ಆ ಪ್ರತಿಯೊಂದು ಕ್ಷಣವನ್ನೂ ಕಣ್ತುಂಬಿಕೊಳ್ಳುವ ಅವಕಾಶ ನನಗೆ ಸಿಕ್ಕಿತ್ತು. ಆದರೆ 90ರ ದಶಕದ ಗತವೈಭವವನ್ನು ನಾನು ನೋಡಿಲ್ಲ. ಆದರೆ ಆ ಕಥೆಯನ್ನು ಅಂದಿನ ಆಟಗಾರರ ಬಾಯಿಂದಲೇ ಸಾಕಷ್ಟು ಬಾರಿ ಕೇಳಿದ್ದೇನೆ. ಆ ಕಥೆಗಳಲ್ಲಿ ಬರುವ ಒಂದು ಪ್ರಮುಖ ಪಾತ್ರದ ಹೆಸರು ದೊಡ್ಡ ನರಸಯ್ಯ ಗಣೇಶ್.

ಹರಿದ ಸ್ಲಿಪ್ಪರ್, ಹರಕಲು ಸೈಕಲ್ ಏರಿ ಪೀಣ್ಯದಿಂದ ಚಿನ್ನಸ್ವಾಮಿ ಕ್ರೀಡಾಂಗಣಕ್ಕೆ ಬರುತ್ತಿದ್ದ ಹುಡುಗ. ಪೀಣ್ಯದಲ್ಲಿ ಟೆನಿಸ್ ಬಾಲ್ ಕ್ರಿಕೆಟ್’ನಿಂದ ಶುರುವಾಗಿದ್ದ ಪ್ರಯಾಣ.. 90ರ ದಶಕದಲ್ಲಿ ರಣಜಿ ತಂಡಕ್ಕೆ ಕಾಲಿಟ್ಟಾಗ ದೊಡ್ಡ ಗಣೇಶ್ ಅವರ ಬಳಿ ಒಂದು ಜೊತೆ ಶೂ ಕೂಡ ಇರಲಿಲ್ಲ.

ದೊಡ್ಡ ಗಣೇಶ್ ಅವರ ಬಗ್ಗೆ ಸಾಕಷ್ಟು ದಂತಕಥೆಗಳಿವೆ. ಆ ಕಥೆಗಳನ್ನು ಅವರ ಜೊತೆ ಹತ್ತಾರು ವರ್ಷ ಆಡಿದವರ ಬಾಯಿಂದ ಕೇಳಿದಾಗ ಮೈ ರೋಮಾಂಚನಗೊಂಡಿದ್ದಿದೆ, ಹೊಟ್ಟೆ ಹುಣ್ಣಾಗುವಷ್ಟು ನಕ್ಕಿದ್ದಿದೆ. ಅಂತಹ ಕಥೆಗಳಲ್ಲಿ ಒಂದು ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಅದೊಂದು ಘಟನೆ.

ಚಿನ್ನಸ್ವಾಮಿ ಮೈದಾನದಲ್ಲಿ ಕರ್ನಾಟಕ ಮತ್ತು ತಮಿಳುನಾಡು ತಂಡಗಳ ಮಧ್ಯೆ ರಣಜಿ ಪಂದ್ಯ ನಡೆಯುತ್ತಿತ್ತು. ಕರ್ನಾಟಕ Vs ತಮಿಳುನಾಡು ರಣಜಿ ಮ್ಯಾಚ್ ಎಂದರೆ ಆಗಿನ ಕಾಲಕ್ಕೆ ಇಂಡಿಯಾ Vs ಪಾಕಿಸ್ತಾನ ಪಂದ್ಯದಷ್ಟು ಜಿದ್ದಾಜಿದ್ದಿ. ತಮಿಳುನಾಡು ವಿರುದ್ಧ ನಮ್ಮವರು ಜಿದ್ದಿಗೆ ಬಿದ್ದಂತೆ ಆಡುತ್ತಿದ್ದ ಕಾಲ. ಆ ಕಡೆಯಿಂದಲೂ ಅಷ್ಟೇ ಜಿದ್ದು.

ಕರ್ನಾಟಕ ತಂಡ ಫೀಲ್ಡಿಂಗ್ ಮಾಡುತ್ತಿತ್ತು. ಈಗಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿ ಕಟ್ಟದ ಮೇಲ್ಭಾಗದ ಸ್ಟ್ಯಾಂಡ್’ನಲ್ಲಿ ಕೂತಿದ್ದ ಒಂದಷ್ಟು ಮಂದಿ ತಮಿಳುನಾಡು ತಂಡದ ಅಭಿಮಾನಿಗಳು ಬೌಂಡರಿ ಗೆರೆಯ ಬಳಿ ಕ್ಷೇತ್ರರಕ್ಷಣೆ ನಡೆಸುತ್ತಿದ್ದ ಕರ್ನಾಟಕದ ಆಟಗಾರರನ್ನು ಸುಖಾ ಸುಮ್ಮನೆ ಕೆಣಕುತ್ತಾರೆ, ಹೀಯಾಳಿಸುತ್ತಾರೆ. ಪ್ರಶ್ನಿಸಲು ಹೋದ ಕರ್ನಾಟಕ ತಂಡದ ಅಭಿಮಾನಿಗಳ ಮೇಲೇರಿ ಹೋಗುತ್ತಾರೆ. ಇಡೀ ದಿನ ಈ ಆಟಾಟೋಪವನ್ನು ನೋಡಿದ್ದ ನಮ್ಮ ಆಟಗಾರರು ರೋಸಿ ಹೋಗಿದ್ದರೆ, ದೊಡ್ಡ ಗಣೇಶ್ ಮಾತ್ರ ಕೆರಳಿ ಬಿಟ್ಟಿರುತ್ತಾರೆ.

ಮೊದಲೇ ಪಕ್ಕಾ ಲೋಕಲ್. ಪೀಣ್ಯದಲ್ಲಿ ಇಂತಹ ಅದೆಷ್ಟು ಪುಂಡರನ್ನು ನೋಡಿಲ್ಲ ಅವರು. ಇವರಿಗೊಂದು ಪಾಠ ಕಲಿಸಬೇಕು ಎಂದುಕೊಂಡ ದೊಡ್ಡ ಗಣೇಶ್ ಏನು ಮಾಡಿದರು ಗೊತ್ತೇ..?

ಪಂದ್ಯದ 3ನೇ ದಿನವಿರಬೇಕು.. ಯಥಾ ಪ್ರಕಾರ ತಮಿಳುನಾಡು ತಂಡದ ಪರ ಘೋಷಣೆ ಕೂಗುತ್ತಿದ್ದ ಆ ಪುಂಡರು ಮತ್ತೆ ಕಿರಿಕ್ ಶುರು ಮಾಡುತ್ತಾರೆ. ಕರ್ನಾಟಕದ ಆಟಗಾರನ್ನು ನಿಂದಿಸಲು ಆರಂಭಿಸುತ್ತಾರೆ. ಅಷ್ಟೇ.. ಏನಾಗುತ್ತಿದೆ ಎನ್ನುವಷ್ಟರಲ್ಲಿ ಒಂದಷ್ಟು ಮಂದಿ ಯುವಕರು ಆ ಪುಂಡರಿಗೆ ಚೆನ್ನಾಗಿ ಬಾರಿಸುತ್ತಾರೆ, ಅಷ್ಟೂ ಮಂದಿಯನ್ನು ಎತ್ತಿಕೊಂಡು ಕ್ರೀಡಾಂಗಣದಿಂದ ಹೊರ ಹಾಕಿ ಬರುತ್ತಾರೆ. ಅಂದ ಹಾಗೆ ಆ ಯುವಕರು ಯಾರು ಗೊತ್ತಾ..? ಎಲ್ಲಿಯವರು ಗೊತ್ತಾ..? ಪೀಣ್ಯದವರು. ಕರ್ನಾಟಕದ ಆಟಗಾರನನ್ನು ನಿಂದಿಸುತ್ತಿದ್ದ ಪುಂಡ ಪೋಕರಿಗಳಿಗೆ ಪಾಠ ಕಲಿಸಲೆಂದು ಪೀಣ್ಯದಿಂದ ಹುಡುಗರನ್ನು ಕರೆ ತಂದು ಆ ಸ್ಟ್ಯಾಂಡ್’ನಲ್ಲಿ ಕೂರಿಸಿದ್ದರಂತೆ ದೊಡ್ಡ ಗಣೇಶ್.

ದೊಡ್ಡ ಗಣೇಶ್ ಕರ್ನಾಟಕ ಕ್ರಿಕೆಟ್ ಕಂಡ ದಣಿವರಿಯದ ಯೋಧ. ರಣಜಿ ಟ್ರೋಫಿ ಪಂದ್ಯಗಳಲ್ಲಿ ಒಂದು endನಿಂದ ದಿನಪೂರ್ತಿ ಬೌಲಿಂಗ್ ಮಾಡಲು ಸಿದ್ಧವಾಗಿರುತ್ತಿದ್ದ ಬೌಲರ್. ಕೆಲವೊಮ್ಮೆ ಗಣೇಶ್’ಗೆ ನಾಯಕ ಬೌಲಿಂಗ್ ನೀಡದೇ ಇದ್ದಾಗ, ಚೆಂಡನ್ನು ಬಲವಂತವಾಗಿ ಕಸಿದುಕೊಂಡು ಬೌಲಿಂಗ್ ಮಾಡುತ್ತಿದ್ದರಂತೆ. ತಂಡ ಗೆಲ್ಲಬೇಕು, ತಂಡವನ್ನು ಗೆಲ್ಲಿಸಬೇಕು.. ಅಷ್ಟೇ.. ಅದಕ್ಕಾಗಿ ರಕ್ತವನ್ನೇ ಬಸಿಯಲು ಸಿದ್ಧವಾಗಿ ನಿಲ್ಲುತ್ತಿದ್ದ ಕೆಚ್ಚೆದೆಯ ಕ್ರಿಕೆಟಿಗ.

1996-97ರ ಇರಾನಿ ಕಪ್ ಪಂದ್ಯದಲ್ಲಿ ರೆಸ್ಟ್ ಆಫ್ ಇಂಡಿಯಾ ವಿರುದ್ಧ ವಿವಿಎಸ್ ಲಕ್ಷ್ಮಣ್, ಸಿಕ್ಸರ್ ಸಿಧು ಸೇರಿ 11 ವಿಕೆಟ್ ಪಡೆಯುತ್ತಿದ್ದಂತೆ ದೊಡ್ಡ ಗಣೇಶ್’ಗೆ ಭಾರತ ತಂಡದ ಬಾಗಿಲು ತೆರೆಯಿತು. ಭಾರತ ಪರ 4 ಟೆಸ್ಟ್, ಒಂದು ಏಕದಿನ ಪಂದ್ಯವಾಡಿ ಮತ್ತೆ ಕರ್ನಾಟಕ ತಂಡಕ್ಕೆ ವಾಪಸ್ಸಾದ ಗಣೇಶ್, ರಾಜ್ಯ ತಂಡ ಸತತ ಎರಡು ಬಾರಿ ರಣಜಿ ಟ್ರೋಫಿ ಗೆಲ್ಲುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದವರು.

1998-99ನೇ ಸಾಲಿನ ರಣಜಿ ಟ್ರೋಫಿ ಟೂರ್ನಿಯಲ್ಲಂತೂ ಅಕ್ಷರಶಃ ಬಿರುಗಾಳಿಯಾಗಿದ್ದರು ದೊಡ್ಡ ಗಣೇಶ್. ಆ ವರ್ಷ ಒಟ್ಟು 62 ವಿಕೆಟ್ ಪಡೆದಿದ್ದ ದೊಡ್ಡ ಗಣೇಶ್, ದೇಶೀಯ ಕ್ರಿಕೆಟ್’ನಲ್ಲಿ ಅದುವರೆಗೆ ಯಾರೂ ಮಾಡಲಾಗದ ದಾಖಲೆಯೊಂದನ್ನು ಬರೆದಿದ್ದರು. ಮುಂದೆ ಆ ದಾಖಲೆ ಪತನವಾಗಲು ಬರೋಬ್ಬರಿ 21 ವರ್ಷಗಳೇ ಬೇಕಾದವು.

The post ಕರ್ನಾಟಕದ ಶ್ರೇಷ್ಠ ಕ್ರಿಕೆಟ್ ಯೋಧನ ‘ದೊಡ್ಡ’ ಕಥೆ..! appeared first on SportsKannada ಸ್ಪೋರ್ಟ್ಸ್ ಕನ್ನಡ.