ಬೆಂಗಳೂರು ಚಿನ್ನಸ್ವಾಮಿ ಕ್ರೀಡಾಂಗಣಕ್ಕೆ ಬೈ-ಬೈ.. 

ಬೆಂಗಳೂರು: ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಇತ್ತೀಚೆಗೆ ಸಂಭವಿಸಿದ ಕಾಲ್ತುಳಿತದ ನಂತರ, ಕರ್ನಾಟಕ ಸರ್ಕಾರ ದಿಟ್ಟ ನಿರ್ಧಾರ ತೆಗೆದುಕೊಂಡಿದೆ. ಬೆಂಗಳೂರಿನ ಬೊಮ್ಮಸಂದ್ರ ಪ್ರದೇಶದ ಸೂರ್ಯ ಸಿಟಿಯಲ್ಲಿ ಸುಮಾರು ₹1,650 ಕೋಟಿ ವೆಚ್ಚದಲ್ಲಿ 80,000 ಆಸನಗಳ ಬೃಹತ್ ಕ್ರಿಕೆಟ್ ಕ್ರೀಡಾಂಗಣ ಸೇರಿದಂತೆ ಮೆಗಾ ಕ್ರೀಡಾ ಸಂಕೀರ್ಣವನ್ನು ನಿರ್ಮಿಸಲಾಗುವುದು.

ಈ ಮೂಲಕ ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದ ನಂತರ ಭಾರತದ ಎರಡನೇ ಅತಿದೊಡ್ಡ ಕ್ರಿಕೆಟ್ ಕ್ರೀಡಾಂಗಣವಾಗಲಿದೆ. ಅದೇ ಸಮಯದಲ್ಲಿ, ಭಾರತೀಯ ಕ್ರಿಕೆಟ್‌ನ ಮರೆಯಲಾಗದ ಕ್ರೀಡಾಂಗಣಗಳಲ್ಲಿ ಒಂದಾದ ಚಿನ್ನಸ್ವಾಮಿ ಕ್ರೀಡಾಂಗಣವನ್ನು ಶೀಘ್ರದಲ್ಲೇ ಮುಚ್ಚಲಾಗುವುದು ಎಂಬ ಸುದ್ದಿ ಬಂದಿದ್ದು, ಕ್ರಿಕೆಟ್ ಅಭಿಮಾನಿಗಳಲ್ಲಿ ದುಃಖ ಉಂಟು ಮಾಡಿದೆ.

ಹೊಸ ಕ್ರೀಡಾಂಗಣದ ಪ್ರಮುಖ ಲಕ್ಷಣವೆಂದರೆ ಅಂತರರಾಷ್ಟ್ರೀಯ ಗುಣಮಟ್ಟದ 80,000 ಆಸನಗಳ ಕ್ರಿಕೆಟ್ ಕ್ರೀಡಾಂಗಣದ ನಿರ್ಮಾಣ. ಈ ಕ್ರೀಡಾ ಸಂಕೀರ್ಣವು ಕ್ರಿಕೆಟ್ ಮಾತ್ರವಲ್ಲದೆ ಇತರ ಹಲವು ವೈಶಿಷ್ಟ್ಯಗಳನ್ನು ಒಳಗೊಂಡಿರುತ್ತದೆ:

ಎಂಟು ಒಳಾಂಗಣ ಮತ್ತು ಎಂಟು ಹೊರಾಂಗಣ ಕ್ರೀಡಾ ಸಭಾಂಗಣಗಳು

ಅತ್ಯಾಧುನಿಕ ಜಿಮ್‌ಗಳು

ಒಲಿಂಪಿಕ್ ಗಾತ್ರದ ಈಜುಕೊಳಗಳು

ಅತಿಥಿಗೃಹಗಳು, ಹಾಸ್ಟೆಲ್‌ಗಳು ಮತ್ತು ಹೋಟೆಲ್‌ಗಳು

ಅಂತರರಾಷ್ಟ್ರೀಯ ಕಾರ್ಯಕ್ರಮಗಳನ್ನು ಆಯೋಜಿಸಲು ಸಮ್ಮೇಳನ ಸಭಾಂಗಣ

ರಾಹುಲ್ ದ್ರಾವಿಡ್, ಅನಿಲ್ ಕುಂಬ್ಳೆ, ಕೆಎಲ್ ರಾಹುಲ್ ಅವರಂತಹ ದಂತಕಥೆಗಳನ್ನು ಸೃಷ್ಟಿಸಿದ ಬೆಂಗಳೂರು ಹಲವು ವರ್ಷಗಳಿಂದ ಕ್ರಿಕೆಟ್ ಕೇಂದ್ರವಾಗಿದೆ. ಅಸ್ತಿತ್ವದಲ್ಲಿರುವ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಭದ್ರತೆ ಮತ್ತು ಸ್ಥಳಾವಕಾಶದ ಕೊರತೆ ಪ್ರಮುಖ ಸಮಸ್ಯೆಗಳಾಗಿರುವುದರಿಂದ, ಈ ಹೊಸ ಕ್ರೀಡಾಂಗಣವು ಬೆಂಗಳೂರಿನ ಕ್ರಿಕೆಟ್ ವೈಭವವನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುವ ನಿರೀಕ್ಷೆಯಿದೆ.

ಹೊಸ ಕ್ರೀಡಾಂಗಣದ ಸುದ್ದಿ ಅಭಿಮಾನಿಗಳಲ್ಲಿ ಸಾಕಷ್ಟು ಉತ್ಸಾಹವನ್ನು ಸೃಷ್ಟಿಸಿದ್ದರೂ, ಚಿನ್ನಸ್ವಾಮಿ ಕ್ರೀಡಾಂಗಣದ ಭವಿಷ್ಯದ ಬಗ್ಗೆ ಒಂದು ರೀತಿಯ ನಾಸ್ಟಾಲ್ಜಿಯಾ ಮತ್ತು ದುಃಖವಿದೆ. ಅನಿಲ್ ಕುಂಬ್ಳೆ ಅವರ 10 ವಿಕೆಟ್ ಗೊಂಚಲುಗಳಿಂದ ಹಿಡಿದು ಆರ್‌ಸಿಬಿಯ ರೋಮಾಂಚಕ ಪಂದ್ಯಗಳವರೆಗೆ, ಚಿನ್ನಸ್ವಾಮಿ ಕ್ರೀಡಾಂಗಣವು ಅನೇಕ ಕ್ರಿಕೆಟ್ ನೆನಪುಗಳ ಭಂಡಾರವಾಗಿದೆ.

2027 ರ ಐಪಿಎಲ್ ಸೀಸನ್ ನಿಂದ ಈ ಹೊಸ ಕ್ರೀಡಾಂಗಣ ಆರ್‌ಸಿಬಿಯ ತವರು ಮೈದಾನವಾಗುತ್ತದೆಯೇ ಎಂಬುದರ ಕುರಿತು ಸಾಮಾಜಿಕ ಮಾಧ್ಯಮಗಳಲ್ಲಿ ಈಗಾಗಲೇ ಚರ್ಚೆಗಳು ಆರಂಭವಾಗಿವೆ. ಈ ಮೆಗಾ ಯೋಜನೆ ಯೋಜನೆಯಂತೆ ನಡೆದರೆ, ಮುಂದಿನ ಮೂರರಿಂದ ಐದು ವರ್ಷಗಳಲ್ಲಿ ಬೆಂಗಳೂರಿನಲ್ಲಿ ಆಧುನಿಕ ಕ್ರಿಕೆಟ್ ಕ್ರೀಡಾಂಗಣವನ್ನು ನಿರ್ಮಿಸಲಾಗುವುದು.

The post ಬೆಂಗಳೂರು ಚಿನ್ನಸ್ವಾಮಿ ಕ್ರೀಡಾಂಗಣಕ್ಕೆ ಬೈ-ಬೈ..  appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಸೋಷಿಯಲ್ ಮೀಡಿಯಾದಲ್ಲಿ ಒಂದು ವೀಡಿಯೋ ಹರಿದಾಡುತ್ತಿದೆ. ಮಯಾಂಕ್ ಅಗರ್ವಾಲ್ ಅವರ ಸಂದರ್ಶನದ ವೀಡಿಯೋ ಅದು.

ಸಂದರ್ಶಕ ಕೇಳುತ್ತಾನೆ, ‘’bro, ನಿಮ್ಮ ಫೇವರಿಟ್ ಆ್ಯಕ್ಟರ್ ಯಾರು’’ ಎಂದು. ‘’All time favourite ಡಾ.ರಾಜ್’ಕುಮಾರ್’’ ಎಂದು ಒಂದು ಕ್ಷಣ ಯೋಚಸದೆ ಹೇಳಿ ಬಿಟ್ಟರು ಮಯಾಂಕ್.

ಮಯಾಂಕ್ ಅಗರ್ವಾಲ್
ಅಣ್ಣಾವ್ರ ಸಿನಿಮಾಗಳನ್ನು ನೋಡುತ್ತಾ ಬೆಳೆದವರಲ್ಲ. ಡಾ.ರಾಜ್ ಅವರ ಅದೆಷ್ಟು ಸಿನಿಮಾಗಳನ್ನು ನೋಡಿದ್ದಾರೋ ಗೊತ್ತಿಲ್ಲ.
ಆದರೆ ನೆಚ್ಚಿನ ಸಿನಿಮಾ ತಾರೆ ಯಾರು ಎಂದಾಕ್ಷಣ ‘ಡಾ.ರಾಜ್’ಕುಮಾರ್’ ಎಂದು ಬಿಡುತ್ತಾರೆ ಮಯಾಂಕ್ ಅಗರ್ವಾಲ್.

ಸರಳತೆ, ಸಭ್ಯತೆಗೆ ಈ ಜಗತ್ತಿನಲ್ಲಿ ಮತ್ತೊಂದು ಹೆಸರೇನಾದರೂ ಇದ್ದರೆ ಅದು ವರನಟ ಡಾ.ರಾಜ್’ಕುಮಾರ್.

ಉತ್ಪ್ರೇಕ್ಷೆಯಲ್ಲ, ಮಯಾಂಕ್ ಅಗರ್ವಾಲ್ ಕೂಡ ಹಾಗೆಯೇ..
ಅತ್ಯಂತ ಸರಳ ಮತ್ತು ಸಭ್ಯ ಕ್ರಿಕೆಟಿಗ. ಮಯಾಂಕ್ ಅಗರ್ವಾಲ್ ಇರುವುದು ಹಾಗೆಯೇ.. ತುಂಬಾ down to earth ಮನುಷ್ಯ. ಅವರ ಕನ್ನಡ ಪ್ರೀತಿಯ ಬಗ್ಗೆ ಹೇಳಲೇಬೇಕು.

ಸಾಮಾನ್ಯವಾಗಿ ಅಗರ್ವಾಲ್ ಎಂಬ ಸರ್’ನೇಮ್ ಕೇಳಿದಾಕ್ಷಣ ಇವರು ಕನ್ನಡಿಗರಲ್ಲ, ಯಾರೋ ಉತ್ತರ ಭಾರತೀಯರಿರಬೇಕೆಂಬ ಅಭಿಪ್ರಾಯ ತನ್ನಿಂದ ತಾನಾಗಿಯೇ ಮೂಡಿ ಬಿಡುತ್ತದೆ. ಹೌದು, ಮಯಾಂಕ್ ಅಗರ್ವಾಲ್ ಅವರ ತಂದೆಯ ಮೂಲ ಉತ್ತರ ಭಾರತ, ಬಹುಶಃ ದೆಹಲಿ ಇರಬೇಕು. ಆದರೆ ಮಯಾಂಕ್ ಹುಟ್ಟಿದ್ದು ಇಲ್ಲೇ, ಬೆಳೆದದ್ದು ಇಲ್ಲೇ, ಆಡಿದ್ದೂ ಇಲ್ಲೇ, ಹೆಸರು ಮಾಡಿದ್ದೂ ಇಲ್ಲೇ.. ಅವರು ಕರ್ನಾಟಕಕ್ಕೆ ಗೌರವ ತಂದುಕೊಟ್ಟ ಹೆಮ್ಮೆಯ ಕನ್ನಡಿಗ.

ಮಾತನಾಡುವಾಗ ಅಚ್ಚಕನ್ನಡದಲ್ಲಿ, ಸ್ಪಷ್ಟ ಕನ್ನಡದಲ್ಲಿ ಮಾತನಾಡುತ್ತಾರೆ. ಮಧ್ಯೆ ಇಂಗ್ಲೀಷ್ ಪದಗಳು ಬಾರದಂತೆ ಎಚ್ಚರ ವಹಿಸುತ್ತಾ ಮಾತನಾಡುವುದನ್ನು ಕೇಳುವುದೇ ಚಂದ.

ಮಾತೃಭಾಷೆ ಹಿಂದಿ, ಓದಿದ್ದು ಇಂಗ್ಲೀಷ್ ಮೀಡಿಯಂ. ಆದರೆ ಮಯಾಂಕ್ ಅಗರ್ವಾಲ್ ಅವರಿಗೆ ಕನ್ನಡ ‘ಜೀವನದ ಭಾಷೆ’.

ಅವಕಾಶ ಸಿಕ್ಕರೆ ಮಯಾಂಕ್ ಅವರೊಂದಿಗೆ ಒಮ್ಮೆ ಮಾತನಾಡಿ ಅಥವಾ ಅವರ ಯಾವುದಾದರೂ ಕನ್ನಡ ಸಂದರ್ಶನಗಳನ್ನೊಮ್ಮೆ ನೋಡಿ. ಕನ್ನಡಕ್ಕೆ ಅವರು ಕೊಡುವ ಬೆಲೆ, ಕನ್ನಡದ ಬಗ್ಗೆ ಆತನಿಗಿರುವ ಪ್ರೀತಿ, ಅಭಿಮಾನ ಅವರನ್ನೂ ಇನ್ನೂ ಹೆಚ್ಚು ಹೆಚ್ಚು ಪ್ರೀತಿಸುವಂತೆ ಮಾಡಿ ಬಿಡುತ್ತದೆ.

ಮಹಾರಾಜ ಟ್ರೋಫಿ ಟಿ20 ಟೂರ್ನಿಯಲ್ಲಿ ಬೆಂಗಳೂರು ಬ್ಲಾಸ್ಟರ್ಸ್ ತಂಡದ ನಾಯಕತ್ವ ವಹಿಸಿರುವ ಮಯಾಂಕ್ ಅಗರ್ವಾಲ್ ಕರ್ನಾಟಕ ತಂಡದ ನಾಯಕನೂ ಹೌದು. ಕಳೆದ 10 ವರ್ಷಗಳಿಂದ ಕರ್ನಾಟಕ ತಂಡ ರಣಜಿ ಟ್ರೋಫಿ ಗೆದ್ದಿಲ್ಲ. ಈ ಬಾರಿಯಾದರೂ ಮಯಾಂಕ್ ಅಗರ್ವಾಲ್ ನಾಯಕತ್ವದಲ್ಲಿ ಕರ್ನಾಟಕ ರಣಜಿ ಟ್ರೋಫಿ ಗೆಲ್ಲಲಿ.

The post ವರನಟ ಅಣ್ಣಾವ್ರ ದೊಡ್ಡ ಅಭಿಮಾನಿ ಈ ಕ್ರಿಕೆಟಿಗ! appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಅರ್ಜುನನ ಮಗ ಅಭಿಮನ್ಯುವಿಗೆ ಚಕ್ರವ್ಯೂಹ ಭೇದಿಸುವ ವಿದ್ಯೆ ತಿಳಿದಿತ್ತೇ ವಿನಃ, ಅದರಿಂದ ಹೊರ ಬರುವ ವಿದ್ಯೆ ಗೊತ್ತಿರಲಿಲ್ಲ.. ಇದೇ ಕಾರಣಕ್ಕೆ ಚಕ್ರವ್ಯೂಹದಲ್ಲಿ ಬಂಧಿಯಾದ ವೀರ ಅಭಿಮನ್ಯು ರಣರಂಗದಲ್ಲೇ ಉಸಿರು ಚೆಲ್ಲಿ ಬಿಟ್ಟ..!

ಕರ್ನಾಟಕ ಕ್ರಿಕೆಟ್’ನ ಅಭಿಮನ್ಯು ಹಾಗಲ್ಲ.. ಆತ ಕ್ರಿಕೆಟ್ ಚಕ್ರವ್ಯೂಹವನ್ನು ಭೇದಿಸಿದ ರಣಕಲಿ.. ಇದು ಪೀಣ್ಯ ಎಕ್ಸ್’ಪ್ರೆಸ್ ಅಭಿಮನ್ಯು ಮಿಥುನ್ ಎಂಬ ಬೆಂಕಿ ಚೆಂಡಿನ ಕಥೆ.

2009ರಲ್ಲಿ ಉತ್ತರ ಪ್ರದೇಶದ ಮೀರತ್’ನಲ್ಲಿ ನಡೆದ ರಣಜಿ ಪಂದ್ಯ. ಕಟ್ಟುಮಸ್ತಾದ ನೀಳಕಾಯದ ಹುಡುಗನೊಬ್ಬ ಆ ದಿನ ಮೀರತ್ ಮೈದಾನದಲ್ಲಿ ಬೆಂಕಿ-ಬಿರುಗಾಳಿಯಾಗಿ ಬಿಟ್ಟಿದ್ದ.

ಆಡಿದ ಮೊದಲ ರಣಜಿ ಪಂದ್ಯದಲ್ಲೇ ಜಾವಗಲ್ ಶ್ರೀನಾಥ್ ಅವರಂತೆ ಹ್ಯಾಟ್ರಿಕ್ ಸಾಧನೆ. ಚಂಡಮಾರುತದಂತೆ ಅಪ್ಪಳಿಸಿದ ಆ ಪ್ರಚಂಡ ದಾಳಿಗೆ ಎಗರಿ ಬಿದ್ದವರೆಷ್ಟು ಮಂದಿ ಗೊತ್ತೇ.. 11 ಮಂದಿ. ಅರ್ಥಾತ್, ಪಂದ್ಯದಲ್ಲಿ ಆ ಹುಡುಗ ಉಡಾಯಿಸಿದ ವಿಕೆಟ್’ಗಳ ಸಂಖ್ಯೆ 11. ಅಂದ ಹಾಗೆ ಆ ದಿನ ಕರ್ನಾಟಕ ಕ್ರಿಕೆಟ್’ನಲ್ಲಿ ಬೀಸಿದ ಆ ಬಿರುಗಾಳಿಯ ಹೆಸರು
ಅಭಿಮನ್ಯು ಮಿಥುನ್.

ಆಡಿದ ಮೊದಲ ರಣಜಿ ಪಂದ್ಯದಲ್ಲೇ ಮಿಥುನ್ ಬತ್ತಳಿಕೆಯಿಂದ ನುಗ್ಗಿ ಬಂದ ಅಸ್ತ್ರಗಳಿಗೆ ಕ್ರಿಕೆಟ್ ದಿಗ್ಗಜ ರಾಹುಲ್ ದ್ರಾವಿಡ್ ಅವಕೇ ಬೆರಗಾಗಿ ಹೋಗಿದ್ದರು. ಆ ಪಂದ್ಯದಲ್ಲಿ ಸ್ಲಿಪ್’ನಲ್ಲಿ ಕ್ಷೇತ್ರರಕ್ಷಣೆ ನಡೆಸುತ್ತಿದ್ದ ಕರ್ನಾಟಕ ತಂಡದ ನಾಯಕ ದ್ರಾವಿಡ್ ಅವರಿಗೆ ಆ ದಿನ ಮೈಸೂರು ಎಕ್ಸ್’ಪ್ರೆಸ್ ಜಾವಗಲ್ ಶ್ರೀನಾಥ್ ನೆನಪಾಗಿದ್ದರಂತೆ. ಅದಾದ ಕೆಲ ದಿನಗಳ ನಂತರ ಬೆಂಗಳೂರಿನಲ್ಲಿ ಮತ್ತೊಂದು ಪಂದ್ಯಕ್ಕೆ ಸಜ್ಜಾಗುತ್ತಿದ್ದಾಗ ಮಾತಿಗೆ ಸಿಕ್ಕಿದ ದ್ರಾವಿಡ್ ಅವರಲ್ಲಿ ಮಿಥುನ್ ಬಗ್ಗೆ ಕೇಳಿದಾಗ, ‘’ಜಾವಗಲ್ ಶ್ರೀನಾಥ್ ಬಳಿಕ ಕರ್ನಾಟಕಕ್ಕೊಬ್ಬ genuine fast bowler ಸಿಕ್ಕಿದ್ದಾನೆ’’ ಎಂದಿದ್ದರು ರಾಹುಲ್ ದ್ರಾವಿಡ್.

ಮಿಥುನ್ ಆಡಿದ ಮೊದಲ ರಣಜಿ ಪಂದ್ಯವನ್ನು ನೋಡಲು ಸಾಧ್ಯವಾಗಿರಲಿಲ್ಲ. ಆದರೆ ಅದೇ ಆರ್ಭಟವನ್ನು ಮೈಸೂರಿನಲ್ಲಿ ನಡೆದ ಆ ವರ್ಷದ ರಣಜಿ ಫೈನಲ್’ನಲ್ಲಿ ಪುನರಾವರ್ತಿಸಿ ಬಿಟ್ಟ
ಪೀಣ್ಯ ಎಕ್ಸ್’ಪ್ರೆಸ್.

ಕರ್ನಾಟಕ ಕ್ರಿಕೆಟ್ ಎಂದೆಂದಿಗೂ ಮರೆಯಲಾಗದ ಆ ಫೈನಲ್ ಪಂದ್ಯ ಇವತ್ತಿಗೂ ಕಣ್ಣಿಗೆ ಕಟ್ಟಿದ ಹಾಗಿದೆ. ಮುಂಬೈ ತಂಡದ 2ನೇ ಇನ್ನಿಂಗ್ಸ್.. 6 ವಿಕೆಟ್ ಉಡಾಯಿಸಿದ ಮಿಥುನ್, ಮುಂಬೈನ ಬಲಾಢ್ಯ ಬ್ಯಾಟಿಂಗ್ ಪಡೆಯನ್ನು ಸೀಳಿ ಹಾಕಿ ಬಿಟ್ಟ. ಆ ವರ್ಷ ರಣಜಿ ಟ್ರೋಫಿಯಲ್ಲಿ 47 ವಿಕೆಟ್’ಗಳನ್ನು ಪಡೆದ ಮಿಥುನ್’ಗೆ ಅದೇ ವರ್ಷ ಭಾರತ ಪರ ಟೆಸ್ಟ್ ಆಡುವ ಅವಕಾಶವೂ ಸಿಕ್ಕಿತು.

ಆದರೆ ಕರ್ನಾಟಕ ಕ್ರಿಕೆಟ್’ನಲ್ಲಿ ಚಕ್ರವ್ಯೂಹ ಭೇದಿಸಿದ್ದ ಅಭಿಮನ್ಯುವಿಗೆ ಭಾರತ ತಂಡದಲ್ಲಿ ಚಕ್ರವ್ಯೂಹ ಭೇದಿಸಲು ಸಾಧ್ಯವಾಗಲಿಲ್ಲ. ಆಡಲು ಸಿಕ್ಕಿದ್ದು 4 ಟೆಸ್ಟ್, 5 ಏಕದಿನ ಪಂದ್ಯಗಳಷ್ಟೇ.. ಬಹುಶಃ, ನಮ್ಮ ಕನ್ನಡಿಗನ ಖದರ್ ನೋಡುವ ಅದೃಷ್ಟ ಭಾರತ ತಂಡಕ್ಕಿರಲಿಲ್ಲವೇನೋ..

ಅಲ್ಲಿ ಕೈ ತಪ್ಪಿದ ಅವಕಾಶ ಇಲ್ಲಿ ಹೊಸ ಚರಿತ್ರೆಯೊಂದಕ್ಕೆ ಮುನ್ನುಡಿ ಬರೆಯಿತು. ಭಾರತ ತಂಡದಲ್ಲಿ ಸ್ಥಾನ ಕಳೆದುಕೊಂಡ ಮಿಥುನ್, ಕರ್ನಾಟಕ ಕ್ರಿಕೆಟ್’ಗೆ ಮರಳಿ ಧೂಳೆಬ್ಬಿಸಿ ಬಿಟ್ಟ.

ಕರ್ನಾಟಕದ ಹತ್ತಾರು ಐತಿಹಾಸಿಕ ಗೆಲುವುಗಳ ರೂವಾರಿ ನಮ್ಮ ಪೀಣ್ಯ ಎಕ್ಸ್’ಪ್ರೆಸ್. ಕರ್ನಾಟಕ ಪರ ರಣಜಿ ಟ್ರೋಫಿ, ಇರಾನಿ ಕಪ್, ವಿಜಯ್ ಹಜಾರೆ ಟ್ರೋಫಿ, ಸೈಯದ್ ಮುಷ್ತಾಕ್ ಅಲಿ ಟ್ರೋಫಿ ಸಹಿತ ಮಿಥುನ್ ಗೆದ್ದಿರುವ ಕಪ್’ಗಳ ಸಂಖ್ಯೆ ಬರೋಬ್ಬರಿ 10.

ಕರ್ನಾಟಕ ತಂಡ 2013ರಿಂದ ಐದಾರು ವರ್ಷಗಳ ಕಾಲ ದೇಶೀಯ ಕ್ರಿಕೆಟ್’ನ ‘ಕಿಂಗ್’ ಎನಿಸಿಕೊಂಡಿತ್ತು ಎಂದರೆ ಅದರಲ್ಲಿ ಅಭಿಮನ್ಯು ಮಿಥುನ್ ಪಾತ್ರ ತುಂಬಾ ದೊಡ್ಡದು. ಆ ಕಾಲದಲ್ಲಿ ಮಿಥುನ್-ವಿನಯ್ ಕುಮಾರ್-ಎಸ್.ಅರವಿಂದ್ ಎಂಬ ತ್ರಿವಳಿ ವೇಗಿಗಳ ಹೆಸರು ಕೇಳಿದರೆ ಸಾಕು.. ದೊಡ್ಡ ದೊಡ್ಡ ಬ್ಯಾಟ್ಸ್’ಮನ್’ಗಳ ಕಾಲು ನಡುಗುತ್ತಿತ್ತು. ಮಿಥುನ್ ಅವರಂತೂ ಘಟಾನುಘಟಿಗಳ ಎದೆಯನ್ನೇ ನಡುಗಿಸಿದ್ದ ‘ದಾದಾ’ ಬೌಲರ್. ಅವರ ಕೈಯಿಂದ ನುಗ್ಗಿ ಬರುತ್ತಿದ್ದ ಬೆಂಕಿ ಚೆಂಡುಗಳ ಮುಂದೆ ಸ್ಟಂಪ್’ಗಳು ಚಲ್ಲಾಪಿಲ್ಲಿಯಾಗಿ ಉದುರಿ ಹೋಗುತ್ತಿದ್ದದ್ದನ್ನು ನೋಡುವುದೇ ಕಣ್ಣಿಗೆ ಹಬ್ಬದಂತಿರುತ್ತಿತ್ತು. ಈಗಲೂ ಆ ಭಯಾನಕ ಸ್ಪೆಲ್’ಗಳನ್ನು ನೆನಪಿಸಿಕೊಂಡರೆ ಮೈ ರೋಮಾಂಚನಗೊಳ್ಳುತ್ತದೆ. ಪೀಣ್ಯ ಎಕ್ಸ್’ಪ್ರೆಸ್ ಉಳಿಸಿ ಹೋಗಿರುವ ಹೆಜ್ಜೆ ಗುರುತುಗಳಿವು.

ಕರ್ನಾಟಕ ತಂಡಕ್ಕೆ ಆಡಿದ ಅಷ್ಟೂ ಪಂದ್ಯಗಳನ್ನು ‘’ಹೃದಯದಿಂದ’’ ಆಡಿದವರು ಮಿಥುನ್. ರಾಜ್ಯ ತಂಡವನ್ನು ಪ್ರತಿನಿಧಿಸುವುದು, ಗಂಡಭೇರುಂಡದ ಲಾಂಛನವುಳ್ಳ ಕ್ಯಾಪ್ ಧರಿಸುವುದೇ ದೊಡ್ಡ ಗೌರವ ಎಂಬುದು ಈಗಿನ ಎಷ್ಟೋ ಕ್ರಿಕೆಟಿಗರಿಗೆ ತಿಳಿದೇ ಇಲ್ಲ. ಆ ಗೌರವವನ್ನು ಎದೆಯಲ್ಲಿಟ್ಟುಕೊಂಡು ಆಡಿದ ಮಿಥುನ್ ಕರ್ನಾಟಕ ಕ್ರಿಕೆಟ್’ಗೆ ಗೌರವ ತಂದುಕೊಟ್ಟ ದಿಗ್ಗಜ.

ಕೇವಲ 31ನೇ ವಯಸ್ಸಿನಲ್ಲಿ ದೇಶೀಯ ಕ್ರಿಕೆಟ್’ಗೆ ನಿವೃತ್ತಿ ಘೋಷಿಸಿ ಕರ್ನಾಟಕ ತಂಡದಲ್ಲಿ ಯುವ ಬೌಲರ್’ಗಳಿಗೆ ದಾರಿ ಮಾಡಿ ಕೊಟ್ಟಿರುವ ಹೃದಯವಂತ ಅಭಿಮನ್ಯು ಮಿಥುನ್. ಇಂತಹ ಒಬ್ಬ ಬೌಲರ್ ಕರ್ನಾಟಕ ತಂಡಕ್ಕೆ ಬೌಲಿಂಗ್ ಕೋಚ್ ಆಗಿ ಬಂದರೆ..?

The post ಕರ್ನಾಟಕ ಕ್ರಿಕೆಟ್’ನಲ್ಲಿ ಬೀಸಿದ ಬಿರುಗಾಳಿ.. ಈತ ಚಕ್ರವ್ಯೂಹ ಭೇದಿಸಿದ ಅಭಿಮನ್ಯು..! appeared first on SportsKannada ಸ್ಪೋರ್ಟ್ಸ್ ಕನ್ನಡ.

ರಾಬಿನ್ ಉತ್ತಪ್ಪ ಅವರದ್ದು ಆಕರ್ಷಣೀಯ ವ್ಯಕ್ತಿತ್ವ. ತುಂಬಾ ಇಂಟ್ರೆಸ್ಟಿಂಗ್ ವ್ಯಕ್ತಿ. ಆಟದ ಬಗ್ಗೆ ಹೇಳಲೇಬೇಕಿಲ್ಲ. ಅದ್ಭುತ ಕ್ರಿಕೆಟರ್. ಅದರಾಚೆ, ಉತ್ತಪ್ಪ ಒಬ್ಬ ಒಳ್ಳೆಯ ವ್ಯಕ್ತಿ ಕೂಡ ಹೌದು.

ಹೊರ ಜಗತ್ತಿಗೆ ಆತ ಹೇಗೆ ಕಾಣುತ್ತಾನೋ ಗೊತ್ತಿಲ್ಲ.. ಆದರೆ ಆತನನ್ನು ಹತ್ತಿರದಿಂದ ನೋಡಿದವರಿಗೆ “ಹೃದಯವಂತ” ಎಂಬುದಂತೂ ಚೆನ್ನಾಗಿ ಗೊತ್ತು.

ಕ್ರಿಕೆಟ್ ಮೈದಾನದಲ್ಲಿ ಅದ್ಭುತ ಸಾಧನೆ ಮಾಡಿರುವ ರಾಬಿನ್ ಉತ್ತಪ್ಪ ಮೈದಾನದಾಚೆ ಮತ್ತೊಬ್ಬರ ಕಷ್ಟಕ್ಕೆ ಮಿಡಿಯುವ ವ್ಯಕ್ತಿ. ಇದಕ್ಕೆ ಸಾಕ್ಷಿ ಚಿನ್ನಸ್ವಾಮಿ ಕ್ರೀಡಾಂಗಣದ ಗ್ರೌಂಡ್ಸ್’ಮನ್’ಗಳಿಗೆ ಅವರು ಮಾಡಿರುವ ಸಹಾಯ.

ರಾಬಿನ್ ಉತ್ತಪ್ಪ ಅವರು ಕರ್ನಾಟಕ ತಂಡದ ಪರ ಆಡುತ್ತಿದ್ದಾಗ ಕನಿಷ್ಠ ಆರೇಳು ವರ್ಷ ಚಿನ್ನಸ್ವಾಮಿ ಕ್ರೀಡಾಂಗಣದ ಗ್ರೌಂಡ್ಸ್’ಮನ್’ಗಳ ಮಕ್ಕಳ ವಿದ್ಯಾಭ್ಯಾಸಕ್ಕೆ ಹಣಕಾಸಿನ ಸಹಾಯ ಮಾಡಿದ್ದಾರೆ.

ತಮಗಾಗಿ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಹಗಲೂ ರಾತ್ರಿ ಕಷ್ಟ ಪಟ್ಟು ಕೆಲಸ ಮಾಡುವ ಗ್ರೌಂಡ್ಸ್’ಮನ್’ಗಳೆಂದರೆ ಉತ್ತಪ್ಪ ಅವರಿಗೆ ವಿಶೇಷ ಪ್ರೀತಿ.

ಅವರಲ್ಲಿ ಒಂದಷ್ಟು ಮಂದಿಯ ಮಕ್ಕಳ ಬಗ್ಗೆ ವಿಚಾರಿಸಿ ಅವರ ವಿದ್ಯಾಭ್ಯಾಸಕ್ಕೆ ನೆರವಾದವರು ರಾಬಿನ್ ಉತ್ತಪ್ಪ. ಮಕ್ಕಳು ಯಾವ ಶಾಲೆಗಳಲ್ಲಿ ಓದುತ್ತಿದ್ದಾರೆ ಎಂಬುದರ ಮಾಹಿತಿ ಪಡೆದು, ಪ್ರತೀ ವರ್ಷ School feesನ್ನು ನೇರವಾಗಿ ಶಾಲೆಗೆ ತಲುಪಿಸಿ ಬಿಡುತ್ತಿದ್ದರು. ಕರ್ನಾಟಕ ಪರ ಆಡುತ್ತಿದ್ದಾಗ ಪ್ರತೀ ವರ್ಷ ತಪ್ಪದೆ ನಮ್ಮ ಮಕ್ಕಳ ಸ್ಕೂಲ್ ಫೀಸ್ ಕಟ್ಟಿದವರು ಉತ್ತಪ್ಪ ಎಂದು ಚಿನ್ನಸ್ವಾಮಿ ಕ್ರೀಡಾಂಗಣದ ಗ್ರೌಂಡ್ಸ್’ಮನ್ ಒಬ್ಬರು ಹೇಳಿದ್ದರು. ಈ ವಿಚಾರವನ್ನು ಎಲ್ಲಿಯೂ, ಯಾರಲ್ಲೂ ಹೇಳಬಾರದೆಂದು ಗ್ರೌಂಡ್ಸ್’ಮನ್’ಗಳಿಗೆ ರಾಬಿನ್ ಉತ್ತಪ್ಪ ತಾಕೀತು ಮಾಡಿದ್ದರಂತೆ.

ಕ್ರಿಕೆಟಿಗರು ಉತ್ತಮವಾಗಿ ಬ್ಯಾಟಿಂಗ್, ಬೌಲಿಂಗ್ ಮಾಡಬೇಕೆಂದರೆ ಪಿಚ್ ಉತ್ತಮವಾಗಿರಬೇಕು. ಅಂತಹ ಉತ್ತಮ ಪಿಚ್’ಗಳನ್ನು ನಿರ್ಮಿಸುವವರು ಗ್ರೌಂಡ್ಸ್’ಮನ್’ಗಳು. ಆ ಗ್ರೌಂಡ್ಸ್’ಮನ್’ಗಳ ಮಕ್ಕಳ ವಿದ್ಯಾಭ್ಯಾಸಕ್ಕೆ ಹಣಕಾಸಿನ ನೆರವು ನೀಡುತ್ತಾ ಬಂದಿದ್ದ ರಾಬಿನ್ ಉತ್ತಪ್ಪ ನಿಜಕ್ಕೂ ಹೃದಯವಂತನೇ ಸರಿ.

The post ಹೃದಯವಂತ ರಾಬಿನ್ ಉತ್ತಪ್ಪನ ಈ ಕಥೆಯನ್ನ ಕೇಳಿದ್ದೀರಾ..? appeared first on SportsKannada ಸ್ಪೋರ್ಟ್ಸ್ ಕನ್ನಡ.