**ಅಂಡರ್–19 ಮಹಿಳಾ ಏಕದಿನ ಕ್ರಿಕೆಟ್ ಟೂರ್ನಿ

ಬಿಸಿಸಿಐ ತಂಡದ ನಾಯಕಿಯಾಗಿ ಮತ್ತೆ ಆಯ್ಕೆಯಾದ ರಚಿತಾ ಹತ್ವಾರ್**

ಕುಂದಾಪುರ:

ಬಿಸಿಸಿಐ ಆಶ್ರಯದಲ್ಲಿ ನಡೆಯಲಿರುವ **ಅಂಡರ್–19 ಮಹಿಳಾ ಏಕದಿನ ಕ್ರಿಕೆಟ್ ಟೂರ್ನಿ (ನಾಕೌಟ್ ಹಂತ)**ಗೆ ರಚಿತಾ ಹತ್ವಾರ್ ಅವರನ್ನು ಮತ್ತೊಮ್ಮೆ ತಂಡದ ನಾಯಕಿಯಾಗಿ ಆಯ್ಕೆ ಮಾಡಲಾಗಿದೆ. ಈ ಪ್ರತಿಷ್ಠಿತ ಟೂರ್ನಿಯ ಕ್ವಾರ್ಟರ್ ಫೈನಲ್, ಸೆಮಿಫೈನಲ್ ಹಾಗೂ ಫೈನಲ್ ಪಂದ್ಯಗಳು ಇದೇ ತಿಂಗಳ 28ರಿಂದ ಪುಣೆ ನಗರದಲ್ಲಿ ನಡೆಯಲಿವೆ.

ಹಿಂದಿನ ಪ್ರದರ್ಶನಗಳ ಮೂಲಕ ನಾಯಕತ್ವದ ಸಾಮರ್ಥ್ಯ ಮತ್ತು ಶಿಸ್ತಿನ ಆಟವನ್ನು ಪ್ರದರ್ಶಿಸಿರುವ ರಚಿತಾ ಹತ್ವಾರ್, ಈ ಬಾರಿ ಕೂಡ ತಂಡವನ್ನು ಮುನ್ನಡೆಸುವ ಜವಾಬ್ದಾರಿಯನ್ನು ಹೊತ್ತುಕೊಂಡಿದ್ದಾರೆ. ಸ್ಥಿರ ಪ್ರದರ್ಶನ, ತಂತ್ರಜ್ಞಾನದ ಅರಿವು ಹಾಗೂ ತಂಡವನ್ನು ಒಗ್ಗೂಡಿಸುವ ಗುಣಗಳು ಅವರನ್ನು ಈ ಸ್ಥಾನಕ್ಕೆ ಅರ್ಹಳನ್ನಾಗಿಸಿವೆ ಎಂದು ಕ್ರಿಕೆಟ್ ವಲಯದ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ರಚಿತಾ ಹತ್ವಾರ್ ಯುವ ವಯಸ್ಸಿನಲ್ಲೇ ರಾಜ್ಯ ಹಾಗೂ ರಾಷ್ಟ್ರಮಟ್ಟದ ಕ್ರಿಕೆಟ್‌ನಲ್ಲಿ ತನ್ನದೇ ಆದ ಗುರುತನ್ನು ಮೂಡಿಸಿಕೊಂಡಿದ್ದು, ಬ್ಯಾಟರ್ cum ವಿಕೆಟ್ ಕೀಪರ್ ಆಗಿ ಹಾಗೂ ನಾಯಕಿಯಾಗಿ ಗಮನಾರ್ಹ ಸಾಧನೆ ಮಾಡಿದ್ದಾರೆ. ಅವರ ಆಟದ ಶಿಸ್ತು, ಫಿಟ್‌ನೆಸ್ ಮತ್ತು ತಂಡದ ಮೇಲಿನ ಜವಾಬ್ದಾರಿ ಯುವ ಆಟಗಾರರಿಗೆ ಪ್ರೇರಣೆಯಾಗಿದೆ.

ಬಿಸಿಸಿಐ ಆಯೋಜಿಸುವ ಈ ನಾಕೌಟ್ ಟೂರ್ನಿ ಭವಿಷ್ಯದ ರಾಷ್ಟ್ರೀಯ ತಂಡದ ಆಯ್ಕೆಗಾಗಿ ಮಹತ್ವದ ವೇದಿಕೆಯಾಗಿದ್ದು, ರಚಿತಾ ಹತ್ವಾರ್ ಅವರ ನಾಯಕತ್ವದಲ್ಲಿ ತಂಡ ಉತ್ತಮ ಪ್ರದರ್ಶನ ನೀಡಲಿದೆ ಎಂಬ ನಿರೀಕ್ಷೆ ವ್ಯಕ್ತವಾಗಿದೆ.

Sports Kannada ಸಂಸ್ಥೆ ರಚಿತಾ ಹತ್ವಾರ್ ಅವರಿಗೆ ಈ ಮಹತ್ವದ ಹೊಣೆಗಾರಿಕೆಗೆ ಅಭಿನಂದನೆ ಸಲ್ಲಿಸಿ, ಮುಂದಿನ ಪಂದ್ಯಗಳಿಗೆ ಹೃತ್ಪೂರ್ವಕ ಶುಭಾಶಯಗಳನ್ನು ಕೋರುತ್ತದೆ.

The post ಅಂಡರ್–19 ಮಹಿಳಾ ಏಕದಿನ ಕ್ರಿಕೆಟ್ ಟೂರ್ನಿ; ಬಿಸಿಸಿಐ ತಂಡದ ನಾಯಕಿಯಾಗಿ ಮತ್ತೆ ಆಯ್ಕೆಯಾದ ರಚಿತಾ ಹತ್ವಾರ್ appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಆಟಗಾರನಾಗಿ ಸಾಧ್ಯವಾಗದ್ದನ್ನು ಕೋಚ್ ಆಗಿ ಸಾಧಿಸಲು ನಿಂತಿದ್ದಾರೆ ಅಮೋಲ್ ಮಜುಮ್ದಾರ್..! 

20 ವರ್ಷಗಳ ಪ್ರಥಮದರ್ಜೆ ಕ್ರಿಕೆಟ್.. 11 ಸಾವಿರಕ್ಕೂ ಹೆಚ್ಚು ರನ್.. 30 ಶತಕಗಳು.. ಆಡಿದ ಮೊಟ್ಟ ಮೊದಲ ರಣಜಿ ಪಂದ್ಯದಲ್ಲೇ 260 ರನ್’ಗಳ ಇನ್ನಿಂಗ್ಸ್.

ಅರ್ಹತೆಯೂ ಇತ್ತು, ಯೋಗ್ಯತೆಯೂ ಇತ್ತು.. ಯೋಗ ಇರಲಿಲ್ಲ ಅಷ್ಟೇ.. ಭಾರತ ಪರ ಆಡಲಾಗದ ಕೊರಗಿನೊಂದಿಗೆ ಕ್ರಿಕೆಟ್’ಗೆ ವಿದಾಯ ಹೇಳಿದ್ದ ದೇಶೀಯ ಕ್ರಿಕೆಟ್ ದಿಗ್ಗಜ ಈಗ ವಿಶ್ವಕಪ್ ಹತ್ತಿರ ಬಂದು ನಿಂತಿದ್ದಾರೆ. ಅವರು ಅಮೋಲ್ ಮಜುಮ್ದಾರ್.

ಮುಂಬೈನ ಅಮೋಲ್ ಮಜುಮ್ದಾರ್ ದೇಶೀಯ ಕ್ರಿಕೆಟ್ ಕಂಡ ದಿಗ್ಗಜರಲ್ಲಿ ಒಬ್ಬರು. ಅಮೋಲ್ ಎಂತಹ ಪ್ರತಿಭೆಯೆಂದರೆ ಮುಂಬೈ ಪರ ಇವರ ಆಟವನ್ನು ನೋಡಿದ್ದವರು ‘ಮತ್ತೊಬ್ಬ ತೆಂಡೂಲ್ಕರ್’ ಎಂದು ಉದ್ಘರಿಸಿದ್ದರಂತೆ. ಅಮೋಲ್ ಮಜುಮ್ದಾರ್ ಒಳಗಿದ್ದ ದೈತ್ಯ ಪ್ರತಿಭೆಗೆ ಇದಕ್ಕಿಂತ ಸರ್ಟಿಫಿಕೇಟ್ ಬೇಕಿಲ್ಲ.

1994ರಲ್ಲಿ ಭಾರತ ಅಂಡರ್-19 ತಂಡದ ಉಪನಾಯಕ.. 1995ರಲ್ಲಿ ಸೌರವ್ ಗಂಗೂಲಿ, ರಾಹುಲ್ ದ್ರಾವಿಡ್ ಜೊತೆ ಭಾರತ ಎ ತಂಡಕ್ಕೂ ಆಯ್ಕೆಯಾಗಿದ್ದವರು ಅಮೋಲ್ ಮಜುಮ್ದಾರ್.

ದೇಶೀಯ ಕ್ರಿಕೆಟ್’ನಲ್ಲಿ 20 ವರ್ಷಗಳ ಕಾಲ ರಕ್ತ ಬಸಿದರೂ ಭಾರತ ಪರ ಆಡುವ ಕನಸು ಕೊನೆಗೂ ನನಸಾಗಲೇ ಇಲ್ಲ.. ನಮ್ಮ ಕರ್ನಾಟಕದ ಜೆ.ಅರುಣ್ ಕುಮಾರ್, ಮಧ್ಯಪ್ರದೇಶದ ಜಲಜ್ ಸಕ್ಸೇನಾ, ಗುಜರಾತ್’ನ ಪ್ರಿಯಾಂಕ್ ಪಾಂಚಾಲ್’ರದ್ದೂ ಇದೇ ಕಥೆ.. 

ಅಮೋಲ್ ಮಜುಮ್ದಾರ್ ವಿಚಾರದಲ್ಲಿ ಕ್ರಿಕೆಟ್ ಕ್ರೂರವಾಗಿತ್ತು.. ಭಾರತ ಕಂಡ ಶ್ರೇಷ್ಠ ಕ್ರಿಕೆಟಿಗರಿಗೆ ಸರಿಸಮನಾಗಿ ನಿಂತಿದ್ದ ಪ್ರತಿಭೆ.. ನಿರಂತರ ಪ್ರಯತ್ನಗಳ ಹೊರತಾಗಿಯೂ ಭಾರತ ಪರ ಆಡಲಾಗಲೇ ಇಲ್ಲ.. ಆದರೆ ಅದೇ ಕ್ರಿಕೆಟ್ ಈಗ ವಿಶ್ವಕಪ್ ಗೆಲ್ಲುವ ಅವಕಾಶವನ್ನು ಅಮೋಲ್’ಗೆ ಕರುಣಿಸಿದೆ, ಭಾರತ ಮಹಿಳಾ ತಂಡದ ಕೋಚ್ ಆಗಿ..

2023ರಲ್ಲಿ ಅಮೋಲ್ ಮಜುಮ್ದಾರ್ ಭಾರತ ಮಹಿಳಾ ಕ್ರಿಕೆಟ್ ತಂಡದ ಹೆಡ್ ಕೋಚ್ ಜವಾಬ್ದಾರಿ ಸ್ವೀಕರಿಸಿದಾಗ ತಂಡದೊಳಗೆ ಅಷ್ಟೇನೂ ಉತ್ತಮ ವಾತಾವರಣವಿರಲಿಲ್ಲ.. ಸ್ವತಃ ಕೋಚ್ ಹುದ್ದೆಗೇ ಅಸ್ಥಿರತೆ ಕಾಡುತ್ತಿದ್ದ ಸಮಯ. ತಂಡದ ಆಯ್ಕೆ ಮತ್ತು ನಾಯಕತ್ವದ ಬಗ್ಗೆ ಪ್ರಶ್ನೆಗಳು ಎದ್ದಿದ್ದವು. ಅಂತಹ ಸಂದರ್ಭದಲ್ಲಿ ಅಮೋಲ್ ಮಜುಮ್ದಾರ್ ಅವರ ನೇಮಕ ಹಲವರ ಹುಬ್ಬೇರುವಂತೆ ಮಾಡಿತ್ತು. 

ಅತ್ತ ಆಸ್ಟ್ರೇಲಿಯಾ, ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾ, ನ್ಯೂಜಿಲೆಂಡ್’ನಂತಹ ತಂಡಗಳ ವಿರುದ್ಧ ನಿರಂತರವಾಗಿ ವೈಫಲ್ಯ ಎದುರಿಸುತ್ತಾ ಬಂದಿತ್ತು ಮಹಿಳಾ ತಂಡ. ಇಲ್ಲಿಂದ ತಂಡವನ್ನು ಯಶಸ್ಸಿನ ಹಾದಿಯಲ್ಲಿ ಮುನ್ನಡೆಸಬೇಕಾದ ಜವಾಬ್ದಾರಿ.. ಅಂತರಾಷ್ಟ್ರೀಯ ಕ್ರಿಕೆಟ್ ಆಡಿದ ಅನುಭವ ಮೊದಲೇ ಇಲ್ಲ.. 

ಆಡುತ್ತಿದ್ದಷ್ಟೂ ಸಮಯ ಆಯ್ಕೆ ಸಮಿತಿಯ ಅವಕೃಪೆಗೆ ಗುರಿಯಾಗುತ್ತಲೇ ಬಂದಿದ್ದ ಅಮೋಲ್ ಮಜುಮ್ದಾರ್ ಸಾಮರ್ಥ್ಯದ ಬಗ್ಗೆ ಇಲ್ಲಿಯೂ ಅನುಮಾನ ಪಟ್ಟಿದ್ದರು ಹಲವರು. ಆದರೆ ಅಮೋಲ್ ಅಂಜಲೂ ಅಲ್ಲ, ಅಳುಕಲೂ ಇಲ್ಲ.. ದೊಡ್ಡ ಜವಾಬ್ದಾರಿಗೆ ಎದೆಯೊಡ್ಡಿ ನಿಂತು ಬಿಟ್ಟರು. 

ಕೋಚ್ ಆಗಿ ಬಂದ ಅಮೋಲ್ ಮಜುಮ್ದಾರ್ ಮಾಡಿದ ಮೊದಲ ಕೆಲಸ ತಂಡದೊಳಗೆ ನಂಬಿಕೆಯನ್ನು ಗಟ್ಟಿಗೊಳಿಸಿದ್ದು. ಸ್ಲೋಗನ್’ಗಳಿಲ್ಲ.. ಭಾವನೆಗಳಿಲ್ಲ.. ನಾಟಕೀಯತೆಯಿಲ್ಲ.. Only ಫೋಕಸ್.. ಇದು ಮಿತಭಾಷಿ ಮಜುಮ್ದಾರ್ ಕಾರ್ಯವೈಖರಿ.. ಅಲ್ಲಿ ಮಾತಿಗಿಂತ ಕೆಲಸ ಮಾತನಾಡತೊಡಗಿತು. 

ಮುಂಬೈನ ರಣಜಿ ದಿಗ್ಗಜ.. ದೇಶೀಯ ಕ್ರಿಕೆಟ್’ನ ದಂತಕಥೆ.. ಇದೀಗ ಅದೇ ಮುಂಬೈನಲ್ಲಿ ವಿಶ್ವಕಪ್ ಫೈನಲ್.. ಭಾರತ ಪರ ಆಡುವ ಯೋಗವಿರಲಿಲ್ಲ.. ಕೋಚ್ ಆಗಿ ವಿಶ್ವಕಪ್ ಗೆಲ್ಲುವ ಯೋಗ..? ಗೆದ್ದರೆ ಚರಿತ್ರೆ.. 

-ಸುದರ್ಶನ್

The post ಆಟಗಾರನಾಗಿ ಸಾಧ್ಯವಾಗದ್ದನ್ನು ಕೋಚ್ ಆಗಿ ಸಾಧಿಸಲು ನಿಂತಿದ್ದಾರೆ ಅಮೋಲ್ ಮಜುಮ್ದಾರ್..!  appeared first on SportsKannada ಸ್ಪೋರ್ಟ್ಸ್ ಕನ್ನಡ.