ಶ್ರೀಲಂಕಾ Archives - SportsKannada ಸ್ಪೋರ್ಟ್ಸ್ ಕನ್ನಡ

ಬಾಬರ್ ತಂಡದ ರಿಟರ್ನ್ ಟಿಕೆಟ್ ಬಹುತೇಕ ಬುಕ್!

ಕೋಟ ರಾಮಕೃಷ್ಣ ಆಚಾರ್ಯ — Sat, 11 Nov 2023 05:36:01 +0000

ಶ್ರೀಲಂಕಾ ವಿರುದ್ಧ ನ್ಯೂಜಿಲೆಂಡ್‌ನ ಗೆಲುವಿನೊಂದಿಗೆ ಪಾಕಿಸ್ತಾನ ತಂಡ ಸೆಮಿಫೈನಲ್‌ನಿಂದ ಬಹುತೇಕ ಹೊರಬಿದ್ದಿದೆ. ಪಾಕಿಸ್ತಾನಕ್ಕೆ ಸೆಮಿಫೈನಲ್ ತಲುಪಲು ಕಠಿಣ ಹಾದಿಯಿದೆ. ಇನ್ನೂ ಜೀವಂತವಾಗಿರಬೇಕಾದರೆ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಪಾಕಿಸ್ತಾನ ಊಹಿಸಲೂ ಸಾಧ್ಯವಾಗದಂತಹ ಸಾಧನೆ ಮಾಡಬೇಕಿದೆ.

ಇಂಗ್ಲೆಂಡ್ ತಂಡ ಮೊದಲು ಬ್ಯಾಟ್ ಮಾಡಿದರೆ ಪಾಕಿಸ್ತಾನ ತಂಡ ಔಟ್ಆದ ಹಾಗೇನೆ . ಇಂಗ್ಲೆಂಡ್ ತಂಡ ನೀಡಿದ ಗುರಿಯನ್ನು ಪಾಕಿಸ್ತಾನ ಕೇವಲ 156 ಎಸೆತಗಳಲ್ಲಿ ಸಾಧಿಸಬೇಕಾಗಿದೆ. ಅದು ಎಲ್ಲಿಂದಲಾದರೂ ಸಾಧ್ಯವಾಗುವಂತೆ ಕಾಣುತ್ತಿಲ್ಲ. ಇದಲ್ಲದೇ ಪಾಕಿಸ್ತಾನ ಮೊದಲು ಆಡಿದರೆ ಇಂಗ್ಲೆಂಡ್ 287 ರನ್ ಗಳಿಂದ ಸೋಲನುಭವಿಸಬೇಕಾಗುತ್ತದೆ. ಇದೂ ಸಾಧ್ಯವಾಗುತ್ತಿಲ್ಲವಂತೆ.

ಮೊದಲು ಆಡುವಾಗ ಪಾಕಿಸ್ತಾನ 300 ರನ್ ಗಳಿಸಿದರೆ, ಇಂಗ್ಲೆಂಡ್ 13 ರನ್‌ಗೆ ಔಟಾಗಬೇಕಾಗುತ್ತದೆ. ಅದೇ ರೀತಿ 400ರನ್ ಸ್ಕೋರ್ ನಲ್ಲಿ ಇಂಗ್ಲೆಂಡ್ 113 ರನ್ ಗಳಿಗೆ ಆಲೌಟ್ ಆಗಬೇಕಿದೆ. 450 ರನ್ ಗಳಿಸಿದ ನಂತರ ಪಾಕ್ ತಂಡದ ಬೌಲರ್‌ಗಳು ಆಂಗ್ಲ ತಂಡವನ್ನು ಒಟ್ಟು 162 ರನ್‌ಗಳಿಗೆ ಆಲೌಟ್ ಮಾಡಬೇಕು ಮತ್ತು 500 ರನ್ ಗಳಿಸಿದ ನಂತರ ಆಂಗ್ಲರ ತಂಡವನ್ನು 211 ರನ್‌ಗಳಿಗೆ ಆಲೌಟ್ ಮಾಡಬೇಕಾಗುತ್ತದೆ. ಈ ಅಂಕಿಅಂಶಗಳು ಯಾವುದೂ ಸುಲಭವಲ್ಲ. ಪಾಕಿಸ್ತಾನ ಪವಾಡ ಮಾಡಬೇಕಿದೆ.

ಸದ್ಯ ಪಾಕಿಸ್ತಾನ ತಂಡ 8 ಅಂಕ ಹೊಂದಿದೆ. ಇಂಗ್ಲೆಂಡ್ ವಿರುದ್ಧ ಸರಳ ಗೆಲುವು ದಾಖಲಿಸಿದರೆ, ನಿವ್ವಳ ರನ್ ರೇಟ್‌ನಲ್ಲಿ ನ್ಯೂಜಿಲೆಂಡ್‌ಗಿಂತ ಹಿಂದೆ ಉಳಿಯುತ್ತದೆ. ಆ ಪರಿಸ್ಥಿತಿಯಲ್ಲಿ ನ್ಯೂಜಿಲೆಂಡ್ ತಂಡ ಅಗ್ರ ನಾಲ್ಕರಲ್ಲಿದೆ. ಸದ್ಯ ಪಾಕಿಸ್ತಾನ ತಂಡ ಸೆಮಿಫೈನಲ್‌ನಿಂದ ಹೊರಗುಳಿದಿದ್ದು, ನ್ಯೂಜಿಲೆಂಡ್ ತಂಡ ಭಾರತದ ವಿರುದ್ಧ ವಾಂಖೆಡೆ ಸ್ಟೇಡಿಯಂನಲ್ಲಿ ಅಗ್ರ ನಾಲ್ಕು ಸೆಮಿಫೈನಲ್ ಪಂದ್ಯವನ್ನು ಆಡಲಿದೆ ಎಂದು ಹೇಳಬಹುದು.

ಸೆಮಿಫೈನಲ್ ನಲ್ಲಿ ಮೊದಲ ಶ್ರೇಯಾಂಕದ ತಂಡವು ನಾಲ್ಕನೇ ಶ್ರೇಯಾಂಕದ ತಂಡವನ್ನು ಎದುರಿಸಲಿದೆ. ಇದರರ್ಥ ಭಾರತವು ನ್ಯೂಜಿಲ್ಯಾಂಡ್ ಎದುರಿಸುವ ಸಾಧ್ಯತೆಗಳು ಹೆಚ್ಚು. ಎರಡನೇ ಸೆಮಿಫೈನಲ್‌ನಲ್ಲಿ ಎರಡನೇ ಶ್ರೇಯಾಂಕದ ತಂಡವು ಮೂರನೇ ಶ್ರೇಯಾಂಕದ ತಂಡವನ್ನು ಎದುರಿಸಲಿದೆ. ಅಂದರೆ ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ನಡುವೆ ಹಣಾಹಣಿ ನಡೆಯಲಿದೆ.

ವಿಶ್ವಕಪ್ ಕ್ರಿಕೆಟ್ ಸೆಮಿಫೈನಲ್ ಸ್ಥಾನ ಬಹುತೇಕ ಫಿಕ್ಸ್..!

ಭಾರತ Vs ನ್ಯೂಜಿಲ್ಯಾಂಡ್

ಆಸ್ಟ್ರೇಲಿಯಾ Vs ದಕ್ಷಿಣ ಆಫ್ರಿಕಾ.

ಯಾವ ತಂಡ ಫೈನಲ್ ತಲುಪುತ್ತದೆ ಎಂದು ಊಹಿಸಿ.

ಸುರೇಶ್ ಭಟ್, ಮೂಲ್ಕಿ

ಕ್ರೀಡಾ ಬರಹಗಾರರು

ಟೀಂ ಸ್ಪೋರ್ಟ್ಸ್ ಕನ್ನಡ

The post ಬಾಬರ್ ತಂಡದ ರಿಟರ್ನ್ ಟಿಕೆಟ್ ಬಹುತೇಕ ಬುಕ್! appeared first on SportsKannada ಸ್ಪೋರ್ಟ್ಸ್ ಕನ್ನಡ.

ಅಡೆತಡೆಗಳ ಎಲ್ಲೆಗಳ ಮೀರಿ ಮತ್ತೆ ಬೆಳೆದು ನಿಂತ ಶ್ರೀಲಂಕಾ ಕ್ರಿಕೆಟ್‌ ತಂಡ….

ಮಂಜುನಾಥ್ ಕಾರ್ತಟ್ಟು — Mon, 12 Sep 2022 13:52:35 +0000

ಏಷ್ಯಾ ಖಂಡದ ಪಾಲಿಗೆ ಕ್ರಿಕೆಟ್ ಮಿನಿ ವಿಶ್ವಕಪ್‌ ಎಂಬ ಖ್ಯಾತಿಯಲ್ಲೇ ಪ್ರತಿಷ್ಠಿತ ಕ್ರಿಕೆಟ್‌ ಪಂದ್ಯಾಟವಾಗಿ ಸಾಗುವ ಏಷ್ಯಾ ಕಪ್ ಈ ಬಾರಿಯಂತು ಕ್ರಿಕೆಟ್ ಪಂಡಿತರ ಲೆಕ್ಕಾಚಾರವನ್ನೇ ತಲೆಕೆಳಗಾಗಿಸುವಂತೆ ಅಚ್ಚರಿಯ ಫಲಿತಾಂಶವನ್ನು ನೀಡಿದೆ. ಅನುಭವಿ ಕ್ರಿಕೇಟಿಗರಿಂದ ತುಂಬಿ ತುಳುಕುತ್ತಿದ್ದ ಟೀಮ್ ಇಂಡಿಯಾ ಪ್ರಶಸ್ತಿಯ ಫೇವರಿಟ್ ಆಗಿದ್ದರು, ತನ್ನ ಪರಿಪೂರ್ಣ ಸಂಘಟಿತ ಹೋರಾಟವನ್ನು ತೋರ್ಪಡಿಸದೇ ಸೂಪರ್ 4 ಹಂತದಲ್ಲಿ ನಂಬಲಸಾಧ್ಯ ಸೋಲಿನೊಂದಿಗೆ ಬರಿಗೈಯಲ್ಲಿ ಹಿಂತಿರುಗಿದೆ.

ಆರ್ಥಿಕ ದಿವಾಳಿತನ, ರಾಜಕೀಯ ಅಸ್ಥಿರತೆ ಸಾರ್ವಜನಿಕ ದಂಗೆಯಿಂದಾಗಿ ವಿಶ್ವದ ಮುಂದೆ ತಲೆಬಾಗಿದ್ದ ಶ್ರೀಲಂಕಾ ತನ್ನ ನೆಲದಲ್ಲಿ ಆತಿಥ್ಯ ಕಾಣಬೇಕಿದ್ದ ಏಷ್ಯಾ ಕಪ್ ಪಂದ್ಯಾಟವನ್ನು ಅರಬ್ ನಾಡಿಗೆ ಸ್ಥಳಾಂತರಿಸಿತು.

ಆರಂಭಿಕ ಪಂದ್ಯಾಟದಲ್ಲಿ ಅಫಘನ್ನರ ವಿರುದ್ದ ಹೀನಾಯ ಸೋಲು ಕಂಡ ಧನುಸು ಶನಕ ಸಾರಥ್ಯದ ಶ್ರೀಲಂಕಾ ಕ್ರಿಕೆಟ್‌ ಪಡೆ ಮತ್ತೆ ಪುಟಿದೆದ್ದು ನಿಂತು ಪ್ರಶಸ್ತಿ ಗೆಲ್ಲುತ್ತದೆ ಎಂದು ಯಾರೂ ಕೂಡ ಊಹಿಸಿರಲಿಲ್ಲ, ಆರಂಭಿಕ ಸೋಲಿಗೆ ಆಘಾತಗೊಳ್ಳದೇ ಸತತ 5 ಪಂದ್ಯಾಟಗಳ ಗೆಲುವಿನೊಂದಿಗೆ ತನ್ನ ಪಾರುಪತ್ಯವನ್ನು ತೋರಿದ ರೀತಿ ನಿಜಕ್ಕೂ ಕ್ರಿಕೆಟ್‌ ಜಗತ್ತು ಹುಬ್ಬೇರಿಸಿ ನೋಡುವಂತದ್ದು.

ದುಬೈ ನೆಲದಲ್ಲಿ ಈ ಬಾರಿಯ ಏಷ್ಯಾಕಪ್ ಕ್ರಿಕೆಟ್ ಪಂದ್ಯಾಟದಲ್ಲಿ ತನ್ನ ಅಸಾಧಾರಣ ಪ್ರದರ್ಶನದೊಂದಿಗೆ ಪಾರುಪತ್ಯ ಮೆರೆದದಿದ್ದರೆ ಅದು ಶ್ರೀಲಂಕಾ ಕ್ರಿಕೆಟ್‌ ತಂಡ. ಮಹೇಲಾ ಜಯವರ್ಧನ, ಕುಮಾರ ಸಂಗಕ್ಕಾರ, ತಿಲಕರತ್ನೇ ದಿಲ್ಶಾನ್, ಲಸಿತ್ ಮಾಲಿಂಗ ರಂತಹ ಕ್ರಿಕೆಟ್ ದೈತ್ಯರ ನಿರ್ಗಮನದ ಬಳಿಕ ಒಂದು ಪ್ರಬಲ ಪೈಪೋಟಿಯ ತಂಡವನ್ನು ತನ್ನದಾಗಿಸಿಕೊಳ್ಳುವಲ್ಲಿ ಶ್ರೀಲಂಕಾ ಪದೇ ಪದೇ ಎಡವುತ್ತಿತ್ತು. ಆದರೆ ಈ ಬಾರಿ 2022ರ ಏಷ್ಯಾ ಕಪ್ ಗೆ ಆಯ್ಕೆಗೊಂಡ ದಸುನು ಶನಕ ಸಾರಥ್ಯದ ತಂಡ ಹಲವು ವರ್ಷಗಳ ತರುವಾಯ ಶ್ರೀಲಂಕಾ ಮುಡಿಗೆ ಪ್ರತಿಷ್ಠಿತ ಪಂದ್ಯಾಟದ ಪ್ರಶಸ್ತಿಯ ಗರಿಯನ್ನು ದೊರಕಿಸಿ ಕೊಡುವಲ್ಲಿ ಯಶಸ್ವಿಯಾಯಿತು.

ಪ್ರತಿಷ್ಠಿತ ಏಷ್ಯಾಕಪ್ ನ ಪ್ರಶಸ್ತಿ ಸುತ್ತಿನ ಅಂತಿಮ ಹಣಾಹಣಿಯಲ್ಲಿ ಪಾಕ್ ಸೂಪರ್ 4 ಹಂತದಲ್ಲಿ ಶ್ರೀಲಂಕಾದ ವಿರುದ್ದ ಸೋಲು ಕಂಡಿದ್ದರೂ , ಪ್ರಶಸ್ತಿಯ ಫೇವರಿಟ್ ಪಾಕಿಸ್ಥಾನವೇ ಆಗಿತ್ತೂ, ಅದಕ್ಕೆ ಪೂರಕ ಎಂಬಂತೆ ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿದ ಲಂಕಾ 58 ರನ್ ಗಳಿಸುವುದರಲ್ಲಿ ತನ್ನ 5 ಅಗ್ರ ಪಂಕ್ತಿಯ ಆಟಗಾರರನ್ನು ಕಳೆದುಕೊಂಡಿತ್ತು, ತದನಂತರದಲ್ಲಿ ಜೊತೆಯಾದ ರಾಜಪಕ್ಸ ಹಾಗೂ ಹಸರಂಗ ಜೋಡಿ ಪಾಕ್ ಬೌಲಿಂಗ್ ದಾಳಿಗೆ ದಿಟ್ಟ ಉತ್ತರವನ್ನು ನೀಡಿ 170 ರ ಸ್ಪರ್ಧಾತ್ಮಕ ಮೊತ್ತವನ್ನು ಕಲೆ ಹಾಕುವುದರಲ್ಲಿ ನಿರ್ಣಾಯಕ ಪಾತ್ರ ವಹಿಸಿತ್ತು.

170 ರ ಜಯದ ಗುರಿಯನ್ನು ಬೆನ್ನತ್ತಲು ಹೊರಟ ಪಾಕ್ ಗೆ ಲಂಕಾ ಬೌಲರ್ ಒಂದು ಎಸೆತ ಎಸೆಯುವ ಮುನ್ನವೇ 9 ರನ್ ಗಳ ದಾನ ರೂಪದ ಕೊಡುಗೆಯನ್ನು ನೀಡಿದರೂ ನಂತರದಲ್ಲಿ ಬೌಲಿಂಗ್‌ ನಲ್ಲಿ ಹಿಡಿತ ಸಾಧಿಸಿ ಸತತ ಎರಡು ಎಸೆತಗಳಲ್ಲಿ ಎರಡು ವಿಕೆಟ್‌ ಕಬಳಿಸುವ ಮೂಲಕ ಪಾಕ್ ಆರಂಭಿಕ ಆಘಾತವನ್ನು ಎದುರಿಸುವಂತೆ ಮಾಡಿ ಮತ್ತೆ ರನ್ ಗಳಿಕೆಯಲ್ಲಿ ಚೇತರಿಕೆ ಕಾಣದಂತೆ ಒತ್ತಡ ಹೇರುವಲ್ಲಿ ಬಿಗು ಬೌಲಿಂಗ್ ದಾಳಿಯನ್ನು ಸಂಘಟಿಸಿತು. ರಿಜ್ವಾನ್ ಹಾಗೂ ಇಪ್ತಿಕಾರ್ ಗೆಲುವಿನ ಹೋರಾಟಕ್ಕೆ ಪ್ರಯತ್ನಿಸಿದರು, ಲಂಕಾದ ಯುವ ಪಡೆಯ ಪ್ರಬಲ ಬೌಲಿಂಗ್ ಹಾಗೂ ಸಂಘಟಿತ ಫೀಲ್ಡಿಂಗ್ ಎದುರು ಪ್ರತಿಸ್ಪರ್ಧೆಯೊಡ್ಡುವಲ್ಲಿ ಸಶಕ್ತರಾಗದಂತಾದರು. ಲಂಕಾ ತನ್ನ ಪ್ರಬಲ ಹೋರಾಟದ ಬಲದಿಂದ ಪಾಕ್ ಹೋರಾಟವನ್ನು 147 ರನ್ ಗಳಿಗೆ ಅಂತ್ಯಗೊಳಿಸಿ 2022ರ ಏಷ್ಯಾ ಕಪ್ ಫೈನಲ್ ನಲ್ಲಿ ಅಧಿಕಾರಯುತ ಗೆಲುವನ್ನು ದಾಖಲಿಸಿ ಪ್ರಶಸ್ತಿಯನ್ನು ತನ್ನ ಮುಡಿಗೇರಿಸಿಕೊಂಡಿತು.

ಏಷ್ಯಾ ಕಪ್ ನಂತಹ ಪ್ರತಿಷ್ಠಿತ ಪಂದ್ಯಾಟದಲ್ಲಿ ತಮ್ಮ ಮೇಲಿನ ಹಂಬಲ ಬೆಂಬಲದ ಆಯ್ಕೆಯನ್ನು ಸಮರ್ಥಿಸಿಕೊಂಡು, ಪರಿಪೂರ್ಣ ಸಾಮರ್ಥ್ಯದೊಂದಿಗೆ ಸರ್ವಾಂಗೀಣ ಪ್ರದರ್ಶನವನ್ನು ತೋರಿದ ಯಾವುದೇ ಸ್ಟಾರ್ ಕ್ರಿಕೆಟಿಗರಿಲ್ಲದಿದ್ದರೂ ತಮ್ಮ ಕೆಚ್ಚೆದೆಯ ಹೋರಟ , ಗೆಲುವಿನ ಹುಮ್ಮಸ್ಸಿನಿಂದ ಅರ್ಹವಾಗಿ ಏಷ್ಯಾ ಕಪ್ ಕಿರೀಟವನ್ನು ತನ್ನ ಮುಡಿಗೇರಿಸಿಕೊಂಡ ಶ್ರೀಲಂಕಾದ ಹೊಸ ಹುಡುಗರ ತಂಡ 2022 ರ ಏಷ್ಯಾದ ಕ್ರಿಕೆಟ್‌ ಚಾಂಪಿಯನ್ ಆಗುವುದರೊಂದಿಗೆ ಮುಂದೆ ವಿಶ್ವಮಟ್ಟದಲ್ಲಿ ಪ್ರಬಲ ಪೈಪೋಟಿ ನೀಡುವುದರೊಂದಿಗೆ ಹೊಸ ಸಂಚಲನ ಮೂಡಿಸುವ ನಿರೀಕ್ಷೆಯನ್ನು ಶ್ರೀಲಂಕಾ ಕ್ರಿಕೆಟ್ ತಂಡ ಮತ್ತೆ ಹುಟ್ಟುಹಾಕಿದೆ.

The post ಅಡೆತಡೆಗಳ ಎಲ್ಲೆಗಳ ಮೀರಿ ಮತ್ತೆ ಬೆಳೆದು ನಿಂತ ಶ್ರೀಲಂಕಾ ಕ್ರಿಕೆಟ್‌ ತಂಡ…. appeared first on SportsKannada ಸ್ಪೋರ್ಟ್ಸ್ ಕನ್ನಡ.